UGenesisi 50 - iBhayibhili Elingcwele 1978

Ukumbelwa kukaJakobe

¹ UJosefa waziwisela phezu kukayise, wakhalela phezu kwakhe; wamanga.

² UJosefa waselaya inceku zakhe izinyanga ukuba zilungise isidumbu sikayise ngomuthi wokusilondoloza; izinyanga zasilungisa isidumbu sikaIsrayeli.

³ Zaphelela insuku ezingamatshumi amane, insuku zokulungiswa kwesidumbu. AmaGibithe amkhalela insuku ezingamatshumi ayisikhombisa.

⁴ Sezidlulile insuku zokumkhalela, uJosefa wakhuluma labendlu kuFaro wathi: Uba ngifumene umusa emehlweni enu, ake lingikhulumele kuFaro,

⁵ lithi: Ubaba wangifungisa wathi: Khangela, ngiyafa; ungingcwabe elibeni engazimbela lona elizweni laseKanani. Ngakhoke ngicela ukuba ngihambe ngiyelahla ubaba, besengibuya futhi.

⁶ UFaro wathi: Hamba uyelahla uyihlo njengokukufungisa kwakhe.

⁷ UJosefa wasekhuphuka ukuba ammbele uyise, kwakhuphuka kanye laye zonke inceku zikaFaro, izikhulu zendlu yakhe, lazo zonke izikhulu zelizwe laseGibithe,

⁸ lendlu yonke kaJosefa, labafowabo, lendlu kayise; kodwa abantwana babo lezimvu zabo lenkomo zabo bakutshiya elizweni laseGosheni.

⁹ Kwakhuphuka laye izinqola labagadi bamabhiza, kwaba lixuku elikhulu.

¹⁰ Baye bafika esizeni seAtadi eliphetsheya kweJordani; basebekhala kakhulukazi belosizi olukhulu, bamlilela uyise insuku eziyisikhombisa.

¹¹ Kwathi abakhileyo kulelolizwe, amaKanani, bebona ukulila esizeni seAtadi bathi: Lesi yisililo esikhulu samaGibithe. Ngakhoke basebeyibiza indawo ngokuthi yiAbeli‐Mizirayimi eliphetsheya kweJordani.

¹² Amadodana akhe amenzela njengalokhu ewalayile;

¹³ ngoba amthwalela elizweni laseKanani, amngcwaba obhalwini lwaseMakaphela, oluseduze leMamre, uAbrahama aluthenga kanye lensimu kuEfroni umHethi, ukuba lube yindawo yokungcwabela.

¹⁴ UJosefa esemmbele uyise wasebuyela eGibithe labafowabo labo bonke abakhuphuka laye ukuyambela uyise.

¹⁵ Abafowabo bakaJosefa sebebonile ukuthi uyise usefile bathi: Mhlawumbe uJosefa uzasizonda, asiphindisele ngokubi konke esakwenza kuye.

¹⁶ Bathumela ilizwi kuJosefa bathi: Uyihlo wasilaya engakafi

¹⁷ wathi: Lizakutsho lokhu kuJosefa lithi: Akuxolele abafowenu isiphambeko sabo lesono sabo sokuthi bakwenzela okubi; khathesi siyakucela, akuxolele isiphambeko sezinceku zikaNkulunkulu kayihlo. UJosefa wakhala nxa bekhuluma laye.

¹⁸ Labafowabo baya kuye, bawela phansi phambi kwakhe bathi: Khangela, siyizinceku zakho.

¹⁹ Kodwa uJosefa wathi kibo: Lingesabi, kanti ngisendaweni kaNkulunkulu na?

²⁰ Lina laceba ukwenza okubi kimi, kodwa uNkulunkulu wakuphendula kwaba ngokuhle, njengalokhu kunjalo lamuhla, ukuba asilise abantu abanengi.

²¹ Ngakhoke lingesabi; ngizakulondla lina labantwana benu. Wabaduduza, wakhuluma labo ngomusa.

Ukufa kukaJosefa

²² UJosefa wahlala eGibithe, yena lendlu kayise. UJosefa wahamba iminyaka elikhulu letshumi.

²³ UJosefa wabona abantwana bakaEfrayimi abesizukulwana sesithathu; labantwana bakaMakiri indodana kaManase bazalwa babekwa emathangazini kaJosefa.

²⁴ UJosefa wasesithi kubafowabo: Sengizakufa, kodwa uNkulunkulu uzalihambela impela, alikhuphe kulelilizwe alise elizweni alifungela oAbrahama loIsaka loJakobe.

²⁵ UJosefa wafungisa amadodana kaIsrayeli esithi: UNkulunkulu uzalihambela impela, lithuthe amathambo ami lapha.

²⁶ UJosefa wafa eleminyaka elikhulu letshumi; balungisa isidumbu sakhe ngomuthi, wafakwa ebhokisini eGibithe.