UGenesisi 31 - iBhayibhili Elingcwele 1978

UJakobe ubalekela uLabani

¹ UJakobe wasesizwa amazwi amadodana kaLabani esithi: UJakobe uthethe konke okukababa; ngalokho okwavela kubaba uzizuzele imfuyo enengi.

² Futhi uJakobe wasebona ukuthi uLabani wayengasezwani laye njengayizolo.

³ INkosi yathi kuJakobe: Buyela elizweni laboyihlo lasezihlotsheni zakho; ngizakuba lawe.

⁴ UJakobe wathumela ilizwi wababiza uRaheli loLeya ukuba beze kuye emmangweni emhlanjini wakhe,

⁵ wathi kibo: Ngiyabona ukuthi uyihlo kasezwani lami njengayizolo; kodwa uNkulunkulu kababa ulami.

⁶ Futhi liyazi ukuthi ngimsebenzele uyihlo ngawo wonke amandla ami.

⁷ Kodwa uyihlo ungikhohlisile, waphendula umvuzo wami kwaze kwaba yizikhathi ezilitshumi, kanti uNkulunkulu wamvimbela ukwenza okubi kimi.

⁸ Kwathi lapho esithi: Ezilamabala kazibe ngumvuzo wakho; wonke umhlambi wazala ezilamabala. Kwathi lapho esithi: Ezingamaqamule kazibe ngumvuzo wakho; khona wonke umhlambi wazala ezingamaqamule.

⁹ Ngokunjalo uNkulunkulu uthethe imfuyo kayihlo, wanginika yona.

¹⁰ Ngesikhathi sokumitha komhlambi, ngabona ephupheni ukuthi izimpongo ezikhwela umhlambi zazingamaqamule zilamabala.

¹¹ Isithunywa sikaNkulunkulu sathi kimi ephupheni: Jakobe! ngathi: Ngilapha.

¹² Sathi: Phakamisa amehlo akho ubone ukuthi zonke impongo ezikhwela umhlambi zingamaqamule zilamabala; ngoba ngibonile konke akwenze kuwe uLabani.

¹³ NginguNkulunkulu waseBetheli lapho wagcoba khona insika yokukhonzela, lalapho wafunga isifungo kimi. Vuka, uphume kulelilizwe, ubuyele elizweni lokuzalwa kwakho.

¹⁴ URaheli loLeya basebemphendula bathi: Siselesabelo lelifa endlini kababa na?

¹⁵ Kasinjengabezizwe kuye na? Ngoba wathengisa ngathi, wazidlela imali yethu.

¹⁶ Ngoba yonke inotho uNkulunkulu ayamuke ubaba ingeyethu leyabantwana bethu; ngakhoke lokho uNkulunkulu akutsho kuwe, kwenze.

¹⁷ UJakobe wasesuka, wakhweza amadodana akhe labomkakhe emakameleni;

¹⁸ wathatha yonke imfuyo yakhe lakho konke abekuzuzile ePadani‐Arama ukuba aye kuIsaka uyise elizweni laseKanani.

¹⁹ ULabani esehambile ukuyagunda izimvu zakhe, uRaheli weba izithombe zikayise.

²⁰ UJakobe wamnyenyela uLabani umAramu, kamtshelanga ukuthi uyahamba.

²¹ Wasebaleka lakho konke ayelakho, wachapha umfula iYufrathi, waqonda ngasentabeni zaseGileyadi.

²² Ngosuku lwesithathu uLabani watshelwa ukuthi uJakobe ubalekile.

²³ Wathatha abafowabo, wamlandela wahamba ibanga lensuku eziyisikhombisa, wamfica entabeni zaseGileyadi.

²⁴ UNkulunkulu weza kuLabani umAramu ephupheni ebusuku, wathi kuye: Qaphela ukuba ungakhulumi lutho kuJakobe.

²⁵ ULabani wasemfica uJakobe. UJakobe wayemise ithente lakhe entabeni; uLabani kanye labafowabo bamisa amathente abo entabeni zaseGileyadi.

²⁶ ULabani wasesithi kuJakobe: Kungani ukuba unginyenyele, uthathe amadodakazi ami njengabathunjiweyo na?

²⁷ Ubalekeleni na? Unginyenyeleleni ungangitshelanga na? Ngoba ngabe ngikuvalelise ngokuthokoza langengoma, ngesigubhu langechacho.

²⁸ Kawungivumelanga ukuba ngange amadodana ami lamadodakazi ami. Wenze ubuthutha ngalokho.

²⁹ Ngilamandla okwenza okubi kuwe; kodwa uNkulunkulu kayihlo ukhulumile kimi ebusuku wathi: Qaphela ukuba ungakhulumi lutho kuJakobe.

³⁰ Khathesi kusobala ukuthi ufuna ukuhamba ngoba ukhanuka indlu kayihlo; kodwa webeleni izithombe zami na?

