uAmosi 2 - iBhayibhili Elingcwele 1978

¹ INkosi ithi: Ngenxa yeziphambeko ezinengi zamaMowabi kangiyikuwayekela, ngoba atshisa amathambo enkosi yaseEdoma aze aba ngumlotha.

² Ngakho ngizathumela umlilo kuMowabi ozakuqeda izinqaba zaseKeriyothi, uMowabi afele phakathi kokuxokozela lokumemeza lokukhala kophondo;

³ ngizakuqeda umbusi wakhe, ngibulale zonke izikhulu kanye laye; kutsho iNkosi.

⁴ INkosi ithi: Ngenxa yeziphambeko ezinengi zakoJuda kangiyikubayekela, ngoba bawalile umlayo weNkosi, kabagcinanga izimiso zayo, baduhiswe yizithombe zabo abazikhonzayo lokhokho babo.

⁵ Ngakho ngizathumela umlilo koJuda ozakuqeda izinqaba zeJerusalema.

Ukwahlulelwa kukaIsrayeli

⁶ INkosi ithi: Ngenxa yeziphambeko ezinengi zakoIsrayeli kangiyikubayekela, ngoba bathengisa abalungileyo ngesiliva labaswelayo ngamanyathelo;

⁷ banyathezela phansi abayanga, baphambanise abathobileyo endleleni yabo. Umuntu loyise baya entombininye, bangcolise ibizo lami elingcwele.

⁸ Bacambalala emaceleni awo wonke ama‐altare engutsheni ezinikwe zaba yisibambiso, banathe endlini kaNkulunkulu wabo iwayini labahlawulisiweyo.

⁹ Kanti mina ngachitha amaAmori phambi kwabo, ubude bawo babulingana lobude bezihlahla zomkusu ezinde, lokuqina kwawo kunjengezihlahla ezinkulu; kodwa ngachitha izithelo zawo ngaphezulu, lempande zawo ngaphansi.

¹⁰ Futhi mina ngalikhupha elizweni laseGibithe, ngalihola enkangala iminyaka engamatshumi amane, ukuba lithumbe ilizwe lamaAmori.

¹¹ Ngavusa abanye emadodaneni enu ukuba babe ngabaprofethi, labanye ensizweni zenu ukuba babe ngamaNaziri. Kakunjalo yini lina bantu bakoIsrayeli na? kutsho iNkosi.

¹² Kodwa lawanathisa iwayini amaNaziri, labatshela abaprofethi ukuba bangatshumayeli.

¹³ Khangelani, ngizalinyathela endaweni yenu njengenqola egcwele izithungo inyathela umuntu.

¹⁴ Olejubane uzaphelelwa yisiqubu, lolamandla ephelelwe ngamandla, leqhawe kaliyikuzisiza;

¹⁵ ophethe imitshoko kayikuqina, lolejubane kayikuphunyuka, logade ibhiza kayikuzikhulula;

¹⁶ lolesibindi phakathi kwamaqhawe uzabaleka eze ngalolosuku; kutsho iNkosi.