UGenesisi 16 - iBhayibhili Elingcwele 1978

UHagari loIshmayeli

¹ USarayi umkaAbrama wayengamzaleli abantwana; wayelencekukazi yomGibithe ibizo layo linguHagari.

² USarayi wathi kuAbrama: Khangela, iNkosi ingivalile ukuzala; thatha incekukazi yami, mhlawumbe ngingazuza abantwana ngayo. UAbrama walalela ilizwi likaSarayi.

³ Ngakhoke emva kokuba uAbrama esehlale elizweni laseKanani iminyaka elitshumi, uSarayi umkakhe wamthatha uHagari umGibithe, incekukazi yakhe, wamnika uAbrama indoda yakhe ukuba abe ngumkakhe.

⁴ UAbrama wamthatha uHagari; uHagari wathatha isisu. Esebonile ukuthi usezithwele, inkosikazi yakhe yadeleleka kuye.

⁵ USarayi wasesithi kuAbrama: Okubi okwenziwe kimi kakube phezu kwakho. Mina ngikunike incekukazi yami ibe ngumkakho, kodwa isibonile ukuthi ithethe isisu yasingidelela. INkosi kayahlulele icala phakathi kwami lawe.

⁶ Kodwa uAbrama wathi kuSarayi: Khangela, incekukazi yakho isesandleni sakho. Yenza kuyo lokho okubona kufanele. USarayi wayiphatha kubi yaze yabaleka.

⁷ Isithunywa seNkosi sayifumana ngasemthonjeni wamanzi enkangala, ngasemthonjeni osendleleni eya eShuri.

⁸ Sathi kuyo: Hagari, ncekukazi kaSarayi, uvela ngaphi? Uya ngaphi? Yathi: Ngibalekile kuSarayi inkosikazi yami.

⁹ Isithunywa seNkosi sathi kuyo: Buyela enkosikazini yakho, uzehlisele ngaphansi kwayo.

¹⁰ Isithunywa seNkosi sathi kuyo futhi: Ngizakwandisa kakhulu inzalo yakho ukuze ingabe isabalwa ngenxa yobunengi bayo.

¹¹ Isithunywa seNkosi sathi kuyo: Khangela, usuzithwele, uzazala indodana; uyithe ibizo uthi nguIshmayeli, ngoba iNkosi isizwile ukuhlupheka kwakho.

¹² Phakathi kwabantu izakuba njengobabhemi ongathambanga, isandla sayo simelane labantu bonke, lesandla sabo bonke simelane layo; izaphambana labafowabo bonke.

¹³ Wayitha iNkosi eyayikhulume laye ibizo lokuthi: Wena unguNkulunkulu obonayo. Ngoba wathi: Imbala ngisekhona lanxa ngimbonile ongibonayo na?

¹⁴ Ngakho umthombo wabizwa ngokuthi ngumthombo waseLahayi‐Royi; uphakathi kweKadeshi leBeredi.

¹⁵ UHagari wamzalela uAbrama indodana; uAbrama wayitha indodana yakhe eyazalwa nguHagari wathi nguIshmayeli.

¹⁶ UAbrama wayeleminyaka engamatshumi aficaminwembili lesithupha mhla uHagari emzalela uIshmayeli.