UGenesisi 34 - iBhayibhili Elingcwele 1978

UDina woniwa nguShekema

¹ UDina indodakazi kaLeya, ayizalela uJakobe, waphuma ukuyabona abesifazana balelolizwe.

² UShekema indodana kaHamori umHivi, inkosi yelizwe, wambona, wambamba, walala laye, wamona.

³ Inhliziyo yakhe yabambelela kuDina indodakazi kaJakobe, wayithanda intombi, wasezikhombisela yona.

⁴ UShekema wasekhuluma loyise uHamori esithi: Ngicelela lintombi ibe ngumkami.

⁵ UJakobe wezwa ukuthi usemonile uDina indodakazi yakhe; amadodana akhe ayesegangeni esezinkomeni, uJakobe wathula aze afika.

⁶ UHamori uyise kaShekema waya kuJakobe ukuba akhulumisane laye.

⁷ Amadodana kaJakobe afika evela egangeni esezwile lokhu; adabuka, athukuthela kakhulu ngoba uShekema enze ihlazo koIsrayeli ngokulala lendodakazi kaJakobe, into engafanele ukwenziwa.

⁸ UHamori wakhulumisana labo esithi: Inhliziyo yendodana yami uShekema iyayithanda indodakazi yakho; ngakho akumnike yona ibe ngumkakhe.

⁹ Yendiselanani lathi lisiphe amadodakazi enu, lani lithathe amadodakazi ethu.

¹⁰ Yakhani phakathi kwethu, ilizwe lizakuba ngelenu; yakhani lithengiselane, lifuye kulo.

¹¹ UShekema wasesithi kuyise wentombi lakubanewabo: Ake ngifumane umusa kini; lokho elizakukutsho kimi ngizakukwenza.

¹² Bizani kimi amalobolo lesipho loba kungakanani, ngizalipha njengokutsho kwenu kimi; kodwa ngiphani intombi ibe ngumkami.

¹³ Amadodana kaJakobe aphendula uShekema loHamori uyise ngobuqili, ngenxa yokuthi ubesemonile uDina udadewabo,

¹⁴ athi kubo: Asilakuwenza lokho, ukunika udadewethu umuntu ongasokwanga, ngoba lokho kulihlazo kithi.

¹⁵ Kodwa singalivumela ngalokhu kodwa, uba bonke abesilisa bakini besokwa, libe njengathi,

¹⁶ sizalinika amadodakazi ethu, lathi sithathe amadodakazi enu, sakhelane lani sibe yisizwe sinye.

¹⁷ Kodwa uba lingasilaleli lisokwe, sizathatha indodakazi yethu, sihambe.

¹⁸ Lamazwi abo aba mahle kuHamori loShekema indodana yakhe.

¹⁹ Insizwa kayiphuzanga ukwenza lokhu ngoba yayiyithanda indodakazi kaJakobe; yayilodumo kulabo bonke abendlu kayise.

²⁰ UHamori loShekema indodana yakhe bafika esangweni lomuzi wabo, bakhulumisana lamadoda omuzi wabo,

²¹ bathi: Lamadoda ahlalisene kuhle lathi; ngakho kabahlale elizweni bathengiselane; ngoba khangelani, ilizwe likhulu; asithathe amadodakazi abo abe ngomkethu, lathi sibendisele amadodakazi ethu.

²² Lamadoda azakuvuma ukuhlala lathi sibe yisizwe sinye lawo ngalokhu kuphela, ukuba basokwe bonke abesilisa phakathi kwethu, njengalokhu besokiwe bona.

²³ Inkomo zabo lempahla yabo layo yonke imfuyo yabo kayizukuba ngeyethu na? Asibavumele ukuba bakhe phakathi kwethu.

²⁴ Bonke abaphuma ngesango lomuzi wakhe balalela uHamori loShekema indodana yakhe; basokwa bonke abesilisa abaphuma ngesango lomuzi wakhe.

²⁵ Kwathi ngosuku lwesithathu beselobuhlungu, amadodana amabili kaJakobe, oSimeyoni loLevi, abanewabo bakaDina, athatha imikhonto yawo, awujuma umuzi, abulala bonke abesilisa.

²⁶ Ababulala oHamori loShekema indodana yakhe ngomkhonto, amkhupha uDina endlini kaShekema, ahamba.

²⁷ Amanye amadodana kaJakobe afica sebebulewe, awuphanga umuzi, ngoba babemonile udadewabo.

²⁸ Athatha imihlambi yabo lezinkomo zabo labobabhemi babo lalokho okwakusemzini lokwakusegangeni,

²⁹ lempahla yabo yonke; athumba abantwana babo labomkabo, aphanga lakho konke okwakusezindlini.

³⁰ UJakobe wasesithi kuSimeyoni loLevi: Lingihluphile, lingenze ukuba ngibe ngonengekayo phakathi kwabantu belizwe, phakathi kwamaKanani lamaPerizi; njengoba siyingcosana, bazakungihlanganyela bangibulale, ngichitheke mina lendlu yami.

³¹ Bathi: Kuhle yini ukuthi udadewethu aphathwe njengesifebe na?