UGenesisi 28 - iBhayibhili Elingcwele 1978

¹ UIsaka wasembizake uJakobe, wambusisa, wamlaya wathi: Ungathathi umfazi kuwo amadodakazi aseKanani.

² Suka uye ePadani‐Arama endlini kaBethuweli uyise kanyoko, uthathe khona umfazi kuwo amadodakazi kaLabani umalumakho.

³ UNkulunkulu uSomandla akubusise, akwandise ube yizizwe ezinengi;

⁴ akuphe isibusiso sikaAbrahama wena lenzalo yakho, ukuba udle ilifa lelizwe lapho uhlala khona uNkulunkulu alinika uAbrahama.

⁵ UIsaka wamthumela uJakobe ePadani‐Arama kuLabani indodana kaBethuweli umAramu, umfowabo kaRebeka ongunina kaJakobe loEsawu.

⁶ UEsawu wasebona ukuthi uIsaka umbusisile uJakobe, wamthumela ePadani‐Arama ukuze azithathele khona umfazi, lokuthi lapho embusisa wamlaya ukuthi: Ungathathi umfazi kuwo amadodakazi aseKanani;

⁷ wabona futhi ukuthi uJakobe wabalalela oyise lonina, waya ePadani‐Arama.

⁸ Kwamkhanyela uEsawu ukuthi amadodakazi aseKanani kawamkholisi uIsaka uyise.

⁹ Ngakho uEsawu waya kuIshmayeli, wathatha uMahalathi indodakazi kaIshmayeli, indodana kaAbrahama, udadewabo kaNebayothi, abe ngumkakhe kanye labafazi ayeselabo.

Iphupho likaJakobe eseBetheli

¹⁰ UJakobe waphuma eBerisheba waya eHarana.

¹¹ Wafika endaweni ethile, wahlala khona ubusuku bonke ngoba ilanga laselitshonile. Wasethatha elinye lamatshe akhona, walibeka ngaphansi kwekhanda lakhe, walala khona.

¹² Waphupha, ebona ilele limisiwe emhlabeni, isihloko salo sifinyelela ezulwini, lezithunywa zikaNkulunkulu zikhwela zisehla kulo.

¹³ Wabona iNkosi imi phansi kwakhe, yathi: NgiyiNkosi uNkulunkulu kaAbrahama uyihlo loNkulunkulu kaIsaka; ilizwe olele kulo ngizakukunika lona, wena lenzalo yakho;

¹⁴ inzalo yakho izakuba ngangothuli lomhlabathi, usabalalele ngasentshonalanga langasempumalanga langasenyakatho langaseningizimu; ngawe langenzalo yakho lonke usendo lomhlaba luzabusiswa.

¹⁵ Khangela, ngizakuba lawe ngikulondoloze lapha uya khona, ngikubuyise futhi kulelilizwe; ngoba kangizukukutshiya ngize ngikwenze lokho engikhulume ngakho kuwe.

¹⁶ UJakobe wasephaphama ebutongweni bakhe, wathi: Impela iNkosi ikulindawo, mina bengingakwazi.

¹⁷ Watshaywa luvalo wathi: Yeka ukwesabeka kwalindawo! Impela iyindlu kaNkulunkulu lesango lezulwini.

¹⁸ UJakobe wavuka ekuseni, wathatha ilitshe abeliqamele, walimisa laba yinsika yokukhonzela, wathela amagcobo phezu kwesihloko salo.

¹⁹ Wabiza ibizo laleyondawo ngokuthi iBetheli; kodwa kuqala ibizo lomuzi laliyiLuzi.

²⁰ UJakobe wasefunga isifungo esithi: Uba uNkulunkulu ezakuba lami, angilondoloze ekuhambeni kwami, angiphe ukudla lezingubo zokwambatha,

²¹ ukuze ngibuyele endlini kababa ngokuthula, khona iNkosi izakuba nguNkulunkulu wami,

²² lelitshe leli engilimise ukuba libe yinsika yokukhonzela lizakuba yindlu kaNkulunkulu; kukho konke ozangipha khona ngizakukunika okwetshumi.