UGenesisi 18 - iBhayibhili Elingcwele 1978

Ukuzalwa kukaIsaka kuyathenjiswa

¹ INkosi yabonakala kuAbrahama eduze lezihlahla ezinkulu zaseMamre, ehlezi emnyango wethente ngesikhathi sokutshisa kwelanga.

² Ephakamisa amehlo akhe wabona amadoda amathathu emi ngaphambi kwakhe; esewabonile wasuka emnyango wethente, wagijima ukuwahlangabeza, wakhothama,

³ wathi: Nkosi yami, uba ngifumene umusa emehlweni akho, ungadluli encekwini yakho.

⁴ Ke ngilethe amanzi ligeze inyawo zenu, liphumule ngaphansi kwesihlahla.

⁵ Ngizaletha lokudla, libambe ithumbu andubana lidlule, njengokuba lifikile encekwini yenu. Athi: Yenza njengokutsho kwakho.

⁶ UAbrahama waphuthuma ethenteni wathi kuSara: Phangisa uthathe amagokoko amabili empuphu ecolekileyo, uyixove, wenze izinkwa.

⁷ UAbrahama wagijima waya ezinkomeni, wathatha ithole elihle elinonileyo, walinika inceku; yaphangisa ukulilungisa.

⁸ Wathatha amasi lochago, lethole abelilungisile, wakubeka phambi kwawo; wema ngakuwo ngaphansi kwesihlahla, adla.

⁹ Athi kuye: Ungaphi uSara umkakho? Wathi: Nangu ethenteni.

¹⁰ Isethekeli sasesisithi: Impela ngizakubuya kuwe ngalesisikhathi nyakenye; khangela, uSara umkakho uzazuza indodana. USara wakuzwa esemnyango wethente ngasemva kwakhe.

¹¹ UAbrahama loSara basebegugile beleminyaka eminengi; sasesiphelile kuSara isikhathi sokuzala.

¹² USara wahlekela ngaphakathi kwakhe, wathi: Njengokuba sengimdala, lendoda yami isiluphele, ng’khona ngizathokoziswa na?

¹³ INkosi yasisithi kuAbrahama: Uhlekelani uSara esithi: Impela ngizakuzala ngimdala na?

¹⁴ Kukhona into engahlula iNkosi na? Ngalesisikhathi nyakenye ngizabuya kuwe, uSara uzazuza indodana.

¹⁵ USara wesaba, waphika esithi: Kangihlekanga. Kodwa wathi: Impela uhlekile.

UAbrahama ukhulekela iSodoma

¹⁶ Amadoda asuka lapho aqonda ngaseSodoma; uAbrahama wahamba lawo ewaphelekezela.

¹⁷ INkosi yathi: Ngingamfihlela uAbrahama lokho engizakwenza na?

¹⁸ Atshi, ngoba uAbrahama uzakuba yisizwe esikhulu esilamandla; zonke izizwe zomhlaba zizabusiswa ngaye.

¹⁹ Ngoba ngimkhethile ukuba alaye abantwana bakhe losendo lwakhe, bagcine indlela yeNkosi ngokwenza ukulunga lokuqotho, ukuze iNkosi imenzele uAbrahama lokho emthembise khona.

²⁰ INkosi yathi: Ukukhala kwaseSodoma leGomora kukhulu lobubi babo bukhulu;

²¹ ngakho ngizakwehla ngibone ukuthi izenzo zabo ezimbi zinkulu yini njengokukhala osekufike kimi; uba kungenjalo ngizakukubona.

²² Amadoda esefulathele lapho, aqonda ngaseSodoma; kodwa uAbrahama wayesemi phambi kweNkosi.

²³ UAbrahama wasondela, wathi: Uzabhubhisa abalungileyo kanye lababi na?

²⁴ Mhlawumbe kukhona abalungileyo abangamatshumi amahlanu phakathi komuzi; uzawubhubhisa ungawuhawukeli ngenxa yabalungileyo abangamatshumi amahlanu abakuwo na?

²⁵ Kakube khatshana lawe ukwenza njalo, ukubulala olungileyo kanye lomubi ukuba olungileyo abe njengomubi; kakube khatshana lawe impela; umahluleli womhlaba wonke kayikwenza ukulunga na?

²⁶ INkosi yasisithi: Uba ngifumana eSodoma abalungileyo abangamatshumi amahlanu phakathi komuzi, ngizawuhawukela ngenxa yalabo.

²⁷ UAbrahama waphendula wathi: Khangela, sengizimisele ukukhuluma eNkosini, mina engiluthuli nje lomlotha.

²⁸ Mhlawumbe kuzasweleka abahlanu kubo abalungileyo abangamatshumi amahlanu; uzabhubhisa umuzi wonke ngenxa yalabo abahlanu na? Yathi: Kangiyikuwubhubhisa uba ngifumana khona abangamatshumi amane lanhlanu.

²⁹ UAbrahama waphinda wakhuluma wathi kuyo: Mhlawumbe kuzafunyanwa khona abangamatshumi amane. Yathi: Kangiyikukwenza ngenxa yalabo abangamatshumi amane.

³⁰ UAbrahama wasesithi: INkosi kayingathukutheli lapho ngikhuluma ngithi: Mhlawumbe kuzafunyanwa khona abangamatshumi amathathu. Yathi: Kangiyikukwenza uba ngifumana khona abangamatshumi amathathu.

³¹ Wathi: Khangela, sengizimisele ukukhuluma eNkosini; mhlawumbe kuzafunyanwa khona abangamatshumi amabili. Yathi: Kangiyikuwubhubhisa ngenxa yalabo abangamatshumi amabili.

³² Wasesithi: INkosi kayingathukutheli, ngizakhuluma kanye kuphela; mhlawumbe kuzafunyanwa khona abalitshumi. Yathi: Kangiyikuwubhubhisa ngenxa yalabo abalitshumi.

³³ INkosi yasisuka isiqedile ukukhuluma loAbrahama; uAbrahama wabuyela endaweni yakhe.