UJeremiya 38 - iBhayibhili Elingcwele 1978

Ukukhutshwa kukaJeremiya emgodini

¹ UShefathiya indodana kaMathani, loGedaliya indodana kaPashuri, loJukali indodana kaShelemiya, loPashuri indodana kaMalikiya, bawezwa amazwi uJeremiya ayewakhuluma kubo bonke abantu esithi:

² INkosi ithi: Osala kulumuzi uzabulawa yimpi layindlala langumkhuhlane; kodwa ophuma aye kumaKaladiya uzasila, aphunyuke.

³ INkosi ithi: Lumuzi uzanikelwa impela esandleni sempi yenkosi yaseBabiloni, uthunjwe.

⁴ Izikhulu zasezisithi enkosini: Kabulawe lumuntu, ngoba wenza amabutho asele kulumuzi abe buthakathaka, kanye labantu bonke, ngokukhuluma kibo amazwi anje. Ngoba lumuntu kaphisekeli okuhle kwalababantu, kodwa uphisekela okubi.

⁵ Inkosi uZedekiya yathi: Nangu, usezandleni zenu, ngoba inkosi kayilamandla okwenza ulutho oluphambene lani.

⁶ Basebemthatha uJeremiya, bamphosela emgodini kaMalikiya indodana yenkosi, owawusegumeni labalindi, bamehlisela phakathi ngamagoda. Umgodi wawungelamanzi, kodwa wawugcwele udaka. UJeremiya watshona odakeni.

⁷ Kwathi uEbedimeleki umEtiyopiya umthenwa, owayesebenza esigodlweni, esizwa ukuthi bamphosele emgodini uJeremiya, inkosi yayihlezi ithetha amacala eSangweni lakoBenjamini,

⁸ uEbedimeleki waphuma esigodlweni waya enkosini,

⁹ wathi: Nkosi yami, abantu laba benzile okubi ngakho konke abakwenze kuJeremiya umprofethi, ngoba bamphosele emgodini, uzabulawa yindlala ngoba kakusekho ukudla emzini.

¹⁰ Ngakho inkosi yasimlaya uEbedimeleki umEtiyopiya, yathi: Thatha lapha abantu abathathu, limkhuphe uJeremiya umprofethi emgodini engakafi.

¹¹ Ngakho uEbedimeleki wathatha abantu, waya esigodlweni, endaweni lapho kulondolozwa khona izigqoko, wathatha khona ingubo ezindala lezigqoko ezidabukileyo, wazehlisela emgodini kuJeremiya ngamagoda.

¹² UEbedimeleki umEtiyopiya wathi kuJeremiya: Faka ingubo lezi lezigqoko emakhwapheni akho ngaphansi kwamagoda. UJeremiya wenza njalo.

¹³ Basebemdonsa uJeremiya ngamagoda, bamkhupha emgodini. UJeremiya wahlala egumeni labalindi.

UZedekiya uyelulekwa nguJeremiya

¹⁴ Inkosi uZedekiya wambiza uJeremiya umprofethi, wamamukela esangweni lesithathu lethempeli leNkosi. Yathi kuJeremiya: Ngizakukubuza umbuzo, ungangifihleli lutho.

¹⁵ UJeremiya wathi enkosini: Uba ngikutshela, kawuyikungibulala na? Loba ngikweluleka, kawuyikungilalela.

¹⁶ Inkosi uZedekiya yasifunga ekusithekeni kuJeremiya yathi: Ngifunga iNkosi eyenza imimoya yethu, kangiyikukubulala, futhi kangiyikukunikela ezandleni zabantu laba abafuna ukukubulala.

¹⁷ UJeremiya wasesithi kuZedekiya: INkosi, uNkulunkulu wamabandla, uNkulunkulu kaIsrayeli, ithi: Uba uzinikela kuzo izikhulu zenkosi yaseBabiloni uzakusila, lalumuzi kawuyikutshiswa ngomlilo, uzakusila wena lendlu yakho.

¹⁸ Kodwa uba ungazinikeli ezikhulwini zaseBabiloni, lumuzi uzathunjwa ngamaKaladiya, awutshise ngomlilo, lawe kawuyikuphunyuka ezandleni zawo.

¹⁹ Inkosi uZedekiya yathi kuJeremiya: Ngiyabesaba abaJuda ababalekele kumaKaladiya, funa nginikelwe ezandleni zabo, badlale ngami.

²⁰ UJeremiya wathi: Kawuyikunikelwa kubo; lalela ilizwi leNkosi ngalokho engikutsho kuwe, kuzakukulungela, futhi uzakusila.

²¹ Kodwa uba usala ukuzinikela, nanti ilizwi iNkosi engibonise lona lokuthi:

²² Bonke abesifazana abasele endlini yenkosi yakoJuda bazakhutshelwa ezikhulwini zenkosi yaseBabiloni, bathi: Abangane bakho abathembekileyo bakukhohlisile, bakwahlula; kodwa lapho inyawo zakho sezitshone odakeni, bazakubalekela.

²³ Abafazi bakho bonke lamadodana akho bazakukhutshelwa kumaKaladiya, lawe kawuyikuphunyuka ezandleni zawo, kodwa uzabanjwa yinkosi yaseBabiloni, lalumuzi utshiswe ngomlilo.

²⁴ UZedekiya wasesithi kuJeremiya: Kakungabi khona umuntu owaziyo lamazwi funa ubulawe.

²⁵ Nxa izikhulu zisizwa ukuba ngikhulume lawe, zize kuwe zithi: Ake usitshele ukuba ubusithini enkosini, lokuba inkosi itheni kuwe; ungasifihleli lutho, kasiyikukubulala;

²⁶ uzakuthi kuzo: Bengincenga inkosi ukuba ingangibuyiseli endlini kaJonathani ukuba ngifele khona.

²⁷ Zasezifika zonke izikhulu kuJeremiya, zambuza; yena waziphendula njengokutsho kwenkosi kuye. Zasezithula ukukhuluma laye, zasuka kuye, ngoba indaba yayingezwakali.

²⁸ UJeremiya wahlala egumeni labalindi kwaze kwaba lusuku lokuthunjwa kweJerusalema.