UJoshuwa 14 - iBhayibhili Elingcwele 1978

Ilizwe laseKanani labiwa ngenkatho

¹ La ngamazwe abawaphiwayo abakoIsrayeli elizweni laseKanani; uEleyazare umpristi loJoshuwa indodana kaNuni lezinhloko zezindlu zezizwe zabakoIsrayeli babanika wona.

² Amazwe abo bawanikwa ngenkatho njengokulaywa kukaMose yiNkosi ngezizwe ezificamunwemunye lengxenye.

³ Ngoba uMose wayesezinikile izizwe ezimbili lengxenye ngaphetsheya kweJordani; kodwa abakoLevi kabanikanga ilizwe phakathi kwazo.

⁴ AbakoJosefa babeyizizwe ezimbili, abakoManase labakoEfrayimi. AbakoLevi kabanikwanga sabelo elizweni, kodwa banikwa imizi ukuhlala kiyo, lamadlelo ezinkomo zabo lezifuyo zabo.

⁵ AbakoIsrayeli benza njengokulaywa kukaMose yiNkosi, balaba ilizwe.

UKalebi unikwa iHebroni

⁶ AbakoJuda basebesiza kuJoshuwa eGiligali; uKalebi indodana kaJefune umKenizi wathi kuye: Uyakwazi iNkosi eyakutshoyo kuMose umuntu kaNkulunkulu eKadeshi‐Barneya mayelana lawe lami.

⁷ Ngangileminyaka engamatshumi amane lapho uMose inceku yeNkosi ingithuma eKadeshi‐Barneya ukuhlola ilizwe; ngaletha kuye umbiko weqiniso.

⁸ Kodwa abazalwane bami ababehambe lami bazithelela ubuthakathaka inhliziyo zabantu; kodwa mina ngayilandela ngokupheleleyo iNkosi uNkulunkulu wami.

⁹ UMose wafunga mhlalokho wathi: Impela umhlaba onyathele kuwo uzakuba ngowakho labantwana bakho kokuphela, ngoba uyilandele ngokupheleleyo iNkosi uNkulunkulu wami.

¹⁰ Khangelake, iNkosi ingilondolozile njengokutsho kwayo okweminyaka engamatshumi amane lanhlanu kusukela esikhathini iNkosi eyakhuluma ngaso lelilizwi kuMose, uIsrayeli esahamba enkangala; khathesike sengileminyaka engamatshumi aficaminwembili lanhlanu lamhlanje.

¹¹ Lokhu ngisaqinile lalamhla njengasosukwini uMose angithuma ngalo, lamandla ami awokulwa lawokuhamba asenjengalokhu ayenjalo,

¹² ngakhoke akunginike lelilizwe lezintaba iNkosi eyakhuluma ngalo ngalolosuku, ngoba wezwa mhlalokho ukuba amaAnaki ayehlala lapho ayelemizi emikhulu ebiyelweyo. Uba iNkosi ilami, ngizawaxotsha njengokutsho kwayo.

¹³ UJoshuwa wasembusisa uKalebi indodana kaJefune, wamnika iHebroni laba ngelakhe.

¹⁴ Ngalokhoke iHebroni laba yilifa likaKalebi indodana kaJefune umKenizi kuze kube lamhla, ngoba wayilandela ngokupheleleyo iNkosi, uNkulunkulu kaIsrayeli.

¹⁵ Ibizo leHebroni kuqala laliliKiriyathi‐Arba; uArba wayengumuntu omkhulu phakathi kwamaAnaki. Ilizwe laba lokuphumula ekulweni.