UJeremiya 37 - iBhayibhili Elingcwele 1978

UJeremiya ufakwa entolongweni

¹ UZedekiya indodana kaJosiya waba yinkosi esikhundleni sikaKoniya indodana kaJehoyakimi, wabekwa nguNebukadineza inkosi yaseBabiloni ukuba abuse elizweni lakoJuda.

² Kodwa yena lenceku zakhe labantu belizwe kabawalalelanga amazwi eNkosi eyayiwakhulume ngoJeremiya umprofethi.

³ Inkosi uZedekiya yathuma uJehukali indodana kaShelemiya loZefaniya umpristi indodana kaMahaseya kuJeremiya umprofethi, yathi: Ake usikhulekele eNkosini uNkulunkulu wethu.

⁴ UJeremiya wayesahamba phakathi kwabantu engakafakwa entolongweni.

⁵ Impi kaFaro yayisiphumile eGibithe; kwathi lapho amaKaladiya ayevimbezela iJerusalema ekuzwa lokho, asuka eJerusalema.

⁶ Ilizwi leNkosi lafika kuJeremiya umprofethi lathi:

⁷ INkosi, uNkulunkulu kaIsrayeli, ithi: Lizakuthi enkosini yakoJuda elithume ukubuza kimi: Khangela, impi kaFaro eze ukulisiza isizakubuyela eGibithe, elizweni layo.

⁸ AmaKaladiya azabuya, awuhlasele lumuzi, awuthumbe, awutshise ngomlilo.

⁹ INkosi ithi: Lingazikhohlisi ngokuthi: AmaKaladiya kawasayikubuya kithi. Ngoba azakubuya isibili.

¹⁰ Loba liyahlula impi yonke yamaKaladiya alwayo lani, kusale nje abantu abalimeleyo, bazasukuma bonke baphume emathenteni abo, bawutshise lumuzi ngomlilo.

¹¹ Kwathi lapho impi yamaKaladiya isisukile eJerusalema isizwile ukuthi impi kaFaro iyeza,

¹² uJeremiya wasephuma eJerusalema ukuya elizweni lakoBenjamini ukuba amukele isabelo sakhe selifa khona phakathi kwabantu.

¹³ Kwathi lapho eseSangweni lakoBenjamini, induna yabalindi ethiwa nguIrija indodana kaShelemiya, kaHananiya, wambamba uJeremiya umprofethi, wathi: Uyabalekela kumaKeladiya.

¹⁴ UJeremiya wathi: Kungamanga; kangibalekeli kumaKaladiya. Kodwa uIrija kazamlalela; wambamba uJeremiya, wamletha ezikhulwini.

¹⁵ Izikhulu zathukuthela ngoJeremiya, zamtshaya, zamfaka entolongweni, endlini kaJonathani umbhali, ngoba zaziyenze yaba yintolongo.

¹⁶ UJeremiya wafakwa endlini engumgodi, wahlala khona insuku ezinengi.

¹⁷ Inkosi uZedekiya yambiza, yamamukela. Yambuza ensitha endlini yayo yathi: Kambe likhona ilizwi elivela eNkosini na? UJeremiya wathi: Likhona. Uzakunikelwa esandleni senkosi yaseBabiloni.

¹⁸ UJeremiya wathi futhi kuZedekiya inkosi: Ngoneni kuwe lasezincekwini zakho lakulababantu ukuba lingifake entolongweni na?

¹⁹ Bangaphi abaprofethi benu abatshumayela kini besithi: Inkosi yaseBabiloni kayiyikufika ukulihlasela lina lalelilizwe?

²⁰ Zwanake, ngiyakuncenga wena nkosi, ake ulalele isikhalazo sami, ungangibuyiseli endlini kaJonathani umbhali, funa ngifele khona.

²¹ Ngakho inkosi uZedekiya waselaya ukuba bamfake uJeremiya egumeni labalindi, lokuba anikwe isinkwa sibe sinye insuku zonke esivela kubapheki bezinkwa, kwaze kwaphela zonke izinkwa emzini. Ngakho uJeremiya wahlala egumeni labalindi.