Imisebenzi 18 - iBhayibhili Elingcwele 1978

UPawuli useKorinte laseEfesu

¹ Emva kwalokho wasuka eAtene, waya eKorinte.

² Wafumana khona umJuda othiwa nguAkwila, owasePontusi ngokuzalwa, wayesand’ukufika evela eItaliya kanye lomkakhe uPrisila ngenxa yesimemezelo sikaKlawudiya sokuthi bonke abaJuda kabasuke eRoma. UPawuli waya kubo;

³ ngoba babesebenza msebenzi munye, wahlala kibo esebenza labo. Umsebenzi wabo wawungowokwenza amathente.

⁴ AmaSabatha wonke wakhuluma esinagogeni, wazuza abaJuda lamaGriki.

⁵ Kwathi sebefikile oSilasi loTimothi bevela eMakedoniya, uPawuli wakhuthalela ukutshumayela, efakaza kubaJuda ukuba uJesu unguKristu.

⁶ Kwathi bemphikisa, bemhlambaza, wathintitha ingubo zakhe, wathi kubo: Igazi lenu kalibe phezu kwamakhanda enu; mina kangilacala; kusukela lamhla ngizakuya kwabezizwe.

⁷ Wasuka lapho, waya endlini yendoda ethile ekhonza uNkulunkulu ethiwa nguTithiyu Justusi, indlu yayo yayiseduze lesinagoge.

⁸ Kodwa uKrispu umphathi wesinagoge wakholwa eNkosini kanye lendlu yakhe yonke, labanengi kwabaseKorinte balalela uPawuli, bakholwa, babhaphathizwa.

⁹ INkosi yathi kuPawuli ebusuku ngombono: Ungesabi, kodwa khuluma, ungathuli;

¹⁰ ngoba mina ngilawe, kakho umuntu ozakukuhlasela, akulimaze, ngoba ngilabantu abanengi kulumuzi.

¹¹ Wahlala khona umnyaka lenyanga eziyisithupha efundisa ilizwi likaNkulunkulu phakathi kwabo.

¹² Kwathi uGaliyo esengumbusi waseAkaya, abaJuda bamvukela uPawuli nganhliziyonye, bamusa phambi kwesihlalo sokuthonisisa,

¹³ bathi: Lumuntu uphendula abantu ukuba bakhonze uNkulunkulu ngokuphambene lomlayo.

¹⁴ Kodwa kwathi uPawuli esezakuvula umlomo wakhe, uGaliyo wathi kubaJuda: Lina baJuda, uba bekulicala lokwenza okubi, loba elobugebenga, bengizakulilalela;

¹⁵ kodwa ngoba kuyikuphikisana ngamazwi, langamabizo, langomlayo wenu, ziboneleni lina; mina kangithandi ukuba ngumgwebi walezizinto.

¹⁶ Wasebaxotsha esihlalweni sokuthonisisa.

¹⁷ Bonke basebembamba uSostene umphathi wesinagoge, bamtshaya phambi kwesihlalo sokuthonisisa, kodwa uGaliyo kaze akunanza lokho.

¹⁸ Kwathi uPawuli esehlale khona insuku ezinengi, wavalelisa abazalwane, wasuka ngomkolo, waya eSiriya kanye loPrisila loAkwila; wagela inwele zakhe eKenikreya, ngoba wayezibophe ngesifungo.

¹⁹ Sebefikile eEfesu, wehlukana labo; yena wangena esinagogeni, waphikisana labaJuda.

²⁰ Sebemcelile ukuba ahlale isikhathi eside, wala,

²¹ kodwa ebavalelisa wathi: Ngizakubuya uba uNkulunkulu evuma. Wasuka eEfesu ngomkolo;

²² esefikile eKesariya wayabingelela ibandla; wasesehlela eAntiyoki.

Uhambo lwesithathu lukaPawuli. UApolo useEfesu

²³ Esehlale khona isikhathi esithile wasuka wadabula ilizwe laseGalathiya lelaseFrigiya eqinisa bonke abafundi.

²⁴ UmJuda othile othiwa nguApolo, owaseAleksandriya ngokuzalwa, wafika eEfesu, wayeyindoda efundileyo leyaziyo imibhalo.

²⁵ Wayefundisiwe indlela yeNkosi; evutha emoyeni wakhuluma, wafundisa ngokuqondileyo indaba ezimayelana loJesu, esazi ubhaphathizo lukaJohane kuphela;

²⁶ waqala ukutshumayela ngesibindi esinagogeni. Kwathi ukuba bamuzwe oPrisila loAkwila, bamthatha bamchasisela indlela kaNkulunkulu ngokuqondileyo.

²⁷ Esethanda ukuwelela eAkaya, abazalwane bamkhuthaza, balobela abafundi ukuba bamamukele; esefikile wabasiza kakhulu ababekholiwe ngomusa,

²⁸ ngoba waphikisa abaJuda ngamandla phambi kwabantu, etshengisa ngemibhalo ukuba uJesu unguKristu.