AmaNani 6 - iBhayibhili Elingcwele 1978

Umlayo omayelana lomNaziri

¹ INkosi yathi kuMose:

² Tshono ebantwini bakoIsrayeli uthi: Nxa owesilisa loba owesifazana efunga isifungo somNaziri, ukuba azahlukanisele iNkosi,

³ uzakuzila iwayini lotshwala, anganathi umhluzi wezithelo zevini, angadli izithelo zevini ezimanzi lezomileyo.

⁴ Zonke insuku zokuzahlukanisela kwakhe kayikudla lutho oluvela evinini, lokwezithelo zalo, lenhlamvu lamakhasi.

⁵ Zonke insuku zokugcwalisa isifungo sakhe impuco kayiyikuthinta ikhanda lakhe; uzakuba ngcwele size siphelele isikhathi sokuzahlukanisela kwakhe iNkosi, ayekele inwele zakhe ekhanda lakhe zibende.

⁶ Zonke insuku azahlukanisele iNkosi ngazo kayikusondela esidunjini.

⁷ Kayikuzingcolisa ngoyise langonina langomfowabo langodadewabo, uba befile, ngoba usabotshiwe yikuzahlukanisela kwakhe uNkulunkulu.

⁸ Zonke insuku zokuzahlukanisela kwakhe ungcwele eNkosini.

⁹ Uba umuntu ejunywa yikufa phansi kwakhe, angcolise inwele zakhe ezahlukanisele iNkosi, uzakuphuca ikhanda lakhe ngosuku lokuhlanjululwa kwakhe olwesikhombisa.

¹⁰ Ngosuku lwesificaminwembili uzaletha amajuba amabili loba inkwilimba ezimbili kumpristi ngasemnyango wethente lokuhlangana;

¹¹ umpristi uzakunikela ngenye ibe ngumnikelo wesono, langenye ibe ngumnikelo wokutshiswa, amenzele indlela yokubuyisana, ngoba uzingcolisile ngesidumbu. Uzakulahlukanisela ikhanda lakhe ngalona lolosuku,

¹² azahlukanisele yena iNkosi ngensuku zokwahlukanisela kwakhe, alethe iwundlu elilomnyaka munye libe ngumnikelo wecala; kodwa insuku zakuqala zizakuba yize, ngoba inwele zakhe zingcolisiwe.

¹³ Lo ngumlayo womNaziri lapho isikhathi sokuzahlukanisela kwakhe sesiphelile. Uzakulethwa emnyango wethente lokuhlangana,

¹⁴ anikele ngomnikelo wakhe eNkosini, iwundlu elilomnyaka munye elingelasici, libe ngumnikelo wokutshiswa, lemvukazi elomnyaka munye engelasici ibe ngumnikelo wesono, lenqama ibenye engelasici ibe ngumnikelo wokuthula,

¹⁵ lesitsha sezinkwa ezingelamvubelo, amaqebelengwana empuphu ecolekileyo ahlanganiswe lamafutha, lezinkwa ezincinyane ezingelamvubelo ezigcotshwe ngamafutha, lomnikelo wempuphu leminikelo yokuthululwa eqondene lalezozinto.

¹⁶ Umpristi uzakukubeka phambi kweNkosi, anikele ngomnikelo wakhe wesono lomnikelo wakhe wokutshiswa.

¹⁷ UmNaziri uzakunikela ngenqama ibe ngumhlatshelo wokuthula eNkosini kanye lesitsha esilezinkwa ezingelamvubelo; umpristi uzakunikela umnikelo wempuphu lomnikelo wokuthululwa okuqondene lalezizinto.

¹⁸ UmNaziri uzaphuca ikhanda lakhe ngasemnyango wethente lokuhlangana, athathe inwele zekhanda lakhe, azifake emlilweni ongaphansi komhlatshelo womnikelo wokuthula.

¹⁹ Umpristi uzathatha umkhono wenqama, nxa isiphekiwe, leqebelengwana elingelamvubelo esitsheni, lesinkwa esincinyane esingelamvubelo, akubeke ezandleni zomNaziri esephucile ikhanda lakhe,

²⁰ umpristi akuzunguze kube ngumnikelo wokuzunguzwa phambi kweNkosi; ngoba kuyisabelo esingcwele sompristi kanye lesifuba esizunguziweyo lomlenze onikelweyo. Emva kwalokhu umNaziri anganatha iwayini.

²¹ Lowo ngumlayo womNaziri ofungayo. Uzanikela ngomnikelo eNkosini njengesifungo sakhe asifungileyo engumNaziri, ngaphandle kwalokho angakunika; njengoba efungile, uzakwenza njengomlayo wokuzahlukaniswa kwakhe ngoba engumNaziri.

Ukubusiswa kwabantu ngabapristi

²² INkosi yathi kuMose:

²³ Tshono kuAroni lamadodana akhe uthi: Lizakubusisa kanje abantu bakoIsrayeli. Lithi kubo:

²⁴ INkosi ilibusise, ililondoloze.

²⁵ INkosi ikhanyise ubuso bayo phezu kwenu, ibe lomusa kini.

²⁶ INkosi iphakamise amehlo ayo ilikhangele, ilehlisele ukuthula.

²⁷ Ngokunjaloke bazakubiza ibizo lami phezu kwabakoIsrayeli, ngibabusise.