UJobe 26 - iBhayibhili Elingcwele 1978

Impendulo kaJobe: ukhuluma ngobukhulu bukaNkulunkulu

¹ UJobe wasephendula esithi:

² Umsize kanjani ongelamandla na? Umkhulule njani ophelelwe ngamandla na?

³ Umluleke njani ongelakuhlakanipha? Utshumayele njani izinto ezinengi ezihlakaniphileyo na?

⁴ Ngubani okusize ukukutshela lezizinto? Ngumoya kabani ophuma kuwe na?

⁵ Izithunzi ziyathuthumela, amanzi kanye labahlala kuwo.

⁶ Indawo yabafileyo isikhamisile phambi kukaNkulunkulu, lendawo yokubhubha kayilasisibekelo.

⁷ Welulela inyakatho phezu kwendawo engelalutho, aphanyeke umhlaba phezu kweze.

⁸ Uyabophela amanzi emayezini akhe, lamayezi kawadabuki ngaphansi kwawo.

⁹ Uyasibekela inyanga, endlale iyezi lakhe phezu kwayo.

¹⁰ Umisile umkhawulo phezu kwamanzi, ekucineni kokukhanya lomnyama.

¹¹ Insika zezulu ziyathuthumela, zethuswa yikukhuza kwakhe.

¹² Ngamandla akhe wathulisa ulwandle, langokuqonda kwakhe wachitha uRahabi.

¹³ Ngomoya wakhe iphezulu liyacethula, lesandla sakhe siyagwaza inyoka ebalekayo.

¹⁴ Khangela, lokhu kungamaphethelo nje ezindlela zakhe; kuyilizwi lokunyenyeza nje elizwakalayo ngaye. Ngubani ongaqedisisa ukuduma kwamandla akhe na?