UJeremiya 22 - iBhayibhili Elingcwele 1978

¹ INkosi ithi: Hamba uye endlini yenkosi yakoJuda, ukhulume khona lelilizwi,

² uthi: Zwana ilizwi leNkosi, wena nkosi yakoJuda, ohlezi esihlalweni sobukhosi sikaDavida, lezinceku zakho labantu bakho abangena ngalamasango.

³ INkosi ithi: Yenzani okuqotho lokulungileyo, likhulule esandleni somcindezeli lowo ophangiweyo, lingenzi okubi kowezizwe, lakuzo izintandane, lakumfelwakazi, lingachithi igazi elingelacala kulindawo.

⁴ Ngoba uba lililalela lelilizwi isibili, kuzangena ngamasango alindlu amakhosi ahlezi esihlalweni sobukhosi sikaDavida, ekhwele izinqola, egade amabhiza, wona lezinceku zawo kanye labantu bawo.

⁵ Kodwa uba lingawalaleli lamazwi, ngiyazifunga mina uqobo, kutsho iNkosi, ukuba lindlu izakuba lunxiwa.

⁶ Ngoba iNkosi ithi mayelana lendlu yenkosi yakoJuda: Wena ufana leGileyadi kimi lengqonga yaseLebanoni, kodwa impela ngizakukwenza ube njengenkangala, ube njengomuzi ongahlalwa muntu.

⁷ Ngizakukulethela abachithi, bonke bephethe amahloka; bazagamula izihlahla zenu zomkusu ezinhle, baziphosele emlilweni.

⁸ Abezizwe abanengi bazadlula kulumuzi, babuzane bathi: INkosi yenzeleni okunje kulumuzi omkhulu na?

⁹ Impendulo izakuthi: Kungoba basidela isivumelwano seNkosi, uNkulunkulu wabo, bakhonza abanye onkulunkulu, babasebenzela.

¹⁰ Lingamkhaleli uJosiya ofileyo, lingamlileli, kodwa khalelani kakhulu uShaluma ohambileyo, ngoba kasayikubuya alibone futhi ilizwe lakibo.

¹¹ Ngoba iNkosi ithi mayelana loShaluma indodana kaJosiya, inkosi yakoJuda, owabusa esikhundleni sikaJosiya uyise, wasuka kulindawo: Yena kasayikuphinda abuye lapha futhi,

¹² kodwa kuleyondawo athunjelwe kuyo uzakufela khona, kasayikuphinda alibone lelilizwe futhi.

¹³ Maye kulowo owakha indlu yakhe ngokungalungi, lezitezi zakhe ngokungafanelanga, owenza umakhelwana wakhe amsebenzele ngeze, angamholisi,

¹⁴ othi: Ngizazakhela indlu enkulu elezitezi ezibanzi; ayenzele amawindi, ayibhade ngamapulanka omkusu, ayicombe ngokubomvu.

¹⁵ Ukwakha ngemikusu yikho okukwenza ube yinkosi na? Angithi uyihlo wadla wanatha njengawe, kodwa wenza okulungileyo lokuqotho na? Ngakho kwamlungela.

¹⁶ Wayethonisa izindaba zabayanga labaswelayo; kwamlungela. Angithi yikho lokhu ukungazi mina na? kutsho iNkosi.

¹⁷ Kodwa wena, amehlo akho lenhliziyo yakho kusekuphangeni kuphela, lasekuchitheni igazi elingelacala, lasekucindezeleni lekwenzeni okubi.

¹⁸ Ngakhoke iNkosi ithi mayelana loJehoyakimi indodana kaJosiya, inkosi yakoJuda: Kabayikumkhalela ngokuthi: Hawu mfowethu! Kabayikumkhalela bathi: Hawu nkosi! loba: Hawu mhlekazi!

¹⁹ Uzangcwatshwa njengobabhemi; uzahudulwa, alahlwe ngaphandle kwamasango eJerusalema.

²⁰ Khwela eLebanoni, umemeze, wena Jerusalema, uphakamise ilizwi lakho eBashani, umemeze useAbarimi, ngoba zonke izithandwa zakho zibhujisiwe.

²¹ Ngakhuluma lawe uselenhlanhla, kodwa wena wathi: Kangiyikulalela. Lokho kuyindlela yakho kusukela ebutsheni bakho, ukuba ungalilaleli ilizwi lami.

²² Umoya uzaphephula bonke abelusi bakho, lezithandwa zakho zizathunjwa: ng’khonake uzakuba lenhloni, udane, ngenxa yobubi bakho bonke.

²³ Wena ohlala eLebanoni, owakhe isidleke sakho phakathi kwemikusu, yeka ukukhala kwakho mhla uzakwehlelwa yibuhlungu, ubuhlungu obunjengobowesifazana obelethayo.

²⁴ Ngiyazifunga mina, kutsho iNkosi, loba uKoniya indodana kaJehoyakimi, inkosi yakoJuda, ebeyindandatho esandleni sami sokunene, bengizakukuhluthula, ngikukhuphe,

²⁵ ngikunikele ezandleni zalabo abakuzingelayo, labo obesabayo, ngitsho esandleni sikaNebukadineza inkosi yaseBabiloni lakumaKaladiya,

²⁶ ngikuphosele kanye lonyoko kwelinye ilizwe ongazalelwanga kilo, ufele khona.

²⁷ Kodwa elizweni abafisa ukubuyela kilo kabayikubuyela.

²⁸ Lumuntu uKoniya uyimbiza efileyo lesitsha esingananzwa muntu na? Uphoselelwani yena labantwana bakhe kwelinye ilizwe abangalaziyo na?

²⁹ Wena lizwe, lizwe, zwana ilizwi leNkosi.

³⁰ INkosi ithi: Lobani ukuthi lumuntu kalabantwana, umuntu ongayikuphumelela ensukwini zakhe; ngoba kakho loyedwa enzalweni yakhe ozahlala esihlalweni sobukhosi sikaDavida, abuse futhi koJuda.