AmaNani 23 - iBhayibhili Elingcwele 1978

¹ UBalami wathi kuBalaki: Ngakhela lapha ama‐altare ayisikhombisa, ungilungisele inkunzi eziyisikhombisa lenqama eziyisikhombisa.

² UBalaki wenza njengokutsho kukaBalami, wanikela kulelo lalelo ialtare ngenkunzi lenqama.

³ UBalami wathi kuBalaki: Mana ngasemnikelweni wakho wokutshiswa, ngihambe mina; mhlawumbe iNkosi izafika ukungihlangabeza; lokho engitshengisa khona ngizakukutshela. Waya entabeni eligceke.

⁴ UNkulunkulu wahlangana loBalami; uBalami wathi kuye: Sengilungisile ama‐altare ayisikhombisa, nganikela kulelo lalelo ialtare ngenkunzi lenqama.

⁵ INkosi yafaka ilizwi emlonyeni kaBalami, yathi: Buyela kuBalaki, ukhulume lokhu kuye.

⁶ Wabuyela kuye, wambona emi ngasemnikelweni wakhe wokutshiswa kanye lazo zonke izikhulu zaseMowabi.

⁷ UBalami waseqala ukuhuba ihubo lakhe wathi: UBalaki ungilandile eAramu, inkosi yaseMowabi ezintabeni zasempumalanga; wathi: Woza ungiqalekisele uJakobe, woza ungithukele uIsrayeli.

⁸ Ngingamqalekisa kanjani ongaqalekiswanga nguNkulunkulu na? ngingamthuka kanjani ongathukwanga nguNkulunkulu na?

⁹ Ngoba ngisengqongeni yezintaba ngiyambona, ngisezintabeni ngiyambona. Khangela, bangabantu abahlala bodwa, abangabalwayo phakathi kwezizwe.

¹⁰ Ngubani ongabala amabandla kaJakobe, abale izimpi zikaIsrayeli na? Kangife ukufa kolungileyo, lokuphela kwami kube njengokwakhe!

¹¹ UBalaki wathi kuBalami: Wenzeni kimi na? Ngikuthethe ukuba uqalekise izitha zami, kodwa uzibusisile kakhulu.

¹² Waphendula wathi: Kakufanelanga yini ukuba ngiqaphele ukukhuluma lokho iNkosi ekufaka emlonyeni wami na?

¹³ UBalaki wathi kuye: Akungilandele, siye kwenye indawo ukuba ubabone; uzakubona labo abaseduze kuphela, ungaboni bonke; ungiqalakisele bona kuleyondawo.

¹⁴ Wamusa eNsimini yabalindi, engqongeni iPisiga; wakha amaaltare ayisikhombisa, wanikela ngenkunzi lenqama phezu kwalelo lalelo ialtare.

¹⁵ UBalami wathi kuBalaki: Mana lapha ngasemnikelweni wakho wokutshiswa, mina ngihlangane leNkosi laphayana.

¹⁶ INkosi yasihlangana loBalami, yafaka ilizwi emlonyeni wakhe, yathi: Buyela kuBalaki, ukhulume lokhu kuye.

¹⁷ UBalami wabuyela kuye, wambona emi ngasemnikelweni wakhe wokutshiswa kanye lazo zonke izikhulu zaseMowabi. UBalaki wathi kuye: INkosi itheni?

¹⁸ UBalami waseqala ukuhuba ihubo lakhe wathi: Vuka, Balaki, uzwe, ungilalele, wena ndodana kaZipori.

¹⁹ UNkulunkulu kafanani lomuntu ukuba aqambe amanga, kasuye umuntu ukuba azisole. Utshilo, kanti kayikukwenza na? Ukhulumile, kanti kayikukuphelelisa na?

²⁰ Khangela, ngilayiwe ukubusisa; ngizabusisa, kangilamandla mina okukubuyisa.

²¹ Ububi kabufunyaniswanga kuJakobe, lokuhlupheka kakubonakalanga kuIsrayeli. INkosi uNkulunkulu wabo ilabo, kumenyezelwa phakathi kwabo ukuthi iyinkosi.

²² UNkulunkulu wabakhupha eGibithe, kubo ulamandla njengenyathi.

²³ Kakulamilingo kuJakobe, kakulakuvumisa kuIsrayeli. Khathesi kuzakutshiwo ngoJakobe langoIsrayeli ukuthi: Khangela ukuthi uNkulunkulu wenzeni!

²⁴ Khangela, nampa abantu abavukayo njengesilwane esisikazi, abaquthayo njengesilwane; kasilali singakadli impango, singakanathi igazi lababuleweyo.

²⁵ UBalaki wasesithi kuBalami: Kulungile, ungabaqalekisi; kodwa ungababusisi njalo.

²⁶ Kodwa uBalami wathi kuBalaki: Kangikutshelanga yini ukuthi konke iNkosi ekutshoyo, ngimele ukukwenza na?

²⁷ UBalaki wathi kuBalami: Woza khathesi, ngizakukusa kwenye indawo; mhlawumbe lapho kungaba kuhle kuNkulunkulu ukuba ungiqalekisele bona.

²⁸ UBalaki wamkhwelisa uBalami engqongeni iPeyori ekhangele ngasenkangala.

²⁹ UBalami wathi kuBalaki: Ngakhela lapha ama‐altare ayisikhombisa, ungilungisele inkunzi eziyisikhombisa lenqama eziyisikhombisa.

³⁰ UBalaki wenza njengokutsho kukaBalami, wanikela kulelo lalelo ialtare ngenkunzi lenqama.