UGenesisi 11 - iBhayibhili Elingcwele 1978

Umphotshonga waseBabeli

¹ Umhlaba wonke wawulolimi lunye lokukhuluma kunye.

² Kwathi ekusukeni kwabo empumalanga abantu bafumana igceke elizweni laseShinari, bahlala khona.

³ Basebekhulumisana besithi: Wozani, asenzeni izitina sizitshise kuhle. Izitina zaba ngamatshe abo, lengcino yaba ludaka lwabo.

⁴ Bathi: Wozani, asakheni umuzi lomphotshonga osihloko sawo sifinyelela ezulwini, sizenzele ibizo elikhulu singahlakazeki emhlabeni wonke.

⁵ INkosi yehla ukubona umuzi lomphotshonga okwakhiwa ngabantu.

⁶ INkosi yasisithi: Khangela, bayisizwe sinye, balolimi lunye, yikho abaqala ngakho; khathesi kabasayikwahlulwa lutho abafuna ukulwenza.

⁷ Wozani, sehle, siphambanise ulimi lwabo bangezwani ekukhulumeni kwabo.

⁸ Ngakhoke iNkosi yabahlakazela emhlabeni wonke besuka lapho; ngakho kwema ukwakhiwa komuzi.

⁹ Ngalokho wabizwa ngokuthi liBabeli, ngoba lapho iNkosi yaphambanisa ulimi lwabantu bonke; yabahlakazela emhlabeni wonke besuka lapho.

Inzalo kaShemu

¹⁰ Lezi yizizukulwana zikaShemu. UShemu wayeleminyaka elikhulu, wazala uArpakishadi iminyaka emibili emva kukazamcolo.

¹¹ Emva kokuzalwa kukaArpakishadi uShemu wahlala iminyaka engamakhulu amahlanu; wazala amadodana lamadodakazi.

¹² UArpakishadi wahlala iminyaka engamatshumi amathathu lanhlanu, wazala uShela.

¹³ Emva kokuzalwa kukaShela uArpakishadi wahlala iminyaka engamakhulu amane lantathu; wazala amadodana lamadodakazi.

¹⁴ UShela wahlala iminyaka engamatshumi amathathu, wazala uEberi.

¹⁵ Emva kokuzalwa kukaEberi uShela wahlala iminyaka engamakhulu amane lantathu; wazala amadodana lamadodakazi.

¹⁶ UEberi wahlala iminyaka engamatshumi amathathu lane, wazala uPelegi.

¹⁷ Emva kokuzalwa kukaPelegi uEberi wahlala iminyaka engamakhulu amane lamatshumi amathathu; wazala amadodana lamadodakazi.

¹⁸ UPelegi wahlala iminyaka engamatshumi amathathu, wazala uRewu.

¹⁹ Emva kokuzalwa kukaRewu uPelegi wahlala iminyaka engamakhulu amabili lesificamunwemunye; wazala amadodana lamadodakazi.

²⁰ URewu wahlala iminyaka engamatshumi amathathu lambili, wazala uSerugi.

²¹ Emva kokuzalwa kukaSerugi uRewu wahlala iminyaka engamakhulu amabili lesikhombisa; wazala amadodana lamadodakazi.

²² USerugi wahlala iminyaka engamatshumi amathathu, wazala uNahori.

²³ Emva kokuzalwa kukaNahori uSerugi wahlala iminyaka engamakhulu amabili; wazala amadodana lamadodakazi.

²⁴ UNahori wahlala iminyaka engamatshumi amabili lesificamunwemunye, wazala uTera.

²⁵ Emva kokuzalwa kukaTera uNahori wahlala iminyaka elikhulu lamatshumi aficamunwemunye; wazala amadodana lamadodakazi.

²⁶ UTera wahlala iminyaka engamatshumi ayisikhombisa, wazala uAbrama loNahori loHarani.

Inzalo kaTera

²⁷ Lezi yizizukulwana zikaTera. UTera wazala uAbrama loNahori loHarani; uHarani wazala uLoti.

²⁸ UHarani wafa phambi kukayise uTera elizweni lokuzalwa kwakhe, iUri lamaKaladiya.

²⁹ UAbrama loNahori bathatha abafazi; ibizo lomkaAbrama lalinguSarayi, ibizo lomkaNahori linguMilka indodakazi kaHarani, uyise kaMilka loIska.

³⁰ USarayi wayeyinyumba engelamntwana.

³¹ UTera wathatha uAbrama indodana yakhe, loLoti indodana kaHarani, indodana yendodana yakhe, loSarayi umalokozana wakhe umkaAbrama indodana yakhe; basuka eUri lamaKaladiya ukuya elizweni laseKanani; bafika eHarani, bahlala khona.

³² UTera wahlala iminyaka engamakhulu amabili lanhlanu; uTera wafela eHarani.