UJeremiya 31 - iBhayibhili Elingcwele 1978

¹ Ngalesosikhathi, kutsho iNkosi, ngizakuba nguNkulunkulu wemizi yonke yakoIsrayeli; bazakuba ngabantu bami.

² INkosi ithi: Abantu abasile empini bafumana umusa enkangala. UIsrayeli wathi edinga ukuphumula,

³ iNkosi yabonakala kuye ikhatshana. Ngikuthandile ngothando olungapheliyo, ngakhoke ngithembekile kuwe.

⁴ Ngizakubuya ngikwakhe, wakheke, wena ntombi Israyeli. Uzavunula, uthathe amachacho akho, ungene ekugideni kwabathokozayo.

⁵ Uzakulima izivini phezu kwezintaba zeSamariya; abahlanyeli bazahlanyela, badle izithelo zazo.

⁶ Ngoba luzakuba khona usuku lapho abalindi bezamemeza emaqaqeni akoEfrayimi, bathi: Sukani, siye eZiyone, eNkosini uNkulunkulu wethu.

⁷ Ngoba iNkosi ithi: Mhlabeleleni uJakobe ngokuthokoza, liyimemezele induna yezizwe; limemeze, lidumise lithi: INkosi yabakhulula abantu bayo abaseleyo koIsrayeli.

⁸ Khangelani, ngizabakhupha elizweni lasenyakatho, ngibabuthe emikhawulweni yomhlaba; phakathi kwabo kukhona iziphofu labaqhulayo, labesifazana abakhulelweyo kanye labahelelwayo, belixuku elikhulu bazabuya lapha.

⁹ Bazabuya bekhala, ngibaduduze ekubaholeni kwami, ngibalethe emifuleni yamanzi, ngendlela enhle abangayikukhubeka kuyo; ngoba nginguyise kuIsrayeli, uEfrayimi ulizibulo lami.

¹⁰ Zwanini ilizwi leNkosi, lina zizwe, lilizwakalise ezihlengeni ezikhatshana, lithi: Yena owachitha uIsrayeli uzakumbutha, amaluse njengomalusi eselusa umhlambi wakhe.

¹¹ Ngoba iNkosi imhlawulele uJakobe, yamhlenga kwabalamandla kulaye.

¹² Bazakuza bahlabele entabeni yaseZiyone, bazathokoza kakhulu ngokuhle kweNkosi, ngamabele lewayini, langamafutha, bathokoze ngamazinyane ezimvu, langamathole enkomo; ukuphila kwabo kube njengensimu ethelelwayo, bangabe besaba losizi futhi.

¹³ Kuzakuthi izintombi zithokoze ekusineni, amajaha labadala bajabule kanyekanye. Ngizaphendula ukukhala kwabo kube yikuthokoza, ngizakubaduduza, ngibanike ukuthokoza endaweni yosizi;

¹⁴ nginike abapristi ukudla okumnandi, labantu bami bazakholiswa yikulunga kwami, kutsho iNkosi.

¹⁵ INkosi ithi: Ilizwi liyezwakala eRama, ukulila lokukhala okubuhlungu. URaheli ukhalela abantwana bakhe, uyala ukududuzwa ngabantwana bakhe, ngoba bengasekho.

¹⁶ INkosi ithi: Thula, ungakhali, lamehlo akho angabi lezinyembezi; ngoba umsebenzi wakho uzakuba lomvuzo, bazabuya bevela elizweni lesitha, kutsho iNkosi.

¹⁷ Kuzakulunga esikhathini esizayo, kutsho iNkosi; abantwana bakho bazabuya elizweni lakibo.

¹⁸ Ngimzwile uEfrayimi ekhala esithi: Ungitshayile, ngatshaywa njengethole elingathambanga; ngibuyisa ukuze ngibuye, ngoba wena uyiNkosi uNkulunkulu wami.

¹⁹ Lapho sengiduhile ngaphenduka, lalapho sengilayiwe ngaba losizi olukhulu; ngaba lenhloni, ngadana, ngoba ngathwala ihlazo lobutsha bami.

²⁰ Kambe uEfrayimi uyindodana yami yini eligugu kimi, ungumntwana wami othandekayo na? Ngoba lapho ngikhuluma ngokubi ngaye, ngiyamkhumbula. Ngakho inhliziyo yami iyamlangatha; impela ngizakuba lesihawu kuye, kutsho iNkosi.

