UFilimoni 1 - iBhayibhili Elingcwele 1978

Isibingelelo

¹ UPawuli, isibotshwa sikaKristu Jesu, loTimothi umzalwane wethu sithi kuFilimoni, isisebenzi kanye lathi esithandekayo,

² lakuApifiya udadewethu, lakuArkipho owebutho kanye lathi, lakulo ibandla elisendlini yakho:

³ Kakube kini umusa lokuthula okuvela kuNkulunkulu uBaba laseNkosini uJesu Kristu.

UPawuli ubabaza ukukholwa kukaFilimoni

⁴ Ngiyambonga uNkulunkulu wami ngezikhathi zonke ekukukhumbuleni kwami emikhulekweni yami,

⁵ lapho ngisizwa ngothando lwakho langokukholwa olakho eNkosini uJesu lakubo bonke abangcwele.

⁶ Ngikhulekela ukuba ukuhlanganyela kwakho kanye lathi ekukholweni kwethu kwandise ukwazi kwakho konke okuhle okungokwethu kuKristu.

⁷ Uthando lwakho, mzalwane, lunginike ukuthokoza okukhulu lokududuzeka, ngoba inhliziyo zabantu bakaNkulunkulu zihlunyelelisiwe ngawe.

UPawuli ukhuluma ngoOnesimo

⁸ Ngalokhoke ngilesibindi esikhulu kuKristu sokuba ngikulaye ukuba wenze lokho okufunekayo,

⁹ kanti ngenxa yothando kungcono ukukuncenga, njengoba nginje mina Pawuli oyisithunywa, esengiyisibotshwa futhi ngenxa kaKristu Jesu.

¹⁰ Ngiyakuncenga ngomntanami engimzeleyo ekubotshweni kwami, uOnesimo;

¹¹ kade engelasizo kuwe, kodwa khathesi ulosizo impela kuwe lakimi.

¹² Ngiyambuyisela kuwe ngokungathi ngibuyisela inhliziyo yami uqobo.

¹³ Bengifisa ukumbamba ahlale lami, ukuze angisebenzele esikhundleni sakho ngisekubotshweni kwami ngenxa yevangeli.

¹⁴ Kodwa kangithandanga ukwenza ulutho ngaphandle kwemvumo yakho, ukuze umusa wakho ungabi ngowokubanjwa ngamandla, kodwa ube ngowesihle.

¹⁵ Mhlawumbe wahlukaniswa lawe okwesikhatshana ukuba abuye abe ngowakho kokuphela,

¹⁶ angabe esaba yisigqili, kodwa abe ngaphezu kwesigqili, abe ngumzalwane othandekayo, ikakhulu kimi kodwa kakhulu kangakanani kuwe, ebuntwini bakhe laseNkosini.

¹⁷ Ngakhoke uba usithi ngingumhlanganyeli kanye lawe, mamukele ngokungathi yimi.

¹⁸ Kodwa uba ekonile ingabe elomlandu kuwe, lokho kubalele kimi.

¹⁹ Mina Pawuli ngiyakuloba ngesandla sami ngithi ngizakukuhlawula, ngingakuphathike ukuthi lawe ulomlandu kimi onguwe uqobo.

²⁰ Yebo, mzalwane, akungenzele lokhu eNkosini, uhlumelelise inhliziyo yami kuKristu.

Isicino

²¹ Ngiloba ngokuthemba ukulalela kwakho, ngisazi ukuthi uzakwenza okungaphezu kwalokho engikutshoyo.

²² Futhike ungilungisele lami indawo; ngoba ngiyathemba ukuthi ngemikhuleko yenu uNkulunkulu uzakungibuyisela kini.

²³ Uyabingelela eEpafra oyisibotshwa kanye lami kuKristu Jesu,

²⁴ loMarko, loAristako, loDema, loLuka, izisebenzi kanye lami.

²⁵ Umusa weNkosi uJesu Kristu kawube lomoya wenu.