Imisebenzi 14 - iBhayibhili Elingcwele 1978

UPawuli utshumayela eIkoniyuma

¹ Kwathi eIkoniyuma bangena esinagogeni labaJuda, bakhuluma kwaze kwakholwa ixuku elikhulu labaJuda lamaGriki.

² Kodwa abaJuda abangakholwayo bavusa abezizwe, babafaka umoya omubi ngabazalwane.

³ Bahlala isikhathi eside, bekhuluma ngesibindi ngeNkosi eyafakazela ilizwi lomusa wayo, ibanika ukuba kwenziwe izibonakaliso lezimangaliso ngezandla zabo.

⁴ Kodwa abantu bomuzi behlukana phakathi, abanye baba ngakubaJuda labanye baba ngakubaphostoli.

⁵ Kwathi ukuba kuvele umzamo kwabezizwe labaJuda kanye lababusi babo wokubaphatha kubi lokubakhanda ngamatshe,

⁶ sebekwazi lokhu, babalekela eListra leDerbe, imizi yaseLikawoniya, lasemazweni akhona,

⁷ batshumayela khona ivangeli.

UPawuli utshumayela eListra

⁸ EListra kwakuhlezi indoda ethile eyisilima enyaweni zayo, eyisiqhuli kusukela ekuzalweni kwayo, engazanga ihambe.

⁹ Yona yamuzwa uPawuli ekhuluma. UPawuli eyijolozela wabona ukuba ilokukholwa kokuba isiliswe,

¹⁰ wathi ngelizwi elikhulu: Sukuma, ume ngenyawo zakho. Yasukuma yathi lothu, yahamba.

¹¹ Kwathi ukuba amaxuku abone okwenziweyo nguPawuli, aphakamisa ilizwi esithi ngolimi lwaseLikawoniya: Onkulunkulu behlele kithi befana labantu.

¹² UBarnabasi bambiza bathi nguZewusi, loPawuli bathi nguHermesi, ngoba nguye owayekhokhela ekukhulumeni.

¹³ Umpristi kaZewusi othempeli lakhe laliphambi komuzi waletha inkabi lemigaxo ngasesangweni, wafuna ukubahlabela ekanye labantu.

¹⁴ Kodwa abaphostoli oBarnabasi loPawuli sebekuzwile, badabula ingubo zabo, baphoseka exukwini bememeza besithi:

¹⁵ Madoda, likwenzelani lokhu na? Lathi singabantu abanjengani ngokwemvelo, sililethele ivangeli ukuze liphenduke kulokho okuyize, liphendukele kuNkulunkulu ophilayo owenza izulu lomhlaba, lolwandle, lakho konke okukukho,

¹⁶ owathi ezizukulwaneni ezidlulileyo wayekela izizwe zonke zahamba ngendlela zazo.

¹⁷ Kodwa kayekelanga ukuzifakazela ngokwenza okuhle, walinika izulu livela ezulwini lezikhathi zenala, esuthisa inhliziyo zenu ngokudla langokujabula.

¹⁸ Ngalamazwi babayekelisa abantu ngokulukhuni ukuba babahlabele.

UPawuli utshumayela eAntiyoki

¹⁹ Kodwa kwafika abaJuda abavela eAntiyoki leIkoniyuma, sebevumelene labantu bamkhanda uPawuli ngamatshe, bamhudulela ngaphandle komuzi besithi ufile.

²⁰ Kodwa kwathi abafundi bebuthana kuye, wasukuma, wangena emzini; kusasa wasuka loBarnabasi, baya eDerbe.

²¹ Sebetshumayele ivangeli kulowomuzi, bezuzile abafundi abanengi, babuyela eListra, laseIkoniyuma, laseAntiyoki,

²² beqinisa imimoya yabafundi bebaluleka ukuba babambelele ekukholweni, besithi: Simele ukungena embusweni kaNkulunkulu ngenhlupheko ezinengi.

²³ Sebebakhethele abadala emabandleni wonke, bakhuleka bezila ukudla, babanikela eNkosini asebekholwa kiyo.

²⁴ Basebedabula iPisidiya, baya ePamfiliya.

²⁵ Sebekhulumile ilizwi ePerga, behlela eAtaliya.

²⁶ Basuka lapho ngomkolo, baya eAntiyoki, lapho babenikezelwe khona emuseni kaNkulunkulu kulowo umsebenzi abasebewenzile.

²⁷ Kwathi sebefikile, balihlanganisa ibandla, balandisa konke uNkulunkulu abekwenzile ngabo lokuthi uvulele abezizwe umnyango wokukholwa.

²⁸ Basebehlala isikhathi eside labafundi.