AmaNani 32 - iBhayibhili Elingcwele 1978

Ukuhlaliswa kwabakoRubeni labakoGadi labakoManase

¹ AbakoRubeni labakoGadi babelezinkomo ezinenginengi. Babona ukuthi amazwe aseJazeri lelizwe laseGileyadi ayezindawo zokwalusela.

² Ngakho abakoRubeni labakoGadi beza bakhuluma loMose loEleyazare umpristi lezikhulu zebandla,

³ bathi: IAtarothi leDiboni leJazeri leNimra leHeshiboni leEleyale leSebamu leNebo leBeyoni,

⁴ ilizwe iNkosi eyalinqoba phambi kwebandla lakoIsrayeli, liyilizwe lokwalusela; futhi thina zinceku zenu sifuyile.

⁵ Uba sifumene umusa emehlweni enu, ilizwe leli kaliphiwe thina zinceku zenu libe ngelethu; lingasiwezi iJordani.

⁶ Kodwa uMose wathi kubo abakoGadi labakoRubeni: Abakini bazakuphuma impi, lisale lapha lina na?

⁷ Lizadaniselani inhliziyo zabakoIsrayeli ukuba bangaweli ukuya elizweni iNkosi ebanike lona na?

⁸ Yikho lokho abakwenzayo oyihlo mhla ngibathuma besuka eKadeshi‐Barneya ukuyabona ilizwe.

⁹ Ngoba ekuhambeni kwabo ukuya esihotsheni saseEshikoli, babona ilizwe, basebedanisa inhliziyo zabakoIsrayeli ukuze bangangeni elizweni iNkosi eyayibanike lona.

¹⁰ Ngalolusuku iNkosi yathukuthela, yafunga yathi:

¹¹ Impela kulabo abaphuma eGibithe abaleminyaka engamatshumi amabili lengaphezulu kakuyikuba loyedwa ozakubona ilizwe engafunga ukulinika uAbrahama loIsaka loJakobe, ngoba kabangilandelanga ngokupheleleyo;

¹² kakuyikuba loyedwa ngaphandle kukaKalebi indodana kaJefune umKenizi, loJoshuwa indodana kaNuni, ngoba balandele iNkosi ngokupheleleyo.

¹³ Intukuthelo yeNkosi yabavuthela abakoIsrayeli, yabazulisa enkangala iminyaka engamatshumi amane, kwaze kwaphela lesosizukulwana sonke esasenzile okubi emehlweni eNkosi.

¹⁴ Khangelani, selilingisa oyihlo, ngoba liyinzalo yabantu abonayo, liyavusa futhi intukuthelo yeNkosi evuthela uIsrayeli.

¹⁵ Ngoba uba lisala ukuyilandela, izakuphinda ibatshiye enkangala; lizabalethela ukubhujiswa bonke lababantu.

¹⁶ Basebesondela kuye bathi: Sizakwakhela lapha izimvu zethu izibaya labantwana bethu imizi;

¹⁷ kodwa thina sizakuhloma ukuba sihole abakoIsrayeli, size sibafikise endaweni yabo, abantwana bethu bangahlala emizini ebiyelweyo bevikelekile ebantwini belizwe.

¹⁸ Kasiyikubuyela emizini yethu, omunye lomunye wabakoIsrayeli engakazuzi ilizwe libe yilifa lakhe.

¹⁹ Ngoba kasiyikwamukela kubo ilizwe ngaphetsheya kweJordani langaphambili, ngoba sesiphiwe elethu nganeno kweJordani ngasempumalanga.

²⁰ UMose wasesithi kubo: Uba lisenza njengokutsho kwenu lihlome, liphume impi lilwe phambi kweNkosi,

²¹ beselichapha iJordani lina lonke elihlomileyo phambi kweNkosi lihlale khona, ize ixotshe zonke izitha zayo phambi kwayo,

²² lelizwe linqotshwe phambi kwayo, ng’khona emva kwalokho lizakubuya, lingabi lamlandu eNkosini lakuIsrayeli; lelilizwe lizakuba yilifa lenu phambi kweNkosi.

²³ Kodwake uba lingenzi njalo, lizabe lonile eNkosini; yazini ukuthi isono senu sizakuba phezu kwenu.

²⁴ Yakhelani abantwana benu imizi lezimvu zenu izibaya, kodwa yenzani lokho elikuthembisileyo.

²⁵ AbakoGadi labakoRubeni bathi kuMose: Thina zinceku zakho sizakwenza njengokutsho kwakho.

²⁶ Abantwana bethu, labomkenu, lezimvu zethu, lazo zonke inkomo zethu kuzakusala emizini yaseGileyadi;

²⁷ kodwa thina zinceku zakho sizakuchapha phambi kweNkosi, thina sonke sizahloma silwe, njengokulaya kwakho.

²⁸ UMose waselayezela ngabo uEleyazare umpristi, loJoshuwa indodana kaNuni, lezinhloko zezindlu zezizwe zabakoIsrayeli.

²⁹ UMose wathi kubo: Uba abakoGadi labakoRubeni, bonke abahlomileyo phambi kweNkosi, bechapha lani iJordani, lelizwe linqotshwe yini, lizakubanika ilizwe laseGileyadi libe ngelabo.

³⁰ Kodwa uba bengahlomi bachaphe lami, bazakunikwa ilizwe phakathi kwenu elizweni laseKanani.

³¹ AbakoGadi labakoRubeni baphendula bathi: Njengalokhu iNkosi itshilo kithi izinceku zakho, sizakwenza njalo;

³² sizahloma sichaphe phambi kweNkosi, singene elizweni laseKanani; sizakuba lelizwe lethu ngapha ngaphetsheya kweJordani.

³³ UMose wasenika abakoGadi labakoRubeni lengxenye yesizwe sakoManase, indodana kaJosefa, umbuso kaSihoni inkosi yamaAmori, lombuso kaOgi inkosi yaseBashani, lelizwe lonke kanye lemizi ephakathi kwalo inxa zonke.

³⁴ AbakoGadi bakha iDiboni leAtarothi leAroweri

³⁵ leAtirothi‐Shofani leJazeri leJogibeha,

³⁶ leBeti‐Nimra leBeti‐Harani, imizi ebiyelweyo, lezibaya zezimvu.

³⁷ AbakoRubeni bakha iHeshiboni leElayale leKiriyathayimi

³⁸ leNebo leBali‐Meyoni — sekuphendulwe amabizo ayo — leSibima; bayibiza imizi abayakhayo ngamanye amabizo.

³⁹ Amadodana kaMakiri indodana kaManase, ahlasela iGileyadi, alinqoba, achitha amaAmori ayekulo.

⁴⁰ UMose wanika uMakiri indodana kaManase iGileyadi, wakha kilo.

⁴¹ UJayiri indodana kaManase wayahlasela imizi elitshumi, wayithumba, wayibiza ngokuthi yiHavothi‐Jayiri.

⁴² UNoba wayahlasela iKenathi, walithumba lemizana yalo, walibiza ngokuthi yiNoba ngebizo lakhe.