UJohane 13 - iBhayibhili Elingcwele 1978

UJesu ugezisa inyawo zabafundi

¹ Umkhosi wePhasika wawusuzafika. UJesu wayekwazi ukuthi isikhathi sakhe sasesifikile ukuba asuke kulumhlaba aye kuYise. Wayebathandile abakhe abasemhlabeni, wabathanda kakhulu.

² Sekudliwa, uSathane esekufakile enhliziyweni kaJudasi Iskariyothi, indodana kaSimoni, ukuba amnikele,

³ uJesu wayekwazi ukuthi uYise unikele inzinto zonke ezandleni zakhe lokuthi wavela kuNkulunkulu, uyabuyela kuNkulunkulu;

⁴ ngakho wasukuma ekudleni, wakhupha izingubo zakhe, wazikhwica ngelembu.

⁵ Wasethela amanzi emganwini, waqala ukugezisa inyawo zabafundi, wazesula ngelembu ayezikhwice ngalo.

⁶ Wafika kuSimoni Petro, uSimoni Petro wathi kuye: Nkosi, wena ugezisa inyawo zami na?

⁷ UJesu wamphendula wathi: Engikwenzayo kawukwazi khathesi; kodwa uzakukuqedisisa emva kwalokhu.

⁸ UPetro wathi kuye: Kawusoze ugezise inyawo zami lanini. UJesu wamphendula wathi: Uba ngingakugezisi, kawulasabelo lami.

⁹ USimoni Petro wathi kuye: Nkosi, kakungabi zinyawo zami zodwa, kodwa lezandla zami lekhanda lami.

¹⁰ UJesu wathi kuye: Ogezileyo kadingi ukugeza, kuphela ukugeziswa kwenyawo zakhe, ngoba uhlambulukile. Lina lihlambulukile, kodwa kakusini lonke.

¹¹ Ngoba wayemazi lowo owayezakumnikela. Ngenxa yalokhu wathi: Kalihlambulukile lonke.

¹² Esegezisile inyawo zabo wathatha ingubo zakhe, wabuya wahlala, wathi kibo: Liyakwazi yini engikwenze kini na?

¹³ Lingibiza lithi: Mfundisi, Nkosi; liqinisile ngoba ngiyikho.

¹⁴ Uba minake, iNkosi loMfundisi wenu, ngigezise inyawo zenu, lanike lifanele ukugezisana inyawo.

¹⁵ Ngoba ngilinikile isibonelo ukuba lenze lani njengokuba ngenzile kini.

¹⁶ Ngiqinisile, ngiqinisile ngithi kini: Inceku kayinkulu kulenkosi yayo, lothunyiweyo kamkhulu kulomthumileyo.

¹⁷ Uba likwazi lokhu libusisiwe uba likwenza.

¹⁸ Kangikhulumi ngani lonke; ngiyabazi engibakhethileyo; kodwa kakugcwaliseke umbhalo othi: Odla lami ungivukele.

¹⁹ Ngilitshela lokhu khathesinje kungakenzeki, ukuba nxa sekusenzeka, likholwe ukuthi nginguye.

²⁰ Ngiqinisile, ngiqinisile ngithi kini: Owamukela ongimthumileyo wamukela mina: lowamukela mina wamukela ongithumileyo.

UJesu ukhuluma ngokunikelwa kwakhe

²¹ UJesu esetshilo lokhu wakhathazeka emoyeni, waqinisa wathi: Ngiqinisile, ngiqinisile ngithi kini: Omunye wenu uzakunginikela.

²² Abafundi bakhangelana bengaqondi ukuthi ukhuluma ngobani.

²³ Kwathi omunye wabafundi yena uJesu amthandayo, wayeyeme esifubeni sikaJesu.

²⁴ Ngakho uSimoni Petro wamqhweba wathi kuye: Sitshele ukuba ukhuluma ngobani.

²⁵ Yenake eyeme esifubeni sikaJesu wathi kuye: Nkosi, ngubani na?

²⁶ UJesu waphendula wathi: Yilowo engizakumnika ucezu lwesinkwa sengilutshebile. Ngakho eselutshebile ucezu, walunika uJudasi, indodana kaSimoni Iskariyothi.

²⁷ UJudasi eselwamukele ucezu uSathane wangena kuye. UJesu wasesithi kuye: Okwenzayo kwenze masinyane.

²⁸ Kodwa kakukho loyedwa kwababehlezi ekudleni owayekwazi ukuthi ukutsho ngani lokhu kuye.

²⁹ Kodwa abanye bacabanga ukuthi kungoba uJudasi wayephatha isikhwama, uJesu wathi kuye: Thenga esikufunayo emkhosini, loba ukuthi kabele abayanga okuthile.

³⁰ Wathi eselwamukele ucezu waphuma masinyane; kwakusebusuku.

UJesu unikwa udumo. Umlayo wokuthandana

³¹ Ngakho, uJudasi esephumile, uJesu wathi: Khathesi iNdodana yomuntu inikwe udumo, loNkulunkulu unikwe udumo kiyo.

³² Uba uNkulunkulu enikwe udumo kiyo, loNkulunkulu uzakuyinika udumo, njalo uzakuyinika udumo masinyane.

³³ Bantwana bami, ngiselani isikhatshana. Lizakungifuna, njengalokhu ngatsho kubaJuda ukuthi lapho ngiya khona lingeze leza lina, ngitsho njalo lakini.

³⁴ Ngilinika umlayo omutsha wokuba lithandane; njengalokhu ngilithandile mina, lani lithandane.

³⁵ Ngalokhu bonke bazakukwazi ukuba lingabafundi bami, aluba lithandana.

Ukuxwayiswa kukaPetro

³⁶ USimoni Petro wathi kuye: Nkosi, uya ngaphi na? UJesu waphendula wathi: Lapho ngiya khona, ungengilandele khathesi; kodwa uzakulandela emva kwalokhu.

³⁷ UPetro wathi kuye: Nkosi, ngingekulandele ngani khathesi na? Ngizakudela ukuphila kwami ngenxa yakho.

³⁸ UJesu waphendula wathi: Uzakudela ukuphila kwakho ngami na? Ngiqinisile, ngiqinisile ngithi kuwe: Iqhude kaliyikukhala ungakangilanduli kathathu.