UHezekhiyeli 15 - iBhayibhili Elingcwele 1978

IJerusalema linjengevini elingelazithelo

¹ Ilizwi leNkosi lafika kimi lathi:

² Ndoda, isihlahla sevini sedlula ngani ezinye, singcono kulogatsha lwesinye isihlahla eguswini na?

³ Kuyazuzakala isigodo kiso esifanele ukwenza ulutho olusizayo na? Abantu bangenza isikhonkwane ngaso, balengise izinto kiso na?

⁴ Uba sibaswa emlilweni, lezihloko zaso zitshiswe ngumlilo, kuhaqazeke umzaca waso, singenza ulutho olusizayo na?

⁵ Sisaphelele sasingasetshenziswa lutho; pho, lapho umlilo ususitshisile sesihaqazekile, singabe sisasetshenziswa na?

⁶ Ngakho iNkosi uNkulunkulu ithi: Njengenkuni zevini ezihlahleni zegusu engizenze zaba zinkuni zomlilo, ngokunjaloke ngizaphatha abakhileyo eJerusalema.

⁷ Ngizamelana labo; lanxa bephunyuka emlilweni, umlilo uzabaqeda; lizakwazi ukuba ngiyiNkosi, nxa sengimelana labo.

⁸ Ngizalenza ilizwe libe yinkangala, ngoba bangidelile; kutsho iNkosi uNkulunkulu.