²¹ Zimisele izitshengiso, uzimiscle iziqondiso zendlela, uqaphelise kakhulu indlela, umgwaqo owahamba ngawo. Buya, wena ntombi Israyeli, ubuyele emizini yakini.

²² Koze kube nini uzilazila, wena ndodakazi engathembekanga na? INkosi idale into entsha emhlabeni, owesifazana uvukela indoda.

²³ INkosi yamabandla, uNkulunkulu kaIsrayeli, ithi: Bazabuya batsho lamazwi elizweni lakoJuda lasemizini yakhona, lapho sengibabuyisile abantu bakibo bathi: INkosi ikubusise, wena khaya lokulunga, lawe ntaba engcwele.

²⁴ UJuda layo yonke imizi yakhe izahlala khona, abalimi labahamba lemihlambi yabo.

²⁵ Ngizabanelisa bonke abakhatheleyo, ngiqinise labo bonke abasosizini.

²⁶ Ngasengiphaphama, ngakhangela; ubuthongo bami babumnandi kimi.

²⁷ Khangela, insuku ziyeza, kutsho iNkosi, lapho ngizahlanyela indlu kaIsrayeli lendlu kaJuda ngenhlanyelo yabantu lenhlanyelo yenyamazana.

²⁸ Kuzakuthi njengalokho ngibalindile ukuba ngisiphune lokuba ngidilize lokuba ngichithe lokuba ngibhubhise, ngilethe okubi, ngokunjaloke sengizakubalinda ukuba ngakhe, ngihlanyele, kutsho iNkosi.

²⁹ Ngalezonsuku kabasayikutsho ukuthi: Oyise badlile izithelo zevini ezimunyu, amazinyo abantwana asetshelela.

³⁰ Kodwa wonke umuntu uzakufa ngobubi bakhe; wonke umuntu odla izithelo zevini ezimunyu, ngawakhe amazinyo azatshelela.

Isivumelwano esitsha

³¹ Khangela, insuku ziyeza, kutsho iNkosi, lapho ngizakwenza isivumelwano esitsha lendlu kaIsrayeli lendlu kaJuda,

³² esingenjengesivumelwano engasenza lokhokho babo mhla ngibabamba ngesandla sami ukubakhupha elizweni laseGibithe, ngitsho isivumelwano sami abasaphulayo, lanxa ngangiyiNkosi yabo, kutsho iNkosi.

³³ Yilesi isivumelwano engizakusenza lendlu kaIsrayeli emva kwalezonsuku, kutsho iNkosi. Ngizafaka umlayo wami emibilinini yabo, ngiwulobe enhliziyweni zabo, ngibe nguNkulunkulu wabo, labo babe ngabantu bami.

³⁴ Kabasayikufundisana kube yilowo lalowo lomakhelwana wakhe, lalowo lalowo lomfowabo esithi: Yazi iNkosi! Ngoba bazangazi bonke, kusukela komncinyane wabo kuze kufike komkhulu, kutsho iNkosi. Ngizathethelela ububi babo, lesono sabo kangisayikusikhumbula.

³⁵ INkosi enika ilanga libe yikukhanya emini, emise inyanga lezinkanyezi zibe yikukhanya ebusuku, evusa ulwandle ukuba kuhlokome amavinqo alo, ebizwa ngokuthi yiNkosi yamabandla, ithi:

³⁶ Uba ukumiswa kwalezizinto kungasuka phambi kwami, kutsho iNkosi, lenzalo yakoIsrayeli izakuphela, ingabe isaba yisizwe phambi kwami kuze kube nininini.

³⁷ INkosi ithi: Uba iphezulu lingalinganiswa, lomhlaba phansi ungahlolwa, ng’khona mina ngingayilahla yonke inzalo yakoIsrayeli ngakho konke abakwenzileyo.

³⁸ INkosi ithi: Insuku ziyeza lapho umuzi weNkosi uzakwakhiwa, kusukela eMphotshongweni kaHananeli kuze kufike eSangweni leNgonsi.

³⁹ Lentambo yokulinganisa izasuka ize iyefika oqaqeni lwaseGarebi, iphenduke lapho iye eGowa.

⁴⁰ Sonke isihotsha sezidumbu lesomlotha, lawo wonke amasimu kuze kufike esifuleni seKidroni, kuze kufike engonsini yeSango leBhiza ngasempumalanga, kuzakuba yindawo engcwele yeNkosi. Kakusayikusitshunwa, kudilizwe futhi, kuze kube nininini.