UHezekhiyeli 21 - iBhayibhili Elingcwele 1978

Umkhonto weNkosi

¹ Ilizwi leNkosi lafika kimi lathi:

² Ndoda, khangela ngaseJerusalema, utshumayele ngezindawo zakhona ezingcwele, utshumayele ngelizwe lakoIsrayeli,

³ uthi kilo: INkosi ithi: Ngimelene lawe, ngizahwatsha umkhonto wami esambeni sawo, ngibhubhise kuwe abalungileyo lababi.

⁴ Njengoba ngizaqeda kuwe abalungileyo lababi, umkhonto wami uzahwatshelwa bonke abantu, kusukela eningizimu kuze kufike enyakatho.

⁵ Bonke abantu bazakwazi ukuba mina Nkosi ngiwuhwatshile umkhonto wami esambeni sawo, kawusayikubuyiselwa kuso futhi.

⁶ Bubula, ndoda, ububule ngenhliziyo edabukileyo langosizi olukhulu phambi kwabo.

⁷ Nxa besithi kuwe: Ububulelani na? wena uthi: Kungenxa yezindaba ezizayo. Lapho sezifikile, zonke inhliziyo zizagcwala ukwesaba, lezandla zibe buthakathaka, lemimoya yonke ihlupheke, lamadolo wonke atshayane. Nanzoke, sezifikile, zizagcwaliseka, kutsho iNkosi uNkulunkulu.

⁸ Ilizwi leNkosi lafika kimi lathi:

⁹ Ndoda, tshumayela amazwi eNkosi, uthi: Umkhonto, umkhonto uloliwe, wabuya walolongwa,

¹⁰ ulolelwe ukubulala, walolongelwa ukuphazima njengombane. Intonga iyagwetshwa, ndodana yami, ukudelela zonke izithombe zesigodo.

¹¹ Umkhonto unikelwe ukulolongwa ukuba uphathwe, uyalolwa ulolongwe ukunikelwa esandleni sombulali.

¹² Khala ulile, ndoda, ngoba lumkhonto ngowokulwa labantu bami, ngowokulwa lazo zonke izikhulu zakoIsrayeli; zinikelwe kuwo kanye labantu bami. Ngakho tshaya isifuba sakho ngenxa yosizi,

¹³ ngoba kuyikuhlolwa — phoke, kuzakuba njani uba kungesiyo sibili intonga yokudelela na? kutsho iNkosi uNkulunkulu.

¹⁴ Tshumayela, wena ndoda, uqakeze izandla zakho, umkhonto uzagwaza kabili lakathathu, ungumkhonto wokubulala, umkhonto wokubulawa okukhulu obahanqayo,

¹⁵ ukuba inhliziyo zabo zigcwale ukwesaba. Sengibasongela ngomkhonto emasangweni abo wonke, umkhonto okhazimulayo njengombane, walolongelwa ukubulala.

¹⁶ Wena mkhonto, gwaza ngakwesokunene langakwesokhohlo, lalapho ungaqonda khona.

¹⁷ Lami ngizaqakeza izandla zami, ngiphelelise ukufutheka kwami. Mina Nkosi, sengikhulumile.

¹⁸ Ilizwi leNkosi lafika kimi futhi lathi:

¹⁹ Ndoda, dweba indlela ezimbili zokufika kwenkosi yaseBabiloni, ilomkhonto wayo, zombili zisuke elizweni linye. Umise isiqondiso sendlela, usimise ekuhlanganeni kwezindlela.

²⁰ Dweba indlela yokufika kwayo eRaba elakoAmoni lakoJuda laseJerusalema elibiyelweyo.

²¹ Ngoba inkosi yaseBabiloni isimi ekwahlukaneni kwendlela, ekuhlanganeni kwendlela ezimbili, ukuvumisa khona; ikhahlazisa imitshoko, ibuza izithombe ezithiwa ngamaterafi, ihlole izibindi zomhlatshelo.

²² Umtshoko wokuvumisa obhalwe ukuthi iJerusalema uwele ngakwesokunene sayo; kulapho okufanele imemeze khona, ihlabe umkhosi wempi, imise izigodo zokudiliza amasango, lamadundulu okuvimbezela, yakhe lezinqaba.

²³ Ebantwini kuzakhanya kuyikuvumisa kwamanga, kanti kuzangikhumbuza izenzo zabo ezimbi, bazawela ezandleni zezitha zabo.

²⁴ Ngakhoke iNkosi uNkulunkulu ithi: Ngoba lingikhumbuze ukona kwenu ngokubeka obala iziphambeko zenu, ukuze kuvele izono zenu ekwenzeni kwenu konke, langoba selikhunjulwa, lizatshaywa ngenxa yazo.

²⁵ Wenake, sikhulu sakoIsrayeli oyisixhwali esibi, usuku lwakho selufikile, isikhathi sokutshaywa kwakho kokucina;

²⁶ iNkosi uNkulunkulu ithi: Susa iqhiye lakho, wethule umqhele; izinto kaziyikuhlala zinjalo. Phakamisa labo abehliselwe phansi, wehlisele phansi abaphakanyisiweyo.

²⁷ Ukuchitheka, ukuchitheka, ngizaletha ukuchitheka emzini okungazanga kube khona ngaphambili, kuze kufike umuntu onguye okhethiweyo ukuba awuthonisise.

²⁸ Wena, ndoda, tshumayela uthi: INkosi uNkulunkulu ithi ngamaAmoni ahleka uIsrayeli: Umkhonto, umkhonto usuhwatshelwe ukubulala, walolongwa ukuba ukhazimule, uphazime njengombane.

²⁹ — usabona imibono yamanga, uvumise amanga — ubekwe ezintanyeni zezixhwali ezimbi, ezilensuku esezifikile, isikhathi sokutshaywa kwazo kokucina.

³⁰ Ubuyisele endaweni yawo. Endaweni lapha wadalelwa khona, elizweni owadabuka kilo, ngizakukuthonisisa khona;

³¹ ngehlisele ukuthukuthela kwami phezu kwakho, ngikuthungele ngomlilo wolaka lwami, ngikunikele ezandleni zabantu abalolunya, abakwaziyo ukubulala.

³² Uzakuba zinkuni zomlilo, legazi lakho lichithekele phakathi kwezizwe, ungabe usakhunjulwa; ngoba mina Nkosi ngikhulumile.