AmaNani 30 - iBhayibhili Elingcwele 1978

Umlayo omayelana lezifungo zabesifazana

¹ UMose wasekhuluma lezinhloko zezizwe zabakoIsrayeli, wathi: Yilokhu iNkosi elaye ngakho ukuthi:

² Nxa umuntu ethembisa isithembiso eNkosini, loba efunga isifungo, ezibopha ngesibambiso, kangephuli ilizwi lakhe; umele ukwenza konke akuthembisileyo ngomlomo wakhe.

³ Futhi nxa owesifazana efunga isifungo eNkosini, azibophe ngesibambiso esemutsha, esesemzini kayise,

⁴ loyise ezwe ngesifungo sakhe langesibambiso sakhe azibophe ngaso, kodwa engatsho lutho kuye, zonke izifungo zakhe zizakuma, lazo zonke izibambiso azibophe ngazo zizasebenza.

⁵ Kodwake uba uyise, ekuzweni kwakhe lokho, emtshela ukuthi kavumi, kakuyikusebenza lesisodwa sezifungo zakhe lesisodwa sezibambiso azibophe ngazo; leNkosi izakumyekela, ngoba uyise engavumi.

⁶ Uba owesifazana esenda esazibophe ngesifungo sakhe, loba esazibophe ngesithembiso asithembise ngokungananzeleli,

⁷ lendoda yakhe ibisikuzwa, kodwa ingatsho lutho kuye lapho ikuzwa lokho, izithembiso zakhe zizakusebenza, lezibambiso azibophe ngazo zizakusebenza.

⁸ Kodwake uba indoda yakhe imtshela lapho ikuzwa ukuthi kayivumi, izakwenza isifungo asenzileyo sibe yize, lesithembiso asithembise ngokungananzeleli azibophe ngaso, sibe yize; leNkosi izakumyekela.

⁹ Kodwa isifungo somfelwakazi loba isifungo sowehlukene lendoda yakhe, lakho konke azibophe ngakho, kuzakusebenza.

¹⁰ Uba enzile isithembiso endlini yendoda yakhe, loba efungile isifungo, ezibophile ngesibambiso,

¹¹ lendoda yakhe ibisikuzwa, kodwa ingatsho lutho kuye, ingamaleli, zonke izifungo zakhe zizakusebenza, lazo zonke izibambiso azibophe ngazo zizakusebenza.

¹² Kodwa uba indoda yakhe izala lapho izizwa, konke akutshoyo kakuyikusebenza, loba izithembiso zakhe loba izibambiso zakhe; indoda yakhe izalile, leNkosi izakumyekela.

¹³ Zonke izifungo lazo zonke izithembiso zokuzithoba, indoda yakhe ingazivuma loba izale.

¹⁴ Kodwa uba indoda yakhe ingatsho lutho kuye ngalolosuku langosuku olulandelayo, lokhu kutsho ukuthi iyazivuma zonke izifungo zakhe lazo zonke izibambiso zakhe; impela izivumile, ngoba kayitshongo lutho lapho izizwa.

¹⁵ Kodwa uba izala lapho isizizwile, izakuba lomlandu.

¹⁶ Lezi yizimiso iNkosi eyamlaya zona uMose mayelana lomuntu lomkakhe, loyise lendodakazi yakhe isentsha emzini kayise.