UJeremiya 28 - iBhayibhili Elingcwele 1978

UHananiya utshumayela amanga

¹ Kwathi kulowomnyaka, ekuqaleni kokubusa kukaZedekiya inkosi yakoJuda, ngenyanga yesihlanu yomnyaka wesine, uHananiya indodana kaAzuri, umprofethi ovela eGibeyoni, wathi kimi ethempelini phambi kwabapristi labantu bonke:

² INkosi yamabandla, uNkulunkulu kaIsrayeli, ithi: Ngilephulile ijogwe lenkosi yaseBabiloni.

³ Ingakapheli iminyaka emibili ngizabuyisela kulindawo izitsha zonke zethempeli, ezathathwa nguNebukadineza inkosi yaseBabiloni kulindawo, wazisa eBabiloni.

⁴ Ngibuyise kulindawo futhi uJekoniya indodana kaJehoyakimi, inkosi yakoJuda, labo bonke abathunjwayo koJuda basiwa eBabiloni, ngoba ngizalephula ijogwe lenkosi yaseBabiloni, kutsho iNkosi.

⁵ Umprofethi uJeremiya wasekhuluma kumprofethi uHananiya phambi kwabapristi laphambi kwabantu bonke ababemi ethempelini,

⁶ esithi: Kungathi kungaba njalo! Kungathi iNkosi ingenza njalo, yenze ukuba amazwi owatshumayelayo agcwaliseke, ibuyise kulindawo izitsha zethempeli, labo bonke abathunjelwa eBabiloni.

⁷ Kanti zwana lelilizwi engilikhuluma kuwe laphambi kwalababantu.

⁸ Abaprofethi ababephambi kwakho lababephambi kwami, kusukela endulo, batshumayela ngempi, langendlala, langomkhuhlane, emazweni amanengi lasemibusweni emikhulu.

⁹ Kodwa lowomprofethi otshumayela ngokuthula, lapho seligcwalisekile ilizwi lakhe, kuzabonakala ukuthi ungumprofethi othunywe yiNkosi sibili.

¹⁰ Umprofethi uHananiya waselisusa ijogwe entanyweni yomprofethi uJeremiya, walaphula.

¹¹ UHananiya wakhuluma phambi kwabantu bonke esithi: INkosi ithi: Ngokunjalo ngizalaphula ijogwe likaNebukadineza inkosi yaseBabiloni entanyeni yezizwe zonke, ingakapheli iminyaka emibili. UJeremiya umprofethi wasesuka ehamba.

¹² Laselifika ilizwi leNkosi kuJeremiya, uHananiya umprofethi eselaphulile ijogwe entanyeni yomprofethi uJeremiya, lathi:

¹³ Hamba, utsho kuHananiya uthi: INkosi ithi: Wena wephule amajogwe esihlahla, kodwa mina ngizakwenza endaweni yawo amajogwe ensimbi.

¹⁴ Ngoba iNkosi yamabandla, uNkulunkulu kaIsrayeli, ithi: Ngigaxile ijogwe lensimbi entanyeni yazo zonke lezizizwe ukuba zisebenzele uNebukadineza inkosi yaseBabiloni, futhi zizamsebenzela, ngoba ngimnikile lenyamazana zeganga.

¹⁵ Umprofethi uJeremiya wasesithi kumprofethi uHananiya: Zwana, Hananiya, iNkosi kayikuthumanga, kodwa wenze lababantu ukuba bathembe amanga.

¹⁶ Ngakho iNkosi ithi: Khangela, ngizakukususa emhlabeni; ngawona lo umnyaka nje uzakufa, ngoba utshumayele ukuhlamuka eNkosini.

¹⁷ Wafa uHananiya umprofethi ngawona lowomnyaka ngenyanga yesikhombisa.