³¹ UJakobe waphendula wathi kuLabani: Ngoba ngesaba, ngathi: Funa ungamuke amadodakazi akho.

³² Lowo ozakuthola kuye izithombe zakho uzakubulawa; phambi kwabafowethu dinga okwakho, ukuthathe. Ngoba uJakobe wayengazi ukuthi uRaheli wayezebile.

³³ ULabani wangena ethenteni likaJakobe lasethenteni likaLeya, lasemathenteni ezincekukazi, kodwa kazitholanga. Waphuma ethenteni likaLeya, wangena ethenteni likaRaheli.

³⁴ URaheli wayezithethe izithombe, wazifaka esihlalweni sekamela, wahlala phezu kwazo. ULabani wadinga ethenteni lonke kodwa kazitholanga.

³⁵ URaheli wasesithi kuyise: Kayingathukutheli inkosi yami ukuthi ngingesukume phambi kwakho, ngoba ngisemfuleni. Wabhudula, kodwa kazifumananga izithombe.

³⁶ UJakobe wathukuthela, wamsola uLabani, wambuza wathi: Ngiphambanise ngaphi na? Ngona ngani lokhu ungizingele kangaka na?

³⁷ Njengokuba usudingisisile kuyo yonke impahla yami, uyitholile into yendlu yakho na? Ibeke lapha phambi kwabafowethu labafowenu ukuba baqume phakathi kwethu sobabili.

³⁸ Ngangilawe iminyaka engamatshumi amabili; izimvukazi zakho lezibhuzikazi zakho kaziphunzanga, lezinqama zemihlambi yakho kangizidlanga.

³⁹ Ezabanjwa yizilo kangizilethanga kuwe, kodwa ngazihlawula; wazibiza esandleni sami loba ezebiwe emini lezebiwe ebusuku.

⁴⁰ Nganginjalo; ngabulawa lilanga emini, ebusuku ngabulawa ngamakhaza, ngaze ngaswela ubuthongo.

⁴¹ Bengisemzini wakho iminyaka engamatshumi amabili, ngasebenzela kuwe amadodakazi akho amabili okweminyaka elitshumi lane, ngalusa umhlambi wakho iminyaka eyisithupha; waphendula umvuzo wami kwaze kwaba yizikhathi ezilitshumi.

⁴² Uba ebengelami uNkulunkulu kababa, uNkulunkulu kaAbrahama lowo owesatshwa nguIsaka, impela ubuzakungixotsha ngize. Kodwa uNkulunkulu ubonile inhlupheko zami lomsebenzi wezandla zami, wakusola ebusuku okudlulileyo.

Isivumelwano sikaJakobe loLabani

⁴³ ULabani wasemphendula uJakobe wathi: Amadodakazi angamadodakazi ami, labantwana bangabantwana bami, lemihlambi yimihlambi yami, lakho konke okubonayo kungokwami; khathesi ngingawenzelani amadodakazi ami, labantwana bawo abazeleyo na?

⁴⁴ Woza, asenze isivumelwano thina sobabili, sibe yibufakazi phakathi kwami lawe.

⁴⁵ UJakobe wasethatha ilitshe, walimisa laba yinsika yesikhumbuzo.

⁴⁶ UJakobe wathi kubafowabo: Buthani amatshe. Badobha amatshe, benza inqwaba; badla khona ngasenqwabeni.

⁴⁷ ULabani wayibiza ngokuthi yiJegariSahadutha, kodwa uJakobe wayibiza ngokuthi yiGaledi.

⁴⁸ ULabani wathi: Linqwaba iyibufakazi lamhla phakathi kwethu sobabili. Ngakho ibizo layo lathiwa yiGaledi,

⁴⁹ leMizipa futhi, ngoba wathi: INkosi kayilinde phakathi kwethu sobabili lapho singasabonani.

⁵⁰ Uba uhlupha amadodakazi ami, loba uthatha abanye abafazi ngaphandle kwamadodakazi ami, kakulamuntu ongakubona, uNkulunkulu ungufakazi phakathi kwethu.

⁵¹ ULabani wathi kuJakobe: Khangela linqwaba lensika engikumisileyo phakathi kwethu.

⁵² Linqwaba lalinsika kakube yibufakazi bokuthi kangiyikudlula linqwaba ngiye kuwe, lawe kawuyikudlula linqwaba lalinsika uze kimi ngokubi.

⁵³ UNkulunkulu kaAbrahama loNkulunkulu kaNahori, loNkulunkulu kayise wabo kahlulele phakathi kwethu. UJakobe wafunga uNkulunkulu owesatshwa nguyise uIsaka.

⁵⁴ UJakobe wanikela ngomhlatshelo entabeni, wabiza abafowabo ukuba badle ukudla; badla, bahlala ubusuku bonke entabeni.

⁵⁵ ULabani wavuka ekuseni, wanga amadodana akhe lamadodakazi akhe, wawabusisa; wasesuka ebuyela kibo.