UJoshuwa 16 - iBhayibhili Elingcwele 1978

Ilizwe elanikwa isizwe sakoEfrayimi

¹ Ilizwe labakoJosefa lasukela eJordani ngaseJeriko, ngasempumalanga kwamanzi aseJeriko. Umngcele walo waqonda enkangala, wasuka eJeriko wakhwela izintaba usiya eBetheli;

² wasuka eBetheli waya eLuzi, wadlula lapho waya eAtarothi, elizweni lamaAriki,

³ wasusehla uqonda entshonalanga elizweni lamaJafileti, waze wafika elizweni leBeti‐Horoni elingaphansi kwaseGezeri; waphelela olwandle.

⁴ Lapho inzalo kaJosefa, abakoManase labakoEfrayimi, yanikwa ilizwe layo.

⁵ Indawo yabakoEfrayimi ngosendo lwabo yayinje; umngcele welizwe labo ngasempumalanga wawuliAtarothi‐Adari kuze kufike eBeti‐Horoni elingaphezulu,

⁶ wasuka lapho waya olwandle, iMikimethathi lingasenyakatho; ngasempumalanga waphendukela eTanathi‐Shilo, wadlulela phambili ngasempumalanga usiya eJanowa;

⁷ wasusehla lapho usiya eAtarothi laseNara, wagudla iJeriko, wayaphelela eJordani;

⁸ wasuka eTapuwa waqonda entshonalanga waya esifuleni iKana, waphelela olwandle. Linjaloke ilizwe lesizwe sakoEfrayimi ngosendo lwaso,

⁹ ndawonye lemizi eyayabelwe abakoEfrayimi esabelweni sabakoManase, yonke leyomizi lemizana yayo.

¹⁰ Kodwa kabawaxotshanga amaKanani ayehlala eGezeri; ngakho asahlala phakathi kwabakoEfrayimi kuze kube lamuhla, kodwa ayeyizigqili zokusebenza.