UJeremiya 42 - iBhayibhili Elingcwele 1978

Ilizwi likaJeremiya kuJohanani

¹ Zasezisondela zonke induna zempi, loJohanani indodana kaKareya, loAzariya indodana kaHoshaya, labo bonke abantu abancinyane labakhulu,

² bathi kuJeremiya umprofethi: Ake uzwe ukunxusa kwethu, usikhulekele eNkosini uNkulunkulu wakho, ukhulekele bonke laba abaseleyo, ngoba sisele siyingcosana nje kwabanengi, njengalokho lawe ubona,

³ ukuba iNkosi, uNkulunkulu wakho, isitshengise indlela esifanele ukuhamba ngayo, lalokho esifanele ukukwenza.

⁴ UJeremiya umprofethi wathi kibo: Sengilizwile; ngizakhuleka eNkosini uNkulunkulu wenu njengokucela kwenu, lalokho iNkosi ekutshoyo ngizalitshela khona, kangiyikuthula.

⁵ Basebesithi kuJeremiya: INkosi kayibe ngufakazi oqinisileyo lothembekileyo ngathi, uba singenzi njengelizwi leNkosi, uNkulunkulu wakho, elithuma kithi ngawe.

⁶ Loba kukuhle loba kukubi, sizalalela ilizwi leNkosi, uNkulunkulu wethu, esikuthuma kuyo, ukuze kusilungele lapho sililalela ilizwi leNkosi, uNkulunkulu wethu.

⁷ Kwathi ngemva kwensuku ezilitshumi, ilizwi leNkosi lafika kuJeremiya.

⁸ Wasebiza uJohanani indodana kaKareya, lazo zonke induna zempi ezazilaye, labantu bonke abancinyane labakhulu;

⁹ wathi kibo: INkosi, uNkulunkulu kaIsrayeli, elingithume kiyo ukuba ngilinxusele, ithi:

¹⁰ Uba lihlala kulelilizwe, ngizakulakha ngingalidilizi, ngiligxumeke, ngingalisiphuni; ngoba ngiyazisola ngokubi engikwenzileyo kini.

¹¹ Lingayesabi inkosi yaseBabiloni eliyesabayo, kutsho iNkosi; ngoba mina ngilani ukuba ngilisize ngilophule esandleni sayo.

¹² Ngizaliphatha ngomusa, ukuze ibe lomusa kini, iliyekele ukuba lihlale elizweni lakini.

¹³ Kodwa uba lisithi: Kasiyikuhlala kulelilizwe; lingalilaleli ilizwi leNkosi uNkulunkulu wenu,

¹⁴ lithi: Atshi bo! sizakuya elizweni laseGibithe lapho singayikubona impi khona, singayikuzwa ukukhala kophondo, singayikulamba, sihlale khona;

¹⁵ zwaninike ilizwi leNkosi, lina eliseleyo koJuda. INkosi yamabandla, uNkulunkulu kaIsrayeli, ithi: Uba lifisa ukuya eGibithe ukuba lihlale khona,

¹⁶ impi eliyesabayo izalifica khona elizweni laseGibithe, lendlala eliyesabayo izalilandela eGibithe, lifele khona.

¹⁷ Bonke abantu abafisa ukuya eGibithe ukuba bahlale khona bazabulawa yimpi layindlala langumkhuhlane, kungasali muntu aphunyuke kokubi engizabehlisela khona.

¹⁸ INkosi yamabandla, uNkulunkulu kaIsrayeli, ithi: Njengokuba ukuthukuthela kwami lolaka lwami kwehlela kwabakhileyo eJerusalema, ngokunjalo ulaka lwami luzakwehlela kini nxa lisiya eGibithe. Lizakuba yinto eyenyanyekayo leyesabekayo, into yokuthukwa lokuhlekwa, lingaphindi liyibone lindawo futhi.

¹⁹ INkosi ithe kini, lina abaseleyo koJuda: Lingayi eGibithe. Yazini impela ukuba ngilixwayisile lamuhla.

²⁰ Lizifake engozini ngokungithuma eNkosini, uNkulunkulu wenu, lisithi: Sikhulekele eNkosini uNkulunkulu wethu; lokho iNkosi uNkulunkulu wethu ekutshoyo, sizakukwenza.

²¹ Sengilitshelile lamhla, kodwa kalililalelanga ilizwi leNkosi uNkulunkulu wenu kukho konke engitshele khona ukuba ngilitshele.

²² Yazini impela ukuba lizakubulawa yimpi layindlala langumkhuhlane endaweni elifisa ukuyahlala kiyo.