AmaNani 16 - iBhayibhili Elingcwele 1978

Umvukela kaKora loDathani loAbiramu

¹ UKora kaIzihari kaKohathi kaLevi, loDathani loAbiramu amadodana kaEliyabi, loOni indodana kaPelethi, amadodana kaRubeni,

² bamvukela uMose belabanye bakoIsrayeli abangamakhulu amabili lamatshumi amahlanu, abangabakhokheli bebandla abantu abakhethiweyo, amadoda alodumo.

³ Babahlanganyela oMose loAroni, bathi kubo: Sesidiniwe ngani! Lonke ibandla lingcwele, labantu bonke bangcwele, leNkosi ikubo. Pho, liziphakamiselani phezu kwebandla leNkosi na?

⁴ Kwathi uMose esekuzwile, wathi mbo ngobuso phansi.

⁵ Wathi kuKora leqembu lakhe: Ekuseni iNkosi izatshengisa ukuthi ngubani ongowayo lokuthi ngubani ongcwele, imvumele ukuba asondele kuyo; lowo ezakumkhetha nguye ongasondela kuyo.

⁶ Yenzani lokhu; thathani imiganu yokutshisela impepha, wena Kora leqembu lakho lonke,

⁷ lifake kiyo umlilo, kusasa libeke kiyo impepha phambi kweNkosi. Lowomuntu iNkosi ezakumkhetha nguye ongcwele. Sesidiniwe ngani, madodana kaLevi!

⁸ UMose wathi kuKora: Zwanini, lina madodana kaLevi;

⁹ kuyinto encinyane kini yini ukuthi uNkulunkulu kaIsrayeli ulahlukanisile lebandla lakoIsrayeli ukuze alisondeze kuye ukuba lenze inkonzo yeTabernakeli leNkosi, lokuba lime phambi kwebandla ukulikhonza na?

¹⁰ Ukusondezile kuye, wena labafowenu bonke, amadodana kaLevi; selifisa lobupristi na?

¹¹ Ngalokho wena leqembu lakho lonke seliyihlanganyele iNkosi. Ngoba uAroni uyini ukuthi limsole na?

¹² UMose wathumela ilizwi ukubiza uDathani loAbiramu, amadodana kaEliyabi. Kodwa bathi: Kasiyikuza;

¹³ kuyinto encinyane yini ukuthi wasikhupha elizweni eligcwele uchago lenyosi ukusibulala enkangala, kanti usuzenza ube yisikhulu phezu kwethu na?

¹⁴ Futhi kawusingenisanga elizweni eligcwele uchago lenyosi, kawusinikanga ilifa lamasimu lezivini. Ungakhohlisa abantu abanjengathi na? Atshi, kasiyikuza.

¹⁵ UMose wathukuthela kakhulu, wathi eNkosini: Ungananzi umnikelo wabo. Kangithathanga loyedwa wabobabhemi babo; futhi kangilimazanga muntu kubo.

¹⁶ UMose wasesithi kuKora: Kusasa woza wena leqembu lakho lonke loAroni phambi kweNkosi;

¹⁷ omunye lomunye wenu athathe umganu wakhe wokutshisela impepha, afake kuwo impepha, awulethe phambi kweNkosi, kube lemiganu engamakhulu amabili lamatshumi amahlanu; lawe njalo ulethe umganu wakho, loAroni alethe owakhe.

¹⁸ Bonke basebethatha, kwaba yilowo lalowo umganu wakhe wokutshisela impepha, bafaka kuyo umlilo, babeka kiyo impepha, bema ngasemnyango wethente lokuhlangana kanye loMose loAroni.

¹⁹ UKora wasebuthanisa lonke ibandla ukumelana labo ngasemnyango wethente lokuhlangana. Inkazimulo yeNkosi yabonakala kulo lonke ibandla.

²⁰ INkosi yathi kuMose loAroni:

²¹ Zahlukaniseni lalelibandla ukuba ngibachithe khathesinje.

²² Bathi mbo ngobuso phansi bathi: Nkulunkulu, Nkulunkulu wemimoya yakho konke okuphilayo, uzathukuthelela ibandla lonke ngenxa yokona komuntu munye na?

²³ INkosi yathi kuMose:

²⁴ Tshono ebandleni uthi: Phumani ngasemzini kaKora loDathani loAbiramu.

²⁵ UMose wasukuma, waya kuDathani loAbiramu, labalisa bakoIsrayeli bamlandela.

²⁶ Wathi ebandleni: Ake lisuke emathenteni alababantu ababi, lingathinti lutho olwabo, funa lani liphetshulwe ngenxa yezono zabo.

²⁷ Basebephuma emizini yaboKora loDathani loAbiramu; uDathani loAbiramu baphuma, bema ngaseminyango yamathente abo kanye labomkabo lamadodana abo labantwana babo.

²⁸ UMose wathi: Ngalokhu lizakwazi ukuthi iNkosi ingithumile ukwenza yonke limisebenzi, lokuthi lokhu kakusikho okwentando yami.

²⁹ Uba lababantu besifa ngokufa okwehlela phezu kwabantu bonke, kakusiyo iNkosi engithumileyo.

³⁰ Kodwa uba iNkosi isenza into entsha, ukuba umhlaba uvuleke, ubaginye kanye lakho konke okwabo, behlele endaweni yabafileyo bephila, lizakwazi ukuthi lababantu bayidelele iNkosi.

³¹ Kwathi eseqedile wonke lamazwi, umhlaba waqhekezeka ngaphansi kwabo,

³² wavuleka, wabaginya lemizi yabo, labo bonke abantu bakoKora, lempahla yabo yonke.

³³ Bona behlela endaweni yabafileyo bephila lakho konke okwabo; umhlaba wabagqibela, banyamalala ebandleni.

³⁴ Bonke abakoIsrayeli ababebazingelezele babaleka ekukhaleni kwabo, ngoba bathi: Umhlaba kawungasiginyi lathi.

³⁵ Kwavela eNkosini umlilo, waqothula labobantu abangamakhulu amabili lamatshumi amahlanu ababenikele ngempepha.

³⁶ INkosi yasisithi kuMose:

³⁷ Mtshele uEleyazare, indodana kaAroni umpristi, ukuba akhuphe imiganu yokutshisela impepha emlilweni; wena uwuhlikize umlilo uwuchithele khatshana.

³⁸ Ngoba ingcwele imiganu yokutshisela impepha yalababantu ababulawa ngokona kwabo, kayikhandwe ibe yizicecedu zokusibekela ialtare; bayinikela phambi kweNkosi, ngakho ingcwele. Ngalokhu izakuba yisibonakaliso ebantwini bakoIsrayeli.

³⁹ UEleyazare umpristi wasethatha imiganu yethusi yokutshisela impepha abayinikeleyo labobantu abatshisiweyo, yakhandwa yaba yizicecedu zokusibekela ialtare,

⁴⁰ kube yisikhumbuzo ebantwini bakoIsrayeli sokuthi lowo ongesuye umpristi, ongesuye owenzalo kaAroni, angasondeli ukutshisa impepha phambi kweNkosi, funa afe njengoKora lexuku lakhe, njengokutsho kweNkosi kuEleyazare ngoMose.

⁴¹ Kusisa lonke ibandla labakoIsrayeli labasola oMose loAroni, lathi: Libabulele abantu beNkosi.

⁴² Kwathi ibandla selibahlanganyela oMose loAroni, bakhangela ngasethenteni lokuhlangana, babona iyezi lilisibekele, lenkazimulo yeNkosi ibonakala.

⁴³ UMose loAroni bafika ngaphambi kwethente lokuhlangana.

⁴⁴ INkosi yathi kuMose:

⁴⁵ Suka ebandleni leli ukuba ngibachithe khathesinje. Bathi mbo ngobuso phansi.

⁴⁶ UMose wathi kuAroni: Thatha umganu wakho wokutshisela impepha, ufake kuwo umlilo wasealtare, ubeke kuwo impepha, ukuse ngokuphangisa ebandleni, ubenzele indlela yokubuyisana; ngoba ulaka seluphumile eNkosini, umkhuhlane usuqalisile.

⁴⁷ UAroni wasekuthatha njengokutsho kukaMose, wagijimela ebandleni; kodwa umkhuhlane wawusuqalisile phakathi kwabantu. Wafaka impepha, wabenzela abantu indlela yokubuyisana.

⁴⁸ Wema phakathi kwabafileyo labaphilileyo; umkhuhlane waphela.

⁴⁹ Labo abafa ngomkhuhlane babezinkulungwane ezilitshumi lane, lamakhulu ayisikhombisa, ngaphandle kwalabo abafa ngendaba kaKora.

⁵⁰ UAroni wabuyela kuMose ngasemnyango wethente lokuhlangana, umkhuhlane usuphelile.