UGenesisi 25 - iBhayibhili Elingcwele 1978

Amadodana kaAbrahama kuKetura; ukufa kukaAbrahama

¹ UAbrahama wabuya wathatha omunye umfazi obizo lakhe linguKetura.

² Wamzalela uZimrani loJokishani loMedani loMidiyani loIshibaki loShuwa.

³ UJokishani wazala uSheba loDedani. Amadodana kaDedani ayengamaAshuri lamaLetushi lamaLewumi.

⁴ Amadodana kaMidiyani ayengoEfa loEferi loHanoki loAbida loElidaha. Bonke labo babengabantwana bakaKetura.

⁵ UAbrahama wamupha uIsaka konke ayelakho.

⁶ Kodwa amadodana abafazi bakhe abanye uAbrahama wawanika izipho; esekhona wawasusa kulsaka indodana yakhe, wawasa ngasempumalanga elizweni lasempumalanga.

⁷ Iminyaka yokuhamba kukaAbrahama yayilikhulu lamatshumi ayisikhombisa lanhlanu.

⁸ UAbrahama waguga, wafa eseluphele kakhulu esehambe iminyaka eminengi, wambelwa kwabakibo.

⁹ UIsaka loIshmayeli amadodana akhe bamngcwaba obhalwini lwaseMakaphela, esiqintini sikaEfroni indodana kaZohari umHethi, esiseduze leMamre,

¹⁰ isiqinti asithenga uAbrahama ebantwaneni bakaHethi; uAbrahama wangcwatshelwa khona loSara umkakhe.

¹¹ Kwathi emva kokufa kukaAbrahama, uNkulunkulu wambusisa uIsaka indodana yakhe; uIsaka wahlala emthonjeni waseLahayi‐Royi.

Inzalo kaIshmayeli

¹² Lezi yizizukulwana zikaIshmayeli indodana kaAbrahama eyazalwa nguHagari umGibithe incekukazi kaSara.

¹³ La ngamabizo amadodana kaIshmayeli njengokuzalwa kwawo; izibulo likaIshmayeli nguNebayothi; eselanywa ngoKedari loAdibeli loMibisama

¹⁴ loMishima loDuma loMasa

¹⁵ loHadadi loTema loJeturi loNafishi loKedema;

¹⁶ yilawoke amadodana kaIshmayeli, yilawo amabizo awo ngemizana yawo langemizi yawo, izikhulu ezilitshumi lambili ngezizwe zawo.

¹⁷ Iminyaka yokuhamba kukaIshmayeli yaba likhulu lamatshumi amathathu lesikhombisa; wasesifa, wambelwa kwabakibo.

¹⁸ Bahlala kusukela eHavila kwaze kwaba seShuri elingasempumalanga kweGibithe, ekuhambeni ukuya eAsiriya; wakha ngasempumalanga kwabafowabo.

Ukuzalwa kukaEsawu loJakobe

¹⁹ Lezi yizizukulwana zikaIsaka indodana kaAbrahama; uAbrahama wazala uIsaka.

²⁰ UIsaka wayeleminyaka engamatshumi amane mhla ethatha uRebeka, indodakazi kaBethuweli umAramu wasePadani‐Arama, udadewabo kaLabani umAramu, abe ngumkakhe.

²¹ UIsaka wamkhulekela umkakhe eNkosini, ngoba wayeyinyumba; iNkosi yamlalela, uRebeka umkakhe wathatha isisu.

²² Abantwana babedubana phakathi kwakhe; wathi: Uba kunjalo, ngisekhona ngani na? Waya ukubuza eNkosini.

²³ INkosi yathi kuye: Esizalweni sakho kukhona izizwe ezimbili, inhlobo ezimbili zabantu zizakwahlukana esiswini sakho. Esinye isizwe sizakuba lamandla kulesinye, omkhulu uzakukhonza omncinyane.

²⁴ Kwathi sesifikile isikhathi sokubeletha kwakhe, kwakukhona amaphahla esiswini sakhe.

²⁵ Kwaphuma owokuqala ebomvu, umzimba wakhe wonke unjengengubo yoboya; bamutha ibizo bathi nguEsawu.

²⁶ Emva kwakhe kwaphuma umnawakhe, isandla sakhe sibambelele esithendeni sikaEsawu; wabizwa ngokuthi nguJakobe. UIsaka wayeleminyaka engamatshumi ayisithupha ekuzalweni kwabo.

²⁷ Abafana bakhala; uEsawu waba ngumzingeli ohlakaniphileyo, umuntu wasegangeni; uJakobe waba ngumuntu omnene ehlala emathenteni.

²⁸ UIsaka wayemthanda uEsawu ngoba wayesidla inyama yenyamazana zakhe; kodwa uRebeka wathanda uJakobe.

²⁹ Kwathi uJakobe epheka ukudla, kwafika uEsawu evela egangeni, efile yindlala.

³⁰ UEsawu wathi kuJakobe: Ake ungiphe lokho okubomvu ngoba ngifile yindlala. Ngalokhu wabizwa ngokuthi nguEdoma.

³¹ UJakobe wathi: Ngithengisela lamuhla ilungelo lobuzibulo bakho.

³² UEsawu wathi: Khangela, sengizakufa; ubuzibulo buzakungisiza njani na?

³³ UJakobe wathi: Funga kimi lamuhla. Wasefunga kuye, wathengisa kuJakobe ubuzibulo bakhe.

³⁴ UJakobe wanika uEsawu isinkwa lalokho okubomvu; wadla wanatha, wavuka wahamba; ngalokho uEsawu wadelela ubuzibulo bakhe.