UJeremiya 23 - iBhayibhili Elingcwele 1978

Ukubuya kwabaseleyo

¹ Maye kubo abelusi abachitha behlakaza izimvu zomhlambi wami! kutsho iNkosi.

² Ngalokho iNkosi, uNkulunkulu kaIsrayeli, ithi mayelana labelusi abelusa abantu bayo: Liwuhlakazile umhlambi wami, lawuxotsha, kaliwalusanga. Khangelani, ngizakwehlisela phezu kwenu umvuzo wezenzo zenu ezimbi, kutsho iNkosi.

³ Ngizabutha eziseleyo emhlambini wami kuwo wonke amazwe lapho ngizixotshele khona, ngizibuyise futhi esibayeni sazo, zizazala, zande.

⁴ Ngizakuzimisela abelusi abazakuzilondoloza; kazisayikwesaba, zitshaywe luvalo; futhi kakusayikulahleka leyodwa yazo, kutsho iNkosi.

⁵ Khangela, insuku ziyeza, kutsho iNkosi, lapho ngizamhlumisela uDavida uGatsha olulungileyo; luzakubusa njengenkosi, lube lokuhlakanipha, lwenze ukulunga lobuqotho elizweni.

⁶ Ensukwini zalo uJuda uzakhululwa, loIsrayeli ahlale evikelekile. Nanti ibizo oluzabizwa ngalo: INkosi ukulunga kwethu.

⁷ Ngakhoke insuku ziyeza, kutsho iNkosi, lapho abantu bengasayikutsho ukuthi: Ngifunga iNkosi eyabakhupha abantu bakoIsrayeli eGibithe.

⁸ Kodwa bazakuthi: Ngifunga iNkosi eyakhupha yakhokela inzalo yendlu kaIsrayeli elizweni lasenyakatho lakuwo wonke amazwe eyayiyixotshele kuwo. Ng’khona izahlala elizweni lakibo.

Abapristi bamanga

⁹ Ngabaprofethi. Inhliziyo yami yephukile phakathi kwami, lamathambo ami wonke ayathuthumela; nginjengomuntu odakiweyo, lanjengomuntu owehlulwe liwayini, ngenxa yeNkosi, langenxa yamazwi ayo angcwele.

¹⁰ Ngoba ilizwe ligcwele izifebe; ngenxa yesiqalekiso seNkosi ilizwe liyakhala, lamadlelo enkangala omile. Indlela yabo yimbi, lamandla abo kawalunganga.

¹¹ Umprofethi lompristi kabamesabi uNkulunkulu, ngitsho lasendlini yami ngifumene ububi babo, kutsho iNkosi.

¹² Ngalokhoke indlela yabo izakuba njengezindlela ezitshelelayo emnyameni, abazakusunduzelwa kizo, bawe; ngoba ngizabalethela okubi ngomnyaka wokutshaywa kwabo, kutsho iNkosi.

¹³ Kubaprofethi baseSamariya ngibone into eyenyanyekayo; batshumayela ngoBali, baduhisa abantu bami uIsrayeli.

¹⁴ Kubaprofethi baseJerusalema ngibone okwesabekayo; bayafeba, baqambe amanga, baqinisa izandla zalabo abenza okubi kungasuki muntu ebubini bakhe; bonke sebefana leSodoma kimi, labakhileyo khona bafana leGomora.

¹⁵ Ngakho iNkosi yamabandla ithi mayelana labaprofethi: Khangela, ngizabanika ukuba badle umhlonyane, ngibanathise amanzi abulalayo; ngoba kusukela kubaprofethi baseJerusalema ububi buphumele kilo lonke ilizwe.

¹⁶ INkosi yamabandla ithi: Lingawalaleli amazwi abaprofethi abawatshumayela kini belithembisa okuyize, bekhuluma imibono yengqondo zabo, kungesikho okuvela eNkosini.

¹⁷ Bahlala besithi kulabo abadelela ilizwi leNkosi: Kuzalilungela lonke; lakubo bonke abalandela inhliziyo zabo ezilenkani bathi: Kaliyikwehlelwa ngokubi.

¹⁸ Ngubani phakathi kwabo owayekhona emhlanganweni weNkosi ukuba alalele alizwe ilizwi layo na? Ngubani owake waliqaphela walizwa na?

¹⁹ Khangelani, ulaka lweNkosi lunjengesivunguzane, luphumile, lunjengesiphepha esivunguzayo, luzakwehlela phezu kwababi.

²⁰ Ulaka lweNkosi kaluyikudeda, ize iphelelise izifiso zenhliziyo yayo. Ensukwini zokucina lizakukuqedisisa lokhu.

²¹ Kangibathumanga mina abaprofethi, kanti bagijima; kangikhulumanga kibo, kodwa batshumayela.

²² Kodwa uba babekhona emhlanganweni wami, ngabe batshumayela amazwi ami ebantwini bami, babanqande ezindleleni zabo ezimbi lasezenzweni ezimbi.

²³ NginguNkulunkulu eduze kuphela yini, kangisuye uNkulunkulu lakhatshana na? kutsho iNkosi.

²⁴ Umuntu angacatsha endaweni ezisithekileyo ukuze ngingamboni na? kutsho iNkosi. Angithi ngigcwele izulu lomhlaba na?

²⁵ Ngizwile ukuba batheni abaprofethi abatshumayela amanga ebizweni lami besithi: Ngiphuphile, ngiphuphile!

²⁶ Koze kube nini amanga ekhona enhliziyweni zabaprofethi abatshumayela amanga, betshumayela inkohliso zenhliziyo zabo,

²⁷ abacabanga ukwenza abantu bami ukuba bakhohlwe ibizo lami ngamaphupho abo abawaxoxayo, njengaboyise abalikhohlwayo ilizwi lami ngenxa kaBali?

²⁸ Umprofethi olephupho kalixoxe iphupho lakhe, kodwa olelizwi lami kalikhulume ilizwi lami ngeqiniso. Amakhoba ayini kulamabele ne? kutsho iNkosi.

²⁹ Ilizwi lami kalinjengomlilo yini lanjengesando esiqhekeza ilitshe na? kutsho iNkosi.

³⁰ Ngakho ngimelana labaprofethi abeba amazwi ami kwabanye, kutsho iNkosi.

³¹ Ngimelana labaprofethi abasebenzisa inlimi zabo besithi iNkosi itsho lokhu lalokhu.

³² Ngimelana lalabo abaxoxa amaphupho amanga, baduhise abantu bami ngamanga abo langokuwalazela kwabo, ngingabathumanga, ngabalaya; ngakho kababasizi ngalutho lababantu, kutsho iNkosi.

³³ Lapho omunye walababantu loba umprofethi ingabe umpristi ekubuza esithi: Iyini indaba yeNkosi na? Wena uzakuthi kibo: Yini eliyindaba, lokuthi ngizalilahla, kutsho iNkosi.

³⁴ Umprofethi lompristi loba omunye wabantu othi: Indaba yeNkosi; ngizamtshaya lowomuntu kanye lendlu yakhe.

³⁵ Lizakhulumisana ngalindlela, umakhelwana lomakhelwana, lomfowabo kumfowabo, lithi: INkosi iphendule yathini na? lokuthi: Itheni iNkosi?

³⁶ Kodwa ukuthi: Indaba yeNkosi; kalisayikukutsho lokhu. Ngoba umuntu otsho njalo impela kuzakuba yindaba kuye, ngoba liwahlanekela amazwi kaNkulunkulu ophilayo, amazwi eNkosi yamabandla, uNkulunkulu wethu.

³⁷ Nansi indlela yokukhuluma lomprofethi, lithi: INkosi iphendule yathini? loba: INkosi itheni?

³⁸ Kodwa uba lisithi: Indaba yeNkosi; iNkosi ithi: Uba lokhu lisebenzisa amazwi okuthi indaba yeNkosi, loba sengilitshelile ukuyekela ukutsho njalo,

³⁹ mina uqobo ngizalihluthuna, ngiliphosele khatshana lami, lina kanye lomuzi engawunika lina lokhokho benu,

⁴⁰ ngilehlisele ihlazo elingapheliyo lokuyangeka okungayikukhohlakala.