UJeremiya 33 - iBhayibhili Elingcwele 1978

Okuhle kuzabuyiswa eJerusalema

¹ Ilizwi leNkosi lafika kuJeremiya ngokwesibili, esavalelwe egumeni labalindi, lathi:

² INkosi eyenza umhlaba leyawubumba, yawumisa waqina, yona ethiwa yiNkosi, ithi:

³ Ngibiza, ngizakusabela, ngikutshele izinto ezinkulu ezifihlakeleyo ongazaziyo.

⁴ Ngoba iNkosi, uNkulunkulu wakoIsrayeli, ithi mayelana lezindlu zalumuzi langendlu yamakhosi akoJuda, ezidilizwe ukuba kwenziwe indawo yokuvika phambi kwamadundulu okuvimbezela laphambi kwempi:

⁵ AmaKaladiya azafika ukulwa, azigcwalise ngezidumbu zabantu engizababulala ekuthukutheleni kwami lasekufuthekeni kwami; ngoba lumuzi ngiwufihlele ubuso bami ngenxa yobubi babo bonke.

⁶ Kodwa ngizawulethela ukuphila lokusiliswa; ngizabasilisa abantu bawo, ngibatshengise ukuphumelela lokulondoloza kwami okunengi.

⁷ Ngizabuyisa abantu bakoJuda labakoIsrayeli, ngibamise babe njengakuqala,

⁸ ngibahlambulule kubo bonke ububi babo abona ngabo kimi, ngibathethelele isono sabo lobubi bokungihlamuka kwabo.

⁹ IJerusalema lizakuba libizo elingijabulisayo, udumo lwami lokuzincoma kwami, kuzo zonke izizwe zomhlaba ezizakuzwa ngokuhle konke engibenzela khona; zizakwesaba, zithuthumele ngokuhle konke langokuphumelela konke engibenzele khona.

¹⁰ INkosi ithi: Kulindawo elithi iyinkangala engelamuntu lenyamazana, emizini yakoJuda lasezindleleni zeJerusalema eziyinkangala engelamuntu lenyamazana, kuzakuzwakala futhi

¹¹ ilizwi lokuthaba lelizwi lokuthokoza, ilizwi lomyeni lelomlobokazi, lelizwi labahlabelayo lapho beletha iminikelo yabo yokubonga ethempelini lami besithi: Bongani iNkosi yamabandla, ngoba ilungile, ngoba uthando lwayo olungapheliyo lumi kuze kube nininini. Ngoba ngizabuyisa abantu belizwe babe njengakuqala, kutsho iNkosi.

¹² INkosi yamabandla ithi: Kuyona le indawo eyinkangala engelamuntu lenyamazana, lasemizini yonke yakhona, kuzakuba khona futhi imizi yabelusi abazaphuma kuyo lemihlambi yabo.

¹³ Emizini yasemaqaqeni leyaseShefela leyaseNegebi, laselizweni lakoBenjamini, ezindaweni eziseduze leJerusalema, lasemizini yakoJuda, izimvu zizabuya zidlule phambi kwalabo abazibalayo, kutsho iNkosi.

¹⁴ Insuku ziyeza, kutsho iNkosi, lapho ngizagcwalisa isithembiso engasenza endlini yakoIsrayeli lasendlini yakoJuda.

¹⁵ Ngalezonsuku langalesosikhathi ngizahlumisela uDavida uGatsha olulungileyo, oluzakwenza ukulunga lobuqotho elizweni.

¹⁶ Ngalezonsuku uJuda uzakhululwa, leJerusalema ivikeleke. Yileli ibizo elizabizwa ngalo elithi: INkosi ukulunga kwethu.

¹⁷ Ngoba iNkosi ithi: UDavida kayikuswela umuntu wokuhlala esihlalweni sobukhosi sendlu kaIsrayeli,

¹⁸ lakubapristi abangamaLevi kakuyikusweleka umuntu wokutshisa iminikelo yokutshiswa phambi kwami, lokutshisa iminikelo yempuphu, lokunikela imihlatshelo insuku zonke.

¹⁹ Ilizwi leNkosi lafika kuJeremiya lisithi:

²⁰ INkosi ithi: Uba lingasephula isivumelwano sami semini lesivumelwano sami sobusuku, ukuze kungabi khona imini lobusuku ngesikhathi sakho,

²¹ ng’khona lesivumelwano sami lenceku yami uDavida sizakwephulwa, ukuba angabi landodana yokubusa esihlalweni sakhe sobukhosi, lesivumelwano sami labapristi abangamaLevi abangikhonzayo sizakwaphulwa.

²² Njengoba inkanyezi zingabaleki, letshebetshebe lolwandle lingalinganiseki, ngokunjalo ngizakwandisa inzalo kaDavida inceku yami labapristi abangamaLevi abangikhonzayo.

²³ Ilizwi leNkosi lafika kuJeremiya lathi:

²⁴ Kawuqaphelisanga yini abakutshoyo lababantu ukuthi: INkosi izilahlile izindlu zombili ebizikhethile? Ngalokhoke babadelela abantu bami, babenza bangabe besaba yisizwe emehlweni abo.

²⁵ INkosi ithi: Uba ngingamisanga isivumelwano sami semini lesebusuku, lezimiso zami zezulu lomhlaba,

²⁶ ngizakulahla inzalo kaJakobe lenzalo kaDavida inceku yami, kangiyikukhetha omunye wenzalo yakhe ukuba abuse phezu kwenzalo kaAbrahama loIsaka loJakobe. Ngoba ngizabuyisa abantu babo, ngibe lesihawu kibo.