AmaNani 3 - iBhayibhili Elingcwele 1978

Imisebenzi yamaLevi

¹ Lezi yizizukulwana zikaAroni lezikaMose ngesikhathi sokukhuluma kweNkosi kuMose entabeni yaseSinayi.

² Nanka amadodana kaAroni; uNadabi izibulo, loAbihu, loEleyazare, loIthamari;

³ yiwo lawo amabizo amadodana kaAroni, abapristi abagcotshiweyo, abahlukaniselwa ukukhonza enkonzweni yobupristi.

⁴ Kodwake uNadabi loAbihu bafa phambi kweNkosi, lapho benikela umlilo ongafanelanga phambi kweNkosi enkangala yaseSinayi. Babengelabantwana; ngakho uEleyazare loIthamari baphatha umsebenzi wobupristi phansi kukaAroni uyise.

⁵ INkosi yasisithi kuMose:

⁶ Sondeza isizwe sakoLevi, usikhethele ukusiza uAroni umpristi lokumsebenzela.

⁷ Bazakumsiza yena lebandla lonke emisebenzini yabo phambi kwethente lokuhlangana nxa besenza inkonzo eTabernakelini.

⁸ Bazalondoloza yonke impahla yethente lokuhlangana, benzele abantu bakoIsrayeli imisebenzi nxa besenza inkonzo eTabernakelini.

⁹ Uzakunikela amaLevi kuAroni lasemadodaneni akhe; azakunikelwa kuye ngokupheleleyo ngabantu bakoIsrayeli.

¹⁰ Uzakubeka uAroni lamadodana akhe ukuba benze umsebenzi wabo wobupristi. Kodwa uba kusondela omunye umuntu, uzabulawa.

¹¹ INkosi yathi kuMose:

¹² Khangela, sengizikhethele amaLevi phakathi kwabantu bonke bakoIsrayeli endaweni yawo wonke amadodana angamazibulo abo bonke abesifazana. AmaLevi azakuba ngawami,

¹³ ngoba wonke amadodana angamazibulo abangawami ngalolosuku engabulala ngalo wonke amazibulo eGibithe. Ngakho ngazahlukanisela wonke amazibulo koIsrayeli, awabantu lawezifuyo; azakuba ngawami; mina ngiyiNkosi.

¹⁴ INkosi yathi kuMose enkangala yaseSinayi:

¹⁵ Bala abantwana bakaLevi ngezindlu zaboyise langensendo, ubale bonke abesilisa kusukela kulabo abalenyanga kusiya phezulu.

¹⁶ Ngakhoke uMose wababala njengokulaya kweNkosi.

¹⁷ Nanka amabizo amadodana kaLevi; uGerishoni loKohathi loMerari.

¹⁸ Nanka amabizo amadodana kaGerishoni ngensendo zawo; uLibini loShimeyi.

¹⁹ Amadodana kaKohathi ngensendo zawo ayengoAmramu loIzihari loHebroni loUziyeli.

²⁰ Amadodana kaMerari ngensendo zawo ayengoMahli loMushi. Lezi zinsendo zamaLevi ngezindlu zaboyise.

²¹ KuGerishoni kwavela usendo lwamaLibini losendo lwamaShimeyi; lezi zinsendo zamaGerishoni.

²² Inani labo bonke abesilisa ababalwayo, kusukela kulabo abalenyanga kusiya phezulu, lalizinkulungwane eziyisikhombisa lamakhulu amahlanu.

²³ Insendo zamaGerishoni zamisa emva kweTabernakeli ngasentshonalanga;

²⁴ isikhulu sendlu yamaGerishoni sasinguEliyasafi indodana kaLayeli.

²⁵ Umsebenzi wamadodana kaGerishoni ethenteni lokuhlangana wawuyikulondoloza iTabernakeli, lethente, lesifulelo salo, leveli lomnyango wethente lokuhlangana,

²⁶ lamakhetheni eguma, leveli lomnyango weguma elizingelezele iTabernakeli lealtare, lezintambo zazo zonke lezizinto.

²⁷ KuKohathi kwavela usendo lwamaAmramu, losendo lwamaIzihari, losendo lwamaHebroni, losendo lwamaUziyeli. Lezi zinsendo zamaKohathi.

²⁸ Inani labo bonke abesilisa ababalwayo, kusukela kulabo abalenyanga kusiya phezulu, lalizinkulungwane ezificaminwembili lamakhulu ayisithupha; benza imisebenzi yendlini engcwele.

²⁹ Insendo zamadodana kaKohathi zamisa ngaseningizimu kweTabernakeli,

³⁰ isikhulu sawo sasinguElizafani indodana kaUziyeli.

³¹ Umsebenzi wabo uzakuba yikulondoloza umtshokotsho wesivumelwano, letafula, loluthi lwesibane, lama‐altare, lezitsha zendlu engcwele abakhonza ngazo abapristi, leveli lazo zonke izinto zalo.

³² Umphathi wazo zonke izikhulu zamaLevi kwakunguEleyazare, indodana kaAroni umpristi, wayephethe labo abalondoloza indlu engcwele.

³³ KuMerari kwavela usendo lwamaMahli losendo lwamaMushi; lezi zinsendo zamaMerari.

³⁴ Inani labo bonke abesilisa ababalwayo, kusukela kulabo abalenyanga kusiya phezulu, lalizinkulungwane eziyisithupha lamakhulu amabili.

³⁵ Isikhulu sabo sasinguZuriyeli indodana kaAbihayili. Bamisa ngasenyakatho kweTabernakeli.

³⁶ Umsebenzi wamadodana kaMerari wawuyikulondoloza imijabo yeTabernakeli, lemithando yalo, lensika zalo, lenyawo zalo, kanye lezitsha zalo, layo yonke impahla yalo,

³⁷ kanye lensika zeguma inxa zonke, lenyawo zazo, lezikhonkwane zazo, lezintambo zazo.

³⁸ Labo ababemise phambi kweTabernakeli ngasempumalanga, phambi kwethente lokuhlangana, kwakungoMose loAroni lamadodana akhe, balondoloza inkonzo zasendlini engcwele, benzela abakoIsrayeli okufaneleyo. Bonke abasondela lapho babulawa.

³⁹ Bonke abesilisa bamaLevi ababalwa ngensendo, kusukela kulabo abalenyanga kusiya phezulu, bebalwa nguMose njengokulaya kweNkosi, babezinkulungwane ezingamatshumi amabili lambili.

Ihlawulo ngamazibulo

⁴⁰ INkosi yasisithi kuMose: Bala wonke amazibulo esilisa abantu bakoIsrayeli, kusukela kulabo abalenyanga kusiya phezulu, ubabale ngamabizo.

⁴¹ Uzakunikela amaLevi kimi engiyiNkosi, endaweni yawo wonke amadodana angamazibulo abakoIsrayeli, unikele kimi lezinkomo zamaLevi endaweni yamazibulo wonke ezinkomo zabakoIsrayeli.

⁴² Ngakhoke uMose wabala wonke amazibulo abakoIsrayeli, njengokutsho kweNkosi kuye.

⁴³ Wonke amazibulo esilisa abalwa ngamabizo, kusukela kulawo alenyanga kusiya phezulu, ayezinkulungwane ezingamatshumi amabili lambili, lamakhulu amabili, lamatshumi ayisikhombisa lantathu.

⁴⁴ INkosi yathi kuMose:

⁴⁵ Thatha amaLevi endaweni yamazibulo abakoIsrayeli, lezinkomo zamaLevi endaweni yezinkomo zabo; amaLevi azakuba ngawami; ngiyiNkosi.

⁴⁶ Ukuba bahlengwe labo abangamakhulu amabili lamatshumi ayisikhombisa lantathu bamazibulo abakoIsrayeli, abadlula inani lamaLevi,

⁴⁷ uzakuthatha amashekeli amahlanu ngamunye, uwabale ngokweshekeli lendlu engcwele, elilingana lamagera angamatshumi amabili,

⁴⁸ umnike uAroni lamadodana akhe imali le ibe lihlawulo ngalabo abadlula inani lamaLevi.

⁴⁹ Ngakhoke uMose wasethatha imali yaba lihlawulo lalabo ababengaphezu kwabahlengwe ngamaLevi.

⁵⁰ Imali ayithathayo yayingamashekeli ayinkulungwane, lamakhulu amathathu, lamatshumi ayisithupha lanhlanu, kubalwa ngokweshekeli lendlu engcwele;

⁵¹ uMose wayinika uAroni lamadodana akhe njengokulaya kweNkosi.