AmaNani 34 - iBhayibhili Elingcwele 1978

¹ INkosi yathi kuMose:

² Laya abantu bakoIsrayeli uthi kubo: Lapho lingena elizweni laseKanani, ilizwe lizakuba ngelenu; nanti ilizwe laseKanani lemingcele yalo.

³ Isigaba saseningizimu sizakusuka enkangala yaseZini, ngasemkhawulweni welaseEdoma, lomngcele wenu waseningizimu uzasuka ekucineni koLwandle lweTshwayi ngasempumalanga.

⁴ Uzakuya ngaseningizimu emqansweni weAkirabimi, udlulele eZini, ufike eningizimu kweKadeshi‐Barneya; uzaqhubeka uye eHazari‐Adari, uze ufike eAzimoni;

⁵ uzakuphenduka eAzimoni uye esifuleni saseGibithe, uphelele olwandle.

⁶ Umngcele wasentshonalanga uzakuba luLwandle olukhulu; lona luzakuba ngumngcele wenu ngasentshonalanga.

⁷ Umngcele wenu wasenyakatho uzakuba yilo; dwebani umzila wenu kusukela oLwandle olukhulu kusiya entabeni yaseHori;

⁸ kusukela entabeni yaseHori dwebani umzila oya ngasekungeneni kweHamathi, umngcele ucine eZedadi;

⁹ uzasuka lapho uye eZifroni, ucine eHazarenani. Lo uzakuba ngumngcele wenu wasenyakatho.

¹⁰ Dwebani umzila womngcele wenu wasempumalanga, kusukela eHazarenani kusiya eShefamu;

¹¹ umngcele uzakwehlela eShefamu uye eRibila ngasempumalanga kwaseAyini, wehle njalo uze ufike ngasempumalanga koLwandle lwaseKinerethi;

¹² uzakwehlela eJordani, uphelele oLwandle lweTshwayi. Leli lizakuba yilizwe lakini lemingcele yalo inxa zonke.

¹³ UMose waselaya abakoIsrayeli wathi: Leli yilizwe elizakwabelana lona ngenkatho, iNkosi elaye ngalo ukuba linikwe izizwe ezificamunwemunye lengxenye yesizwe.

¹⁴ Ngoba isizwe sabakoRubeni ngezindlu zaso, lesizwe sabakoGadi ngezindlu zaso, lengxenye yesizwe sakoManase sezizuzile ilizwe lazo.

¹⁵ Izizwe lezo ezimbili lengxenye yesizwe sezizuzile ilizwe lazo ngaphetsheya kweJordani, maqondana leJeriko, ngasempumalanga.

¹⁶ INkosi yathi kuMose:

¹⁷ Nanka amabizo amadoda azakulabela ilizwe libe ngelenu, uEleyazare umpristi loJoshuwa indodana kaNuni.

¹⁸ Lizathatha isikhulu kuleso lalesosizwe ukwahlukanisa ilizwe libe ngelenu.

¹⁹ Nanka amabizo amadoda; esizweni sakoJuda, uKalebi indodana kaJefune.

²⁰ Esizweni sakoSimeyoni, uShemuweli indodana kaAmihudi.

²¹ Esizweni sakoBenjamini, uElidadi indodana kaKisiloni.

²² Esizweni sabakoDani, yisikhulu uBuki indodana kaJogili.

²³ KwabakoJosefa, esizweni sabakoManase, yisikhulu uHaniyeli indodana kaEfodi.

²⁴ Esizweni sabakoEfrayimi, yisikhulu uKemuweli indodana kaShifitani.

²⁵ Esizweni sabakoZebuluni, yisikhulu uElizafani indodana kaParinaki.

²⁶ Esizweni sabakoIsakari, yisikhulu uPalitiyeli indodana kaAzani.

²⁷ Esizweni sabakoAsheri, yisikhulu uAhiyudi indodana kaShelomi.

²⁸ Esizweni sabakoNafitali, yisikhulu uPedaheli indodana kaAmihudi.

²⁹ Yibo labo iNkosi eyabalaya ukwahlukanisela abakoIsrayeli izindawo elizweni laseKanani.