UJeremiya 11 - iBhayibhili Elingcwele 1978

UJeremiya lesivumelwano

¹ Ilizwi leNkosi elafika kuJeremiya lathi:

² Zwana amazwi alesisivumelwano, ukhulume ebantwini bakoJuda labaseJerusalema.

³ Uthi kibo: INkosi, uNkulunkulu kaIsrayeli, ithi: Uqalekisiwe umuntu ongalaleli amazwi alesisivumelwano,

⁴ engalaya ngawo okhokho benu lapho ngibakhupha elizweni laseGibithe, esithandweni sokuncibilikisa insimbi, ngathi: Lalelani ilizwi lami, lenze konke engilitshela khona, libe ngabantu bami, lami ngibe nguNkulunkulu wenu,

⁵ ukuba ngigcwalise isifungo engasifunga kubokhokho benu ukubanika ilizwe eligcwele uchago lenyosi, njengoba kunjalo lalamhla. Ngasengiphendula ngisithi: Yebo, Nkosi.

⁶ INkosi yathi kimi: Tshumayela wonke lamazwi emizini yakoJuda lasezindleleni zaseJerusalema, uthi: Zwanini amazwi alesisivumelwano, liwagcine.

⁷ Ngoba ngabalayisisa okhokho benu ekubakhupheni kwami eGibithe, ngisalilaya lalamhla ngisithi: Lalelani ilizwi lami.

⁸ Kodwa kabezwanga, kabalalelanga; kodwa benza kwaba yilowo lalowo ngokwenkani yenhliziyo yakhe. Ngasengisehlisela phezu kwabo wonke lamazwi alesisivumelwano engabalaya ukuwagcina, kodwa kabawagcinanga.

⁹ INkosi yabuya yathi kimi: Kukhona ukuhlamuka phakathi kwabantu bakoJuda labakhileyo eJerusalema.

¹⁰ Sebebuyele ebubini babokhokho babo abala ukuzwa ilizwi lami; balandela abanye onkulunkulu ukuba babakhonze; indlu yakoIsrayeli leyakoJuda zisaphulile isivumelwano sami engasenza lokhokho babo.

¹¹ Ngakhoke ngizabehlisela okubi, kabayikukuphepha; lanxa bekhala kimi, kangiyikubalalela, kutsho iNkosi.

¹² Imizi yakoJuda labaseJerusalema bangahamba bayekhala kubonkulunkulu ababatshisela impepha, kodwa kabayikubasiza ngesikhathi sokuhlupheka kwabo.

¹³ Ngoba onkulunkulu bakho banengi njengemizi yakho, wena Juda, lamaaltare owakhele into elehlazo manengi njengezindlela zeJerusalema amaaltare okutshisela uBali impepha.

¹⁴ Ngakhoke ungabakhulekeli lababantu, ungaphakamisi ilizwi lakho ukuba ubakhulekele, ngoba kangiyikubalalela mhla bekhale kimi ngesikhathi sokuhlupheka kwabo.

¹⁵ Othandekayo wami ufunani endlini yami lokhu wenza okubi na? Izifungo lenyama yemihlatshelo kungakuvikela yini ekuhluphekeni okuzayo na? Ungathokoza ngakho na?

¹⁶ INkosi yake yakubiza ngokuthi: Uyisihlahla seoliva esiluhlaza, esilezithelo ezinhle; kodwa ngomdumo wesiphepha esikhulu izakusithungela ngomlilo lengatsha zaso zitshiswe.

¹⁷ INkosi yamabandla eyakuhlanyelayo ikhulumile okubi ngawe, ngenxa yobubi obenziwe yindlu yakoIsrayeli leyakoJuda, bangicunula ngokutshisela uBali impepha.

Icebo lokubulala uJeremiya

¹⁸ INkosi yangitshengisa, lami ngakwazi. Wena wangitshengisa izenzo zabo ezimbi.

¹⁹ Kodwa mina nganginjengewundlu elasiwa ekuhlatshweni. Ngangingazi ukuba benza amacebo amabi ngami besithi: Asisiqume isihlahla sisemanzi; asimsuse elizweni labaphilayo, lebizo lakhe lingabe lisaziwa.

²⁰ Kodwe, Nkosi yamabandla, owahlulela ngokulunga, ohlolayo inhliziyo lengqondo, kangibone ukuphindisela kwakho kibo, ngoba nginikele indaba yami kuwe.

²¹ Ngakhoke iNkosi ithi ngabantu baseAnathothi abafuna ukuphila kwakho besithi: Ungatshumayeli ngebizo leNkosi funa sikubulale;

²² iNkosi yamabandla ithi: Ngizabatshaya; insizwa zabo zizabulawa empini, amadodana lamadodakazi abo abulawe yindlala;

²³ kakuyikusala muntu; ngoba ngizabehlisela okubi abantu baseAnathothi ngomnyaka wokutshaywa kwabo.