AmaNani 8 - iBhayibhili Elingcwele 1978

UAroni umisa izibane

¹ INkosi yasisithi kuMose:

² Tshono kuAroni uthi: Nxa umisa izibane eziyisikhombisa, zizakukhanyisa phambi koluthi lwesibane.

³ UAroni wenza njalo, wamisa izibane zalo ukuba zikhanyise phambi koluthi lwesibane, njengokutsho kweNkosi kuMose.

⁴ Loluluthi lwesibane lwenziwa ngegolide elikhandiweyo kusukela esidindini salo kusiya emalubeni alo. Uluthi lwesibane lwenziwa njengesifanekiso iNkosi emtshengise sona uMose.

Ukwahlukaniswa kwamaLevi

⁵ INkosi yathi kuMose:

⁶ Yahlukanisa amaLevi kubantu bakoIsrayeli, uwahlambulule;

⁷ wenze lokhu kuwo ukuwahlambulula, uwachele ngamanzi okuhlambulula, aziphuce umzimba wonke, agezise izigqoko zawo, azihlambulule.

⁸ Athathe inkunzi kanye lomnikelo wempuphu oqondene layo, impuphu ecolekileyo ixubene lamafutha, uthathe wena enye inkunzi ibe ngumnikelo wesono.

⁹ Uzakuwamisa amaLevi phambi kwethente lokuhlangana, ubuthanise lonke ibandla labakoIsrayeli.

¹⁰ Nxa umisa amaLevi phambi kweNkosi, abakoIsrayeli bazakubeka izandla zabo phezu kwamaLevi,

¹¹ loAroni anikele amaLevi eNkosini, abe yisipho esikhulu esivela ebantwini bakoIsrayeli, ukuba abe yilabo abawenzayo umsebenzi weNkosi.

¹² AmaLevi azakubeka izandla zawo enhlokweni zezinkunzi; wena unikele enye ibe ngumnikelo wesono, lenye ibe ngumnikelo wokutshiswa eNkosini, ukuba wenzele amaLevi indlela yokubuyisana.

¹³ Uzakuwamisa amaLevi phambi kukaAroni lamadodana akhe, uwanikele eNkosini abe yisipho esikhulu.

¹⁴ Ngakhoke uzakwahlukanisa amaLevi kubantu bakoIsrayeli, ukuba wona abe ngawami,

¹⁵ Emva kwalokho amaLevi azakungena ukwenza umsebenzi wawo ethenteni lokuhlangana. Uzakuwahlambulula, uwanikele abe yisipho esikhulu,

¹⁶ ngoba aphiwe mina phakathi kwabantu bakoIsrayeli. Ngizithathele wona endaweni yawo wonke amazibulo abesifazana bakoIsrayeli.

¹⁷ Ngoba wonke amazibulo phakathi kwabantu bakoIsrayeli ngawami, awabantu lawezifuyo. Ngalolosuku engabulala ngalo wonke amazibulo eGibithe ngazahlukanisela wona;

¹⁸ sengithethe amaLevi endaweni yawo wonke amazibulo phakathi kwabantu bakoIsrayeli.

¹⁹ Phakathi kwabakoIsrayeli ngiwanikile amaLevi abe yisipho sikaAroni lesamadodana akhe, ukuba enzele abakoIsrayeli inkonzo ethenteni lokuhlangana, lokuba enzele abakoIsrayeli indlela yokubuyisana, ukuze kungabi lomkhuhlane phakathi kwabakoIsrayeli nxa besondela endlini engcwele.

²⁰ UMose loAroni lebandla lonke labakoIsrayeli benza njalo kumaLevi njengokutsho kweNkosi kuMose mayelana lamaLevi.

²¹ LamaLevi azihlambulula, agezisa ingubo zawo; uAroni wawanikela aba yisipho esikhulu phambi kweNkosi, wawenzela indlela yokubuyisana ukuwahlambulula.

²² Emva kwalokho amaLevi angena ukwenza umsebenzi wawo ethenteni lokuhlangana phambi kukaAroni lamadodana akhe. Njengokutsho kweNkosi kuMose ngamaLevi, benza njalo kuwo.

Iminyaka yokusebenza kwamaLevi

²³ INkosi yathi kuMose:

²⁴ Lokhu kuqondene lamaLevi; lawo aleminyaka engamatshumi amabili lanhlanu lengaphezulu azakungena ukwenza umsebenzi wenkonzo ethenteni lokuhlangana;

²⁵ lawo aleminyaka engamatshumi amahlanu lengaphezulu azakuphuma emsebenzini wenkonzo, angabe esasebenza;

²⁶ kodwa azakusiza abazalwane bawo ethenteni lokuhlangana ukuba kube lenkonzo, kodwa angabe esasebenza. Uzakwenza njalo kumaLevi ngemisebenzi yawo.