UJoshuwa 17 - iBhayibhili Elingcwele 1978

Ilizwe elanikwa isizwe sakoManase

¹ Kwasekusabelwa abakoManase, ngoba uManase wayelizibulo likaJosefa. UMakiri izibulo likaManase uyise kaGileyadi wanikwa iGileyadi leBashani, ngoba wayengumuntu wempi.

² Abaseleyo esizweni sakoManase ngosendo lwabo babengabakoAbiyezeri labakoHeleki labakoAsiriyeli labakoShekema labakoHeferi labakoShemida. Laba babengabantwana besilisa bakaManase indodana kaJosefa ngosendo lwabo.

³ UZelofehadi indodana kaHeferi kaGileyadi kaMakiri kaManase wayengelamadodana, kodwa wayelamadodakazi wodwa; nanka amabizo amadodakazi akhe, oMahla loNowa loHogila loMilka loTiriza.

⁴ Wona eza kuEleyazare umpristi lakuJoshuwa indodana kaNuni lakubakhokheli, athi: INkosi yalaya uMose ukusinika ilizwe kanye labafowethu. Njengokulaya kweNkosi asenikwa ilizwe phakathi kwabafowabo bakayise wawo.

⁵ Ngakho abakoManase basebezuza izabelo ezilitshumi ngaphandle kwelizwe leGileyadi leBashani, elingaphetsheya kweJordani,

⁶ ngoba amadodakazi kaManase ayenikwe ilizwe kanye lamadodana akhe. Ilizwe laseGileyadi lanikwa abanye abakoManase.

⁷ Umngcele wabakoManase wasukela eAsheri, waya eMikimethathi ngasempumalanga kweShekema, wasuqonda eningizimu ngaseEni‐Tapuwa.

⁸ Ilizwe laseTapuwa lalingelakoManase, kodwa umuzi waseTapuwa owawusemngceleni wakoManase wawungowabakoEfrayimi.

⁹ Umngcele wasusehlela esifuleni iKana. Imizi yalapho engaseningizimu kwesifula phakathi kwemizi yakoManase ngeyakoEfrayimi. Umngcele wakoManase udlula ngasenyakatho kwesifula, uphelele olwandle.

¹⁰ Ilizwe laseningizimu ngelakoEfrayimi, elasenyakatho ngelakoManase, ulwandle lungumngcele wawo. Bafinyelela kwelakoAsheri ngasenyakatho, lakwelakoIsakari ngasempumalanga.

¹¹ Futhi koIsakari lakoAsheri uManase wabelwa iBeti‐Sheyani lemizana yalo, leIbileyamu lemizana yalo, labaseDori lemizana yalo, labaseEni‐Dori lemizana yalo, labaseTanaki lemizana yalo, labaseMegido lemizana yalo — owesithathu uyisigaba saseDori —

¹² Kodwa abakoManase bahluleka ukuthatha leyomizi, ngakho amaKanani ahlala njalo kulelolizwe.

¹³ Kodwa lapho abakoIsrayeli sebelamandla bawasebenzisa nzima amaKanani, kabawaxotshanga aphela nya.

¹⁴ AbakoJosefa bakhuluma loJoshuwa bathi: Usinikeleni isabelo saba sinye nje ukuba sibe yilifa lethu lokhu siyisizwe esikhulu, leNkosi isibusisile kuze kube lamuhla na?

¹⁵ UJoshuwa wathi kubo: Uba liyisizwe esikhulu, yanini eguswini, lizicentele khona indawo elizweni lamaPerizi lamaRefa, lokhu izintaba zakoEfrayimi ziminyene.

¹⁶ AbakoJosefa bathi: Izintaba kazisanelanga, kanti amaKanani ahlala emagcekeni alezinqola zokulwa zensimbi, wonke aseBeti‐Sheyani kanye lemizi yalo lawesigodini seJezereli.

¹⁷ UJoshuwa wasesithi kwabakoJosefa abangabakoEfrayimi labakoManase: Lina liyisizwe esikhulu, futhi lilamandla amakhulu; kaliyikuphiwa isabelo sibe sinye,

¹⁸ kodwa lezintaba zizakuba ngezenu; lanxa zingamagusu lizakuzicenta zibe ngezenu kuze kube semikhawulweni yazo, liwaxotshe amaKanani lanxa elenqola zokulwa zensimbi, lanxa elamandla.