AmaNani 5 - iBhayibhili Elingcwele 1978

Abangcolileyo bayakhutshwa ezihonqweni

¹ INkosi yathi kuMose:

² Laya abantu bakoIsrayeli ukuba bakhuphe ezihonqweni bonke abalobulephero, labo bonke okuphuma emizimbeni yabo okungcolileyo, labo bonke abangcoliswe yikuthinta isidumbu.

³ Khuphelani ngaphandle kwezihonqo abesilisa labesifazana ukuba bangangcolisi izihonqo engihlala phakathi kwazo.

⁴ Abantu bakoIsrayeli benza njalo, babakhuphela ngaphandle kwezihonqo, njengokutsho kweNkosi kuMose.

Umlayo omayelana lokuhlawula komuntu olecala

⁵ INkosi yathi kuMose:

⁶ Tshono ebantwini bakoIsrayeli uthi: Uba owesilisa loba owesifazana esenza isono esenziwa ngabantu abangathembekanga eNkosini, lowomuntu ulecala,

⁷ uzakuvuma isono sakhe asenzileyo, ahlawule icala lakhe ngokupheleleyo, abesesengezelela okwesihlanu, anike lowomuntu amenzele okubi.

⁸ Kodwa uba lowo engelasihlobo okungahlawulwa kiso icala, ihlawulo elenzelwa iNkosi lizakuba ngelompristi, kanye lenqama yokubuyisana umpristi azamenzela indlela yokubuyisana ngayo.

⁹ Yonke iminikelo, zonke izinto ezingcwele zabakoIsrayeli abaziletha kumpristi, zizakuba ngezakhe.

¹⁰ Umpristi uzathatha zonke izinto ezingcwele ezinikwa ngumuntu; konke akunikwayo kuzakuba ngokwakhe.

Umlayo omayelana lobukhwele

¹¹ INkosi yathi kuMose:

¹² Tshono ebantwini bakoIsrayeli uthi: Uba umfazi womuntu eduha, kathembekanga kumkakhe,

¹³ alale lenye indoda, indoda yakhe ingeze yakwazi lokhu, angabonwa muntu lanxa yena ezingcolisile, kungekho muntu ongafakaza ngaye ngoba engabanjwanga esoqotsheni lokufeba,

¹⁴ futhi uba indoda yakhe ifikelwe ngumoya wobukhwele, ibe lobukhwele ngomkayo ozingcolisileyo, loba ifikelwe ngumoya wobukhwele, ibe lobukhwele ngomkayo lanxa yena engazingcolisanga,

¹⁵ izakuletha umkayo kumpristi kanye lomnikelo oyingxenye yehefa lempuphu yebhali. Kayiyikuthela amafutha kuyo, ingabeki lanhlaka phezu kwayo, ngoba kungumnikelo owenziwe ngenxa yobukhwele, umnikelo wokukhumbuza ngobubi.

¹⁶ Umpristi uzakumsondeza owesifazana, ammise phambi kweNkosi,

¹⁷ athele amanzi angcwele embizeni yebumba, athathe umhlabathi ophansi eTabernakelini, awufake emanzini.

¹⁸ Umpristi uzakumisa owesifazana phambi kweNkosi, athukulule inwele zekhanda lakhe, abeke ezandleni zakhe umnikelo wempuphu wokukhumbuza, ongumnikelo wempuphu owenziwe ngenxa yobukhwele. Ezandleni zakhe umpristi uzakuphatha amanzi aletha ubuhlungu lesiqalekiso.

¹⁹ Umpristi uzakumfungisa, athi kuye: Uba ungalalanga landoda, ungaduhanga wazingcolisa, usathembekile endodeni yakho, kawungahlutshwa ngalamanzi aletha ubuhlungu lesiqalekiso.

²⁰ Kodwa uba uduhile lanxa usesendodeni yakho, futhi uba uzingcolisile, walala lenye indoda —

²¹ umpristi amfungise owesifazana ngesifungo sesiqalekiso, athi kuye — iNkosi kayikwenze wena ube yisinengiso lesiqalekiso phakathi kwabakini, ikwenze ukuba uphumise isisu.

²² Amanzi la aletha isiqalekiso kawangene kuwe, akwenze ukuba uphumise isisu. Owesifazana athi: Kakube njalo.

²³ Umpristi uzakugwala iziqalekiso lezi ogwalweni, azigezisele emanzini aletha isiqalekiso,

²⁴ anathise owesifazana amanzi la aletha ubuhlungu lesiqalekiso, amanzi angene kuye, aveze ubuhlungu.

²⁵ Umpristi uzakuthatha esandleni sowesifazana umnikelo wempuphu owenziwe ngenxa yobukhwele, awuzunguze phambi kweNkosi, awulethe ealtareni,

²⁶ acuphe impuphu encinyane ibe yisikhumbuzo, ayitshise ealtareni, andubana amnathise owesifazana amanzi.

²⁷ Esemnathisile amanzi, kuzakuthi uba ezingcolisile, engathembekanga endodeni yakhe, wafeba, amanzi aletha isiqalekiso esengenile kuye aveze ubuhlungu, amenze ukuba aphumise isisu, yena abe yisinengiso phakathi kwabakibo.

²⁸ Kodwake uba owesifazana engazigcolisanga, kodwa ehlambulukile, uzakukhululeka, abelethe abantwana.

²⁹ Lo ngumlayo omayelana lezindaba zobukhwele, lapho umfazi esesendodeni yakhe eduha, azingcolise,

³⁰ lalapho indoda ifikelwa ngumoya wobukhwele ngomkayo; izakummisa owesifazana phambi kweNkosi, ukuba umpristi enze kuye njengomlayo lo wonke.

³¹ Indoda izakuba ngongelacala, kodwa owesifazana uzakuba lecala.