UGenesisi 45 - iBhayibhili Elingcwele 1978

UJosefa uyaziveza kubafowabo

¹ UJosefa wasesahluleka ukuzibamba phambi kwabo ababelaye. Wamemeza wathi: Khuphani bonke abantu. Kwakungaselamuntu lapho uJosefa eziveza kubafowabo.

² Wakhala kakhulu aze ezwa amaGibithe labendlu kaFaro.

³ UJosefa wathi kubafowabo: NginguJosefa. Ubaba usekhona na? Abafowabo kabaze bamphendula ngoba bethukile kakhulu phambi kwakhe.

⁴ UJosefa wasesithi kubafowabo: Sondelani kimi. Basondelake. Wathi: Mina nginguJosefa umfowenu elamthengisa eGibithe.

⁵ Lingadabuki, lingazithukutheleli ngokuthi langithengisa lapha, ngoba uNkulunkulu wangithuma ngaphambi kwenu ukuba ngilihlenge.

⁶ Ngoba isimibili iminyaka kukhona indlala elizweni; kusasele iminyaka emihlanu ezayo okungayikulinywa kuvunwe ngayo.

⁷ UNkulunkulu wangithuma ngaphambi kwenu ukulilondoloza, libe lenzalo emhlabeni, alisilise libe banengi.

⁸ Ngakho kakusini elangithumela lapha, kodwa nguNkulunkulu; wangenza ngaba nguyise kuFaro, lenkosi yendlu yakhe yonke, lombusi phezu kwelizwe lonke laseGibithe.

⁹ Phangisani liye kubaba, lithi kuye: Indodana yakho uJosefa ithi: UNkulunkulu ungenzile inkosi yalo lonke iGibithe; suka uze kimi, ungaphuzi;

¹⁰ uzakwakha elizweni laseGosheni, ube seduze lami wena labantwana bakho labazukulu bakho, lezimvu zakho lezinkomo zakho, konke olakho.

¹¹ Mina ngizakukondla lapho, lokhu kusasele iminyaka emihlanu yendlala, ukuba ungasweli wena labendlu yakho lakho konke olakho.

¹² Khangelani, amehlo enu lamehlo omfowethu uBenjamini ayabona ukuthi yiwo umlomo wami okhuluma lani.

¹³ Mtsheleni ubaba ngodumo lwami eGibithe langakho konke elikubonileyo, liphangise limlethe lapha.

¹⁴ Wasemgona umfowabo uBenjamini, wakhala; laye uBenjamini wakhala emgona.

¹⁵ Wabanga bonke abafowabo, wakhalela phezu kwabo. Emva kwalokhu abafowabo baxoxa laye.

¹⁶ Lezizinto zezwakala endlini kaFaro, kwathiwa abafowabo bakaJosefa bafikile; uFaro lenceku zakhe zathokoza ngalokhu.

¹⁷ UFaro wasesithi kuJosefa: Tshela abafowenu uthi: Yenzani lokhu, yethwesani obabhemi benu, lihambe liye elizweni laseKanani,

¹⁸ lithathe uyihlo lemizi yenu, libuye kimi; ngizalinika izinto ezinhle eziselizweni laseGibithe, lidle okumnandi kwelizwe.

¹⁹ Usulayiwe, Josefa, ukuba uthi: Yenzani lokhu, thathelani abantwana benu labomkenu izinqola elizweni laseGibithe, lize lapha loyihlo.

²⁰ Futhi lingakhathaleli impahla yenu, ngoba okuhle okuselizweni lonke laseGibithe kungokwenu.

²¹ Enza njalo amadodana kaIsrayeli; uJosefa wawanika izinqola njengokulaya kukaFaro, wabanika umphako.

²² Wabanika bonke, kwaba yilowo lalowo ingubo ezintsha; kodwa uBenjamini wamnika inhlamvu zesiliva ezingamakhulu amathathu, lengubo ezinhlanu ezintsha.

²³ Wathumela kuyise obabhemi abalitshumi bethwele izinto ezinhle ezivela eGibithe, kanye labobabhemikazi abalitshumi bethwele amabele lezinkwa lomphako kayise.

²⁴ Wasebayekela behamba abafowabo. Wathi kibo: Qaphelani ukuba lingaxabani endleleni.

²⁵ Bakhuphuka eGibithe, bafika kuyise uJakobe elizweni laseKanani.

²⁶ Bamtshela bathi: UJosefa usasila, ungumbusi elizweni lonke laseGibithe. Inhliziyo yakhe yasiphela amandla, ngoba wayengabakholwa.

²⁷ Basebemtshela wonke amazwi uJosefa ayewatshilo kibo. Kwathi esezibonile izinqola uJosefa ayezithume zokumthwala, watshaphuluka umoya kaJakobe uyise.

²⁸ UIsrayeli wathi: Kwanele, uJosefa indodana yami usekhona; ngizahamba ngimbone ngingakafi.