UHezekhiyeli 25 - iBhayibhili Elingcwele 1978

Ilizwi leNkosi ngamaAmoni

¹ Ilizwi leNkosi lafika kimi lathi:

² Ndoda, khangela kumaAmoni, utshumayele ngawo.

³ Uthi kuwo: Zwanini ilizwi leNkosi uNkulunkulu; ithi: Ngoba lathi: Iya! nxa libona indlu yami engcwele ingcoliswa, lelizwe lakoIsrayeli lichitheka, loJuda ethunjwa,

⁴ ngalokho ngizalinikela ebantwini basempumalanga ukuba balibuse; bazamisa izihonqo zabo phakathi kwenu, benze imizi yabo phakathi kwenu; bazakudla izithelo zenu, banathe lochago lwenu.

⁵ Ngizakwenza iRaba libe lidlelo lamakamela, lemizi yamaAmoni ibe yisibaya semihlambi. Ng’khona lizakwazi ukuthi ngiyiNkosi.

⁶ INkosi uNkulunkulu ithi: Ngoba uqakezile izandla zakho, wagida ngenyawo zakho, wathokoza ugcwele umona ngelizwe lakoIsrayeli,

⁷ ngalokho ngizakukuphakamisela isandla sami, ngikunikele ube yimpango yezizwe, ngikukhuphe ezizweni, ngikuqede kuwo wonke amazwe, ngikuchithe nya. Ng’khona uzakwazi ukuba ngiyiNkosi.

Ilizwi leNkosi ngeMowabi

⁸ INkosi uNkulunkulu ithi: Ngoba iMowabi lathi: UJuda uyafana nje lazo zonke ezinye izizwe;

⁹ ngalokho ngizachaya umkhawulo waseMowabi ukuba imizi esemngceleni eligugu lelizwe inqotshwe, iBeti‐Jeshimothi, leBali‐Meyoni, leKiriyathayimi.

¹⁰ Ngizanikela iMowabi lamaAmoni ebantwini basempumalanga ukuwabusa, ukuba amaAmoni angabe esakhunjulwa futhi phakathi kwezizwe,

¹¹ ngilithonisise iMowabi. Ng’khona bazakwazi ukuba ngiyiNkosi.

Ilizwi leNkosi ngeEdoma

¹² INkosi uNkulunkulu ithi: Ngoba iEdoma liphindisele koJuda, lonile kakhulu ngokuphindisela kwalo,

¹³ ngalokho iNkosi uNkulunkulu ithi: Ngizaphakamisela isandla sami ngakilo iEdoma, ngiqede kilo abantu lezinyamazana, ngilenze libe yinkangala; kusukela eTemani kuze kufike eDedani bazabulawa yimpi.

¹⁴ Ngizaphindisela kulo iEdoma ngesandla sabantu bami uIsrayeli, benze kilo okufanele ukuthukuthela kwami lolaka lwami; bazakwazi impindiselo yami, kutsho iNkosi uNkulunkulu.

Ilizwi leNkosi ngamaFilistiya

¹⁵ INkosi uNkulunkulu ithi: Ngoba amaFilistiya ephindisele, aphindisela ezitheni ngolunya langenzondo engapheliyo, bazama ngamandla wonke ukuzichitha,

¹⁶ ngalokho, kutsho iNkosi uNkulunkulu, ngizaphakamisela isandla sami ngakuwo amaFilistiya, ngichithe abaseKerethi, ngibhubhise labo bonke abangasolwandle.

¹⁷ Ngizabaphindisela ngokwesabekayo, ngibatshaye ekuthukutheleni kwami; lapho sengiphindisela, bazakwazi ukuba ngiyiNkosi.