AmaNani 14 - iBhayibhili Elingcwele 1978

Abantu bayivukela iNkosi

¹ Lonke ibandla laseliphakamisa ilizwi lalo, lakhala kakhulu; abantu bakhala inyembezi ngalobobusuku.

² Bonke abakoIsrayeli babasola oMose loAroni; lonke ibandla lathi kubo: Kungathi ngabe safela elizweni laseGibithe, ingabe enkangala!

³ INkosi isilethelani kulelilizwe ukuze sibulawe ngomkhonto na? Omkethu labantwana bethu bazakuba yimpango; bekungebe ngcono ukuba sibuyele eGibithe na?

⁴ Bakhulumisana besithi: Asikhethe omunye abe yinduna, sibuyele eGibithe.

⁵ UMose loAroni bathi mbo ngobuso phansi phambi kwalo lonke ibandla labakoIsrayeli.

⁶ UJoshuwa indodana kaNuni loKalebi indodana kaJefune ababephakathi kwalabo abahlola ilizwe, badabula ingubo zabo,

⁷ bathi kulo lonke ibandla labakoIsrayeli: Ilizwe esadabula kulo ukuba silihlole yilizwe elihle kakhulu.

⁸ Uba iNkosi isithanda, izakusingenisa elizweni lelo eligcwele uchago lenyosi, isinike lona.

⁹ Kodwa lingayivukeli iNkosi; futhi lingesabi abantu balelolizwe, ngoba sizabadla sibaqede. Kabaselaso isivikelo; iNkosi ilathi; ngakho lingabesabi.

¹⁰ Kodwa lonke ibandla lathi kabakhandwe ngamatshe. Inkazimulo yeNkosi yahle yabonakala ethenteni lokuhlangana kubo bonke abakoIsrayeli.

¹¹ INkosi yathi kuMose: Koze kube nini lababantu bengidelela na? Koze kube nini bengangithembi, lanxa ngenze izibonakaliso ezinengi phakathi kwabo na?

¹² Ngizakubehlisela umkhuhlane, ngibafulathele, ngikwenze wena ube yisizwe esikhulu lesilamandla kulabo.

¹³ UMose wathi eNkosini: Kodwa amaGibithe azakuzwa lokhu; nguwe owakhupha lababantu phakathi kwawo ngamandla akho.

¹⁴ Azakutshela abantu balelilizwe. Bezwile labo ukuthi wena Nkosi uphakathi kwalababantu, lokuthi babonana lawe, lokuthi iyezi lakho liphezu kwabo, uhamba phambi kwabo usensikeni yeyezi emini lasensikeni yeyezi ebusuku.

¹⁵ Uba ubulala lababantu ubaqede, izizwe ezizwe ngodumo lwakho zizakuthi:

¹⁶ INkosi yahluleka ukungenisa lababantu elizweni eyafunga ukubanika lona, ngakho ibabulele enkangala.

¹