UJeremiya 46 - iBhayibhili Elingcwele 1978

Ilizwi ngeGibithe

¹ Nanti ilizwi leNkosi elafika kuJeremiya umprofethi ngezizwe.

² Mayelana leGibithe. Ngempi kaFaro Neko inkosi yaseGibithe, eyayingasemfuleni iYufrathi, eKarikemishi, ayinqobayo uNebukadineza inkosi yaseBabiloni ngomnyaka wesine wokubusa kukaJehoyakimi indodana kaJosiya, inkosi yakoJuda, ilizwi lathi:

³ Lungisani amahawu lezihlangu, liye empini.

⁴ Bophelani amabhiza, ligade lina bagadi bamabhiza. Lisuke lime, lithwele ingowane zenu, lilole imikhonto yenu, ligqoke amabhatshi enu ensimbi.

⁵ Ngibonani na? Sebephele amandla, babuyele emuva. Lamaqhawe abo ayahlulwa, ayabaleka, kawanyemukuli emuva; lokwesaba kunxa zonke, kutsho iNkosi.

⁶ Olejubane kalakubaleka, leqhawe kalilakuphunyuka; ngasenyakatho eceleni komfula iYufrathi bakhubekile, bawa.

⁷ Ngubani lo okhukhumala njengeNile, njengemifula elamanzi aqubukayo na?

⁸ IGibithe likhukhumala njengeNile, njengemifula elamanzi aqubukayo. Lithi: Ngizakhukhumala, ngiwusibekele umhlaba, ngichithe imizi kanye labahlala kiyo.

⁹ Qhubekelani phambili, lina mabhiza, liye phambili njengabahlanyayo, lina zinqola. Kawaphume amaqhawe, amadoda aseEtiyopiya lasePuti aphatha izihlangu, lamadoda aseLudi akwazi ukubamba umtshoki.

¹⁰ Lolosuku lusuku lweNkosi, uNkulunkulu wamabandla, losuku lokuphindisela ukuba iziphindisele ezitheni zayo. Umkhonto uzakudla usuthe, waneliswe ligazi labo. Ngoba iNkosi, uNkulunkulu wamabandla, izakwenza umhlatshelo elizweni lasenyakatho ngasemfuleni iYufrathi.

¹¹ Yana eGileyadi, uyedinga umuthi, wena Gibithe. Lokhu eyakho yonke iyize, ngoba kawusili.

¹² Izizwe zizwile ngehlazo lakho, lomhlaba ugcwele ukukhala kwakho; ngoba iqhawe likhutshwa ngelinye iqhawe, awele phansi womabili.

¹³ Ilizwi leNkosi eyalikhuluma kuJeremiya umprofethi ngokuza kukaNebukadineza inkosi yaseBabiloni ukuhlasela iGibithe, lathi:

¹⁴ Memezelani eGibithe, lizwakalise eMigidoli, limemeze eMemfisi laseTahafanesi, lithi: Sukumani, lime, lizilungiselele, ngoba umkhonto uzakudla inxa zonke zenu.

¹⁵ Ubalekeleni uApisi na? Kayimanga ngani linkunzi yakho na? Kungoba iNkosi yayilahla phansi.

¹⁶ Abanengi benu bakhubeka bawa, bakhulumisana besithi: Vukani, sibuyele ebantwini bakithi, laselizweni esazalelwa kilo, ngenxa yomkhonto womchithi.

¹⁷ Bizani uFaro inkosi yaseGibithe ngokuthi: Ngumsindo okhutha ithuba.

¹⁸ Ngizifunga mina uqobo, kutsho iNkosi, mina engiyiNkosi yamabandla. NjengeTabori phakathi kwezintaba lanjengeKarmeli phansi kolwandle uzafika othile.

¹⁹ Zilungiseleni umthwalo wokuthunjwa, lina baseGibithe. Ngoba iMemfisi izakuba yinkangala, lonxiwa olungahlalwa muntu.

²⁰ IGibithe lilithokazi elihle, kodwa isibawu esivela enyakatho sesifikile kulo.

²¹ Lamabutho alo aqatshiweyo akhona phakathi kwalo anjengamathole anonileyo; abuyela emuva, abaleka kanyekanye, kawemanga, ngoba usuku lokuhlupheka kwawo luwehlele, isikhathi sokutshwaywa kwawo.

²² Liyahotshoza njengenyoka ebalekayo; ngoba izitha zalo ziyeza ziyimpi, ziphethe amahloka njengabantu abagamulayo izihlahla.

²³ Zizagamula amahlathi alo, kutsho iNkosi, lanxa engangeneki, ngoba zinengi ukwedlula isikhongwane, kazilakubalwa.

²⁴ AmaGibithe azayangeka, azanikelwa ezandleni zabantu abavela enyakatho.

²⁵ INkosi yamabandla, uNkulunkulu kaIsrayeli, ithi: Ngizatshaya uAmoni waseThebesi, loFaro, leGibithe kanye labonkulunkulu babo, lamakhosi alo, yebo uFaro kanye labamthembayo.

²⁶ Ngizabanikela ezandleni zalabo ababazingelayo, esandleni sikaNebukadineza inkosi yaseBabiloni lezinduna zakhe, andubana iGibithe lakhiwe futhi njengasensukwini zasendulo, kutsho iNkosi.

²⁷ Kodwa ungesabi, wena Jakobe nceku yami, ungatshaywa luvalo, wena Israyeli, ngoba ngizakukukhulula usekhatshana, lenzalo yakho elizweni lokuthunjwa kwayo. UJakobe uzakubuya aphumule, ahlale kuhle, angethuswa muntu.

²⁸ Ungesabi, wena Jakobe nceku yami, kutsho iNkosi, ngoba ngilawe. Ngizachitha ngokupheleleyo zonke izizwe engikuxotshele kuzo, kodwa wena kangiyikukuqeda ngokupheleleyo. Ngizakukukhuza ngokufaneleyo, kangiyikukuyekela.