UHezekhiyeli 27 - iBhayibhili Elingcwele 1978

Isililo ngeTire

¹ Ilizwi leNkosi lafika kimi lathi:

² Wena ndoda, khala isililo ngeTire,

³ uthi kilo iTire elimi ngasokhunjini lolwandle, elithengisayo ebantwini emazweni amanengi angasolwandle, iNkosi uNkulunkulu ithi: Wena Tire, utshilo ukuthi: Ngiphelele ngobuhle.

⁴ Imikhawulo yakho iphakathi kolwandle, labakhi bakho benza ubuhle bakho buphelele.

⁵ Benza wonke amapulanka akho ngezihlahla zephane ezivela eSeniri; bathatha umkusu ovela eLebanoni ukukwenzela insika.

⁶ Langezihlahla ezinkulu zaseBashani bakwenzela amaphini okugwedla; benza izitezi zakho ngezihlahla zomnondo ezivela ngasezinkunjini zaseKuprosi, bazendlala ngempondo zendlovu.

⁷ Isayili lakho lenziwa ngelembu elihle lelicecisiweyo elivela eGibithe, elaba luphawu lwakho, lethente lakho lenziwa ngelembu eliluhlaza leliyibubende elivela ezihlengeni zaseElisha.

⁸ Abakhileyo eSidoni laseArvadi babengabagwedli bakho; izihlakaniphi ezazikuwe, wena Tire, zaba ngabaqondisi bakho.

⁹ Abadala baseGebali lezihlakaniphi zalo zakhona, zinameka izimfa zakho; imikolo yonke yasolwandle labatshayeli bayo yeza kuwe ukuthenga impahla yakho.

¹⁰ Amadoda asePerisiya lawaseLudi lawasePuti ayesempini yakho elibutho lakho; aphanyeka izihlangu zawo lengowane zawo kuwe, akunika udumo.

¹¹ Amadoda aseArvadi lawaseKilikhiya ayephezu kwemiduli yakho ekuhanqile, lamadoda aseGamadi ayesezinqabeni zakho; aphanyeka izihlangu zawo emidulini yakho inxa zonke, enza ubuhle bakho buphelele.

¹² ITarshishi lathengiselana lawe ngenxa yobunengi benotho yakho yenhlobo zonke, benana impahla yakho ngesiliva langensimbi langomnuso.

¹³ IJavani leTubali leMesheki zathengiselana lawe, zenana impahla yakho ngabantu uqobo, langezitsha zethusi.

¹⁴ IBeti‐Togarima yenana impahla yakho ngamabhiza, langamabhiza empi, langezimbongolo.

¹⁵ Abantu baseRodesi bathengiselana lawe, lamazwe amanengi angasolwandle ayezindawo zakho zokuthengisela; bakuhlawula ngempondo zendlovu, langesihlahla esithiwa yieboni.

¹⁶ IEdoma lathengiselana lawe ngenxa yempahla zakho ezinengi benana impahla zakho ngamatshe athiwa ngama‐emeraldi, langokuyibubende, langomsebenzi ocecisiweyo, langelembu elihle, langamatshe athiwa yikorali leagate.

¹⁷ UJuda lelizwe lakoIsrayeli bathengiselana lawe, benana impahla zakho ngamabele aseMinithi, langempuphu, langenyosi, langamafutha, langamakha.

¹⁸ IDamaseko lathengiselana lawe ngenxa yobunengi bempahla zakho langenxa yenotho yakho enkulu yenhlobo zonke, benana impahla zakho ngewayini laseHeliboni langoboya obumhlophe,

¹⁹ langewayini elivela eUzali, langensimbi ekhandiweyo, langekasiya langekalamu; konke lokhu benanisa ngakho.

²⁰ IDedani lathengiselana lawe ngamalembu amahle ezihlalo zokugada.

²¹ IArabiya lazo zonke izikhulu zaseKedari babengabathengi bakho abathandekayo, bethengiselana lawe ngamawundlu langezinqama langezimbuzi.

²² Abathengi baseSheba leRama bathengiselana lawe, benana impahla zakho ngenhlobo zonke ezinhle zamakha, langamatshe wonke amahle, langegolide.

²³ IHarani leKane leEdeni, labathengi baseAshuri, leKilimadi, bathengiselana lawe.

²⁴ Laba bathengiselana lawe ngezambatho ezinhle, langamalembu aluhlaza, langomsebenzi ocecisiweyo, langamacansi amibalabala, elukwe ngentambo, aqina; bathengiselana lawe ngakho konke lokhu.

²⁵ Imikolo emikhulu yakuthwalela impahla zakho. Waba njengomkolo ogcwele usindwa kakhulu enzikini zolwandle.

²⁶ Abagwedli bakho bakukhuphelela emanzini amanengi. Umoya wasempumalanga usukwephulele enzikini zolwandle.

²⁷ Inotho yakho lempahla yakho, lalokho okuthengisayo, labatshayeli bakho, labaqondisi bakho, labavimbi bezimfa zakho, labathengi bakho, lawo wonke amadoda empi akhona kuwe, ixuku lonke eliphakathi kwakho, lizatshona enzikini zolwandle ngosuku lokuchitheka kwakho.

²⁸ Ngelizwi lokukhala kwabaqondisi bakho ilizwe lonke liyathuthumela.

²⁹ Lapho bonke abagwedli besehla emikolweni yabo, lalapho abatshayeli labaqondisi bekhuphukela okhunjini kanyekanye,

³⁰ bayahlaba umkhosi, bekukhalela kakhulu; bathela uthuli emakhanda abo, bazibhuqe emlotheni,

³¹ baziphuce amakhanda, bagqoke izambatho zokulila, bakukhalele kakhulu, bakhale ngokukhala okubuhlungu.

³² Ekukhaleni kwabo bayalila ngawe, bathi: Ngubani owayenjengeTire elizigqajayo elizingelezelwe lulwandle na?

³³ Ekuphumeni kwempahla yakho olwandle, wanelisa abantu abanengi; ngenotho enengi langempahla yakho wanothisa amakhosi omhlaba.

³⁴ Khathesi usuwaphulwe lulwandle enzikini zamanzi; impahla yakho labo bonke abasebenza kuwe kutshone kanye lawe.

³⁵ Bonke abakhileyo emazweni angasolwandle bayamangala ngawe, lamakhosi abo ayesaba kakhulu, lobuso bawo bunyukumele.

³⁶ Abathengi phakathi kwabantu bayakuncifela. Usuchitheke kubi, kawusayikuba khona kuze kube nininini.