AmaNani 31 - iBhayibhili Elingcwele 1978

Ukuphindisela kwabakoIsrayeli kumaMidiyani

¹ INkosi yathi kuMose:

² Baphindiselele abakoIsrayeli kumaMidiyani, andubana ulandele abakini.

³ UMose wathi ebantwini: Abanye benu kabahlomele impi ukuba balwe lamaMidiyani, baphindiselele iNkosi kumaMidiyani.

⁴ Thumelani empini abayinkulungwane kuleso lalesosizwe sakoIsrayeli.

⁵ Kwasekuphuma ezigidini zakoIsrayeli abazinkulungwane ezilitshumi lambili zihlomile, kwaba yinkulungwane kuleso lalesosizwe.

⁶ UMose wabathumela empini, kwaba yinkulungwane kuleso lalesosizwe, kanye loFiniyasi indodana kaEleyazare umpristi, owayephethe izitsha zendlu engcwele lempondo zokuhlaba umkhosi.

⁷ Balwa lamaMidiyani, njengokutsho kweNkosi kuMose, babulala bonke abesilisa.

⁸ Babulala njalo lamakhosi amahlanu aseMidiyani, oEvi loRekemi loZuri loHuri loReba; loBalami indodana kaBeyori bambulala ngomkhonto.

⁹ AbakoIsrayeli bathumba abesifazana bamaMidiyani labantwana babo lenkomo zawo zonke, lezimvu zawo, lempahla yawo yonke, kwaba yimpango yabo.

¹⁰ Batshisa ngomlilo yonke imizi ayehlala kiyo, lazo zonke izihonqo zawo.

¹¹ Bathatha yonke impango layo yonke impahla, abantu lezifuyo,

¹² baletha abathunjiweyo, lempango, lempahla kuMose lakuEleyazare umpristi, lakulo ibandla labakoIsrayeli, ezihonqweni emagcekeni aseMowabi, ngaseJordani eduze leJeriko.

¹³ UMose loEleyazare umpristi lezikhulu zonke zebandla baphuma ukuyabahlangabeza ngaphandle kwezihonqo.

¹⁴ UMose wathukuthelela izinduna zempi, izinduna zezinkulungwane lezinduna zamakhulu ezazivela empini.

¹⁵ UMose wathi kuzo: Liyekele abesifazana bonke ukuba baphile na?

¹⁶ Kanti yibo abenza abakoIsrayeli benze okubi eNkosini endabeni yasePeyori ngeseluleko sikaBalami, kwaze kwafika umkhuhlane phakathi kwebandla leNkosi.

¹⁷ Ngakhoke bulalani bonke abantwana besilisa, libulale labo bonke abesifazana abalele lamadoda;

¹⁸ kodwa wonke amankazana angalalanga lamadoda liwayekele ukuba aphile, abe ngawenu.

¹⁹ Lizahlala ngaphandle kwezihonqo insuku eziyisikhombisa, lina lonke elibulele abantu, lani elithinte isidumbu, lizihlambulule lina labathunjiweyo benu ngosuku lwesithathu langosuku lwesikhombisa,

²⁰ lihlambulule zonke ingubo, lezinto zonke ezenziweyo ngesikhumba, lakho konke okwenziweyo ngoboya bembuzi, lezinto zonke ezenziweyo ngesihlahla.

²¹ UEleyazare umpristi wathi kumabutho ayephumile impi: Lokhu kuyisimiso somlayo iNkosi emlaye ngaso uMose yathi:

²² Kuphela igolide lesiliva lethusi lensimbi lethini lomnuso,

²³ konke okungelakutshiswa ngumlilo, lizakukufaka emlilweni, kuhlambuluke; kodwa ezinye izinto zizahlanjululwa ngamanzi. Konke okungatshiswa ngumlilo lizakukufaka emanzini.

²⁴ Gezisani ingubo zenu ngosuku lwesikhombisa, lihlambuluke, andubana lingene ezihonqweni.

Ukwahlukaniswa kwempango

²⁵ INkosi yathi kuMose:

²⁶ Wena, loEleyazare umpristi, lezinhloko zezindlu zebandla, balani impango ethunjiweyo, abantu lezifuyo;

²⁷ liyahlukanise ngokulinganayo phakathi kwamabutho aphuma impi lebandla lonke.

²⁸ Theliselani iNkosi amabutho ayephumile impi, kube kunye emakhulwini wonke amahlanu awabantu lawezinkomo lawabobabhemi lawezimvu,

²⁹ likuthathe engxenyeni yawo, likunike uEleyazare umpristi kube ngumnikelo weNkosi.

³⁰ Thathani engxenyeni yabakoIsrayeli kube kunye ematshumini wonke amahlanu, awabantu lawezinkomo lawabobabhemi lawezimvu lawezifuyo zonke, likunike amaLevi alondoloza iTabernakeli leNkosi.

³¹ UMose loEleyazare umpristi benza njengokulaya kweNkosi kuMose.

³² Impango eyayisele kulokho okwathathwa ngamabutho yayiyizimvu ezizinkulungwane ezingamakhulu ayisithupha lamatshumi ayisikhombisa lanhlanu,

³³ lenkomo ezizinkulungwane ezingamatshumi ayisikhombisa lambili,

³⁴ labobabhemi abazinkulungwane ezingamatshumi ayisithupha lanye,

³⁵ labantu abazinkulungwane ezingamatshumi amathathu lambili, ngitsho abesifazana abangalalanga lamadoda.

³⁶ Ingxenye eyisabelo sababephumile impi yayiyizimvu ezizinkulungwane ezingamakhulu amathathu lamatshumi amathathu lesikhombisa, lamakhulu amahlanu;

³⁷ isabelo seNkosi sezimvu sasingamakhulu ayisithupha, lamatshumi ayisikhombisa lanhlanu.

³⁸ Inkomo zazizinkulungwane ezingamatshumi amathathu lesithupha; isabelo seNkosi kuzo sasingamatshumi ayisikhombisa lambili.

³⁹ Obabhemi babezinkulungwane ezingamatshumi amathathu, lamakhulu amahlanu; isabelo seNkosi kubo sasingamatshumi ayisithupha lanye.

⁴⁰ Abantu babezinkulungwane ezilitshumi lesithupha; isabelo seNkosi kubo sasingamatshumi amathathu lambili.

⁴¹ UMose wamnika uEleyazare umpristi isabelo seNkosi esasingumnikelo wayo, njengokutsho kwayo kuye.

⁴² Ingxenye yabakoIsrayeli, uMose ayehlukanise leyamabutho ayephumile impi,

⁴³ leyongxenye, eyebandla, yayiyizimvu ezizinkulungwane ezingamakhulu amathathu lamatshumi amathathu lesikhombisa, lamakhulu amahlanu,

⁴⁴ lezinkomo ezizinkulungwane ezingamatshumi amathathu lesithupha,

⁴⁵ labobabhemi abazinkulungwane ezingamatshumi amathathu, lamakhulu amahlanu,

⁴⁶ labantu abazinkulungwane ezilitshumi lesithupha.

⁴⁷ Kuyo ingxenye yabakoIsrayeli uMose wathatha kwaba kunye ematshumini wonke amahlanu, awabantu lawezifuyo, wakunika amaLevi ayelondoloza iTabernakeli leNkosi, njengokutsho kweNkosi kuye.

⁴⁸ Izinduna ezaziphethe amabutho empi, izinduna zezinkulungwane lezinduna zamakhulu, zasezisondela kuMose,

⁴⁹ zathi kuye: Thina zinceku zakho sesibalile amabutho esiwaphathayo; kakulamuntu ongekho.

⁵⁰ Futhi silethile izinto zegolide, ilowo lalowomuntu azifumeneyo, zibe ngumnikelo weNkosi, izigqizo, lamasongo lezindandatho, lamacici, lamangqongqo, ukuba sizenzele indlela yokubuyisana phambi kweNkosi.

⁵¹ UMose loEleyazare umpristi bamukela igolide lelo, zonke izinto eziligugu.

⁵² Lonke igolide lalokho okwanikelwa eNkosini yizinduna zezinkulungwane lezinduna zamakhulu lalingamashekeli azinkulungwane ezilitshumi lesithupha, lamakhulu ayisikhombisa, lamatshumi amahlanu.

⁵³ Wonke amadoda ayethethe impango.

⁵⁴ UMose loEleyazare umpristi bamukela igolide ezinduneni zezinkulungwane lezinduneni zamakhulu, baliletha ethenteni lokuhlangana, laba yisikhumbuzo sabakoIsrayeli phambi kweNkosi.