AmaNani 20 - iBhayibhili Elingcwele 1978

Amanzi akhutshwa edwaleni

¹ Lonke ibandla labakoIsrayeli lafika enkangala yaseZini ngenyanga yokuqala; bahlala eKadeshi. UMiriyamu wafela lapho, wambelwa khona.

² Ibandla laswela amanzi lapho. Ngakho baxabana loMose loAroni.

³ Abantu baphikisana loMose bathi: Kungathi ngabe safa ekufeni kwabafowethu phambi kweNkosi!

⁴ Liletheleni ibandla leNkosi enkangala le ukuba sife lapha, thina lenkomo zethu na?

⁵ Lasikhuphelani eGibithe ukusiletha kulindawo embi na? Kakusiyo indawo yokulima amabele lemikhiwa lamavini lamapomegranati, futhi kakulamanzi okunatha.

⁶ UMose loAroni basebephuma ebandleni, baya emnyango wethente lokuhlangana, bathi mbo ngobuso phansi. Inkazimulo yeNkosi yabonakala kubo.

⁷ INkosi yathi kuMose:

⁸ Thatha intonga, ubuthanise ibandla, wena loAroni umfowenu, litshele idwala eliphambi kwabo ukuba likhuphe amanzi alo; ngalokhu lizakubakhuphela amanzi edwaleni, ukuze lilinathise ibandla lenkomo zabo.

⁹ UMose wathatha intonga phambi kweNkosi njengokutsho kwayo kuye.

¹⁰ UMose loAroni babuthanisa ibandla phambi kwedwala; wathi kubo: Zwaninike lina bahlamuki; sizakulikhuphela amanzi edwaleni leli na?

¹¹ UMose waphakamisa isandla sakhe, watshaya idwala kabili ngentonga yakhe; kwampompoza amanzi amanengi, ibandla lanatha kanye lenkomo zalo.

¹² INkosi yathi kuMose loAroni: Njengokuba lingangithembanga, lingangizivezanga ngingcwele emehlweni abakoIsrayeli, ngakho kaliyikungenisa ibandla leli elizweni engibanike lona.

¹³ La ngamanzi aseMeriba, lapho abantu bakoIsrayeli baphikisana khona leNkosi, yazibonakalisa kubo ukuthi ingcwele.

Inkosi yaseEdoma ivalela abakoIsrayeli indlela

¹⁴ UMose wathuma izigijimi enkosini yaseEdoma, zisuka eKadeshi, wathi: Umfowenu uIsrayeli uthi: Uyazazi zonke inkathazo ezisehleleyo,

¹⁵ lokuthi obaba behlela eGibithe, sahlala eGibithe isikhathi eside; amaGibithe asiphatha kubi thina labobaba.

¹⁶ Sakhala eNkosini, yasizwa, yathuma isithunywa sayo, yasikhupha eGibithe; khathesi sesilapha eKadeshi, umuzi osemkhawulweni welizwe lakho.

¹⁷ Ake usivumele ukuba sidabule elizweni lakho. Kasiyikudabula emasimini loba ezivinini, futhi kasiyikunatha amanzi emithombo. Sizakuhamba ngomgwaqo wenkosi, singaphambukeli ngakwesokunene langakwesokhohlo, size siphume elizweni lakho.

¹⁸ Kodwa abaseEdoma bathi kuye: Kawuyikudabula elizweni lethu, funa siphume sikuhlasele ngomkhonto.

¹⁹ AbakoIsrayeli bathi kubo: Sizakuhamba ngomgwaqo. Uba sinatha amanzi, thina lenkomo zethu, sizakukubhadala; kodwa lisivumele ukuba sidabule khona nje kuphela.

²⁰ Kodwa bathi: Atshi, kaliyikudabula. AbaseEdoma basebephuma ukubahlasela belabantu abanengi ngamandla amakhulu.

²¹ Ngalokhu abaseEdoma babalela abakoIsrayeli ukudabula elizweni labo. Ngakho abakoIsrayeli baphenduka bahamba ngenye indlela.

Ukufa kukaAroni entabeni yaseHori

²² Lonke ibandla labakoIsrayeli lasuka eKadeshi, lahamba lafika entabeni yaseHori.

²³ INkosi yathi kuMose loAroni entabeni yaseHori, ngasemkhawulweni welizwe laseEdoma:

²⁴ UAroni uzambelwa kwabaphansi, ngoba kayikungena elizweni engilinike abakoIsrayeli, ngoba lahlamuka elizwini lami ngasemanzini aseMeriba.

²⁵ Wena Mose, thatha uAroni loEleyazare indodana yakhe, ubakhwelise entabeni yaseHori,

²⁶ umhlubule uAroni izambatho zakhe, uzifake kuEleyazare indodana yakhe; uAroni uzakususwa, afe.

²⁷ UMose wenza njengokulaya kweNkosi. Bakhwela entabeni yaseHori phambi kwebandla lonke.

²⁸ UMose wamhlubula uAroni izambatho zakhe, wazifaka kuEleyazare indodana yakhe. UAroni wafela khona engqongeni yentaba. UMose loEleyazare basebesehla entabeni.

²⁹ Lapho lonke ibandla libona ukuthi uAroni usefile, yonke indlu kaIsrayeli yamlilela insuku ezingamatshumi amathathu.