UJeremiya 34 - iBhayibhili Elingcwele 1978

UJeremiya uxwayisa uZedekiya

¹ Ilizwi leNkosi elafika kuJeremiya, lapho uNebukadineza inkosi yaseBabiloni layo yonke impi yakhe, lemibuso yonke yomhlaba eyayibuswa nguye, labo bonke abantu bakhe, babesilwa leJerusalema layo yonke imizi yalo,

² lathi: INkosi, uNkulunkulu kaIsrayeli, ithi: Hamba uyekuthi kuZedekiya inkosi yakoJuda: INkosi ithi: Khangela, ngizanikela lumuzi esandleni senkosi yaseBabiloni, izakuwutshisa ngomlilo.

³ Kawuyikuphunyuka esandleni sayo, kodwa uzabanjwa impela, unikelwe ezandleni zayo; uzabonana lenkosi yaseBabiloni, likhulumisane; futhi uzakuya eBabiloni.

⁴ Zwana ilizwi leNkosi, wena Zedekiya, nkosi yakoJuda. INkosi ithi ngawe: Kawuyikufela empini.

⁵ Kodwa uzakufa ngokuthula. Njengoba impepha yatshiselwa oyihlo, amakhosi ayephambi kwakho, ngokunjalo abantu bazakukutshisela lawe impepha, bakulilele lawe, bathi: Maye ngenkosi! Ngoba ngilitshilo lelolizwi, kutsho iNkosi.

⁶ UJeremiya umprofethi wasewakhuluma wonke lamazwi kuZedekiya inkosi yakoJuda eJerusalema,

⁷ lapho impi yenkosi yaseBabiloni ihlasela iJerusalema layo yonke imizi yakoJuda eyayisisele, iLakishi leAzeka: ngoba yiyo imizi ebiyelweyo eyakoJuda eyayisisele.

Mayelana lezigqili ezazingakhululwanga

⁸ Ilizwi elafika kuJeremiya livela eNkosini, emva kokuba uZedekiya inkosi esenzile isivumelwano labo bonke abantu eJerusalema ukubamemezela ukukhululeka,

⁹ ukuthi wonke umuntu akhulule izigqili zakhe ezingamaHeberu, ezesilisa lezesifazana, ukuba kungabi khona umuntu owenza umfowabo umHeberu abe yisigqili.

¹⁰ Bonke balalela, izikhulu zonke labantu bonke abenze lesosivumelwano sokuthi wonke umuntu akhulule isigqili sakhe lesigqilikazi sakhe ukuba zihambe, zingaphindi zenziwe zibe yizigqili futhi; balalela, bazikhulula.

¹¹ Kodwa emva kwalokho baphenduka, bazibuyisa izigqili lezigqilikazi zabo ababezikhulule, babuya bazenza zaba yizigqili futhi.

¹² Ilizwi leNkosi lafika kuJeremiya lisithi:

¹³ INkosi, uNkulunkulu kaIsrayeli, ithi: Mina ngenze isivumelwano lokhokho benu mhla ngabakhupha elizweni laseGibithe, endaweni yobugqili, ngathi:

¹⁴ Ekupheleni kweminyaka eyisikhombisa lonke lizakhulula izihlobo zenu amaHeberu ezithengiswe kini, zalisebenzela iminyaka eyisithupha, lizikhulule ekulisebenzeleni kwazo. Kodwa okhokho benu kabangilalelanga, kabangizwanga.

¹⁵ Linake seliphendukile lamhla, lenza okulungileyo emehlweni ami, lamemezela ukukhululeka kubomakhelwana benu, lenza isivumelwano phambi kwami endlini lapho ibizo lami lidunyiselwa khona;

¹⁶ kodwake seliphendukile futhi, lalingcolisa ibizo lami lapho ilowo lalowo wenu ebuyisa isigqili sakhe lesigqilikazi sakhe ebelizikhululile njengokufisa kwazo, lazibuyisa futhi, zaba yizigqili zenu.

¹⁷ Ngakhoke kutsho iNkosi: Kalingilalelanga, kalimemezelanga inkululeko, kube yilowo lalowo kumhlobo wakhe lakumakhelwana wakhe; khangelani, sengizavumela impi lomkhuhlane lendlala ukuba kulehlele. Ngizalenza libe yinto eyesabekayo kuyo yonke imibuso yomhlaba.

¹⁸ Abantu abaseqileyo isivumelwano sami, abangagcinanga amazwi esivumelwano ababesenze phambi kwami, ngizabenza babe njengethole lesivumelwano abalidabula kabili, badlula phakathi kwalo,

¹⁹ ngitsho izikhulu zakoJuda lezikhulu zeJerusalema, abathenwa labapristi, labo bonke abantu belizwe abadabula phakathi kwenhlangothi zethole.

²⁰ Ngizabanikela ezendleni zezitha zabo lezandleni zalabo abafuna ukubabulala. Izidumbu zabo zizakuba yikudla kwenyoni zaphezulu lenyamazana zeganga.

²¹ LoZedekiya inkosi yakoJuda lezikhulu zakhe ngizabanikela ezandleni zezitha zabo, lezandleni zalabo abafuna ukubabulala, lesandleni sempi yenkosi yaseBabiloni esisukile kini.

²² Khangelani, ngizakulaya, kutsho iNkosi, ngibabuyise kulumuzi; bazakulwa lawo, bawuthumbe, bawutshise ngomlilo, ngichithe imizi yakoJuda ibe yinkangala engelamuntu.