UGenesisi 35 - iBhayibhili Elingcwele 1978

UNkulunkulu ubusisa uJakobe eBetheli

¹ UNkulunkulu wasesithi kuJakobe: Suka, uye eBetheli, uhlale khona; umenzele ialtare uNkulunkulu owabonakala kuwe mhla ubalekela uEsawu umnewenu.

² UJakobe wathi kubo abendlu yakhe lakubo bonke ababelaye: Khuphani izithombe zabonkulunkulu bezizwe eziphakathi kwenu, lizihlambulule lina, lintshintshe izambatho zenu.

³ Asisuke sikhuphukele eBetheli, ngimenzele khona uNkulunkulu ialtare owangiphendula mhla ngihlupheka, waba lami endleleni engahamba kuyo.

⁴ Basebemnika uJakobe zonke izithombe zabonkulunkulu bezizwe ababelazo, lamacici ayesezindlebeni zabo; uJakobe wakufihla ngaphansi kwesihlahla esikhulu esasingaseShekema.

⁵ Basebehambake; ukumesaba uNkulunkulu okukhulu kwehlela emizini yakhona; abantu bemizi kabaxotshananga lamadodana kaJakobe.

⁶ UJakobe wafika eLuzi, eliliBetheli eliselizweni laseKanani, yena labantu bonke ababelaye.

⁷ Wakha khona ialtare, wayibiza indawo ngokuthi yiEliBetheli, ngoba uNkulunkulu wabonakala kuye khona mhla ebalekela umnewabo.

⁸ UDebora umlizane kaRebeka wafa, wambelwa eduze leBetheli ngaphansi kwesihlahla esikhulu, ngakho sabizwa ngokuthi yiAloni‐Bakuthi.

⁹ UNkulunkulu wabuya wabonakala kuJakobe esevela ePadani‐Arama, wambusisa.

¹⁰ UNkulunkulu wathi kuye: Ibizo lakho linguJakobe, kodwa kalisayikuthiwa nguJakobe; ibizo lakho lizakuba nguIsrayeli. Wambiza wathi nguIsrayeli.

¹¹ UNkulunkulu wathi kuye: NginguNkulunkulu uSomandla; zala wande; kuzakuvela kuwe isizwe, yebo ibandla lezizwe; amakhosi azazalwa nguwe.

¹² Ilizwe engalinika uAbrahama loIsaka ngizalinika wena, lenzalo yakho emva kwakho ngiyinike lona.

¹³ UNkulunkulu wenyuka esuka kuye lapho abekhuluma laye khona.

¹⁴ UJakobe wasemisa insika yokukhonzela lapho abekhuluma laye khona, insika yelitshe. Wathela phezu kwayo umnikelo wokuthululwa, wathela lamagcobo phezu kwayo.

¹⁵ UJakobe wabiza indawo lapho uNkulunkulu akhuluma laye khona ngokuthi yiBetheli.

Ukufa kukaRaheli

¹⁶ Basebesuka eBetheli: kwathi kusesengummango ukuya eEfrathi, uRaheli wahelelwa, wabeletha kanzima.

¹⁷ Kwathi esabeletha, umbelethisi wathi kuye: Ungesabi, ngoba khathesi uzakuba lenye indodana.

¹⁸ Kwathi umphefumulo wakhe usuzakuphuma kuye, ngoba esesifa, wayitha ibizo wathi nguBenoni; kodwa uyise wayibiza ngokuthi nguBenjamini.

¹⁹ URaheli wafa, wambelwa endleleni eya eEfrathi, eliliBetlehema.

²⁰ UJakobe wamisa insika phezu kweliba lakhe; yona iyiNsika yeliba likaRaheli kuze kube lamhla.

²¹ UIsrayeli wasuka, wamisa ithente lakhe ngaphambi komphotshonga waseEderi.

²² Kwathi uIsrayeli esehlala kulelolizwe, uRubeni waya walala loBiliha umfazi omncinyane kayise; uIsrayeli wakuzwa lokhu. Amadodana kaJakobe ayelitshumi lambili;

Amadodana kaJakobe lokufa kukaIsaka

²³ amadodana kaLeya ayengoRubeni, izibulo likaJakobe, loSimeyoni loLevi loJuda loIsakari loZebuluni;

²⁴ amadodana kaRaheli ayengoJosefa loBenjamini;

²⁵ amadodana kaBiliha, incekukazi kaRaheli, ayengoDani loNafitali;

²⁶ amadodana kaZilipa, incekukazi kaLeya, ayengoGadi loAsheri; lawo ngamadodana kaJakobe azalelwa ePadani‐Arama.

²⁷ UJakobe wasefika kuIsaka uyise eMamre, eKiriyathi‐Arba, eliliHebroni, lapho bake bahlala khona oAbrahama loIsaka.

²⁸ Iminyaka yokuhamba kukaIsaka yayilikhulu lamatshumi aficaminwembili.

²⁹ UIsaka wafa, wambelwa kwabakibo eseluphele eleminyaka eminengi; uEsawu loJakobe amadodana akhe bammbela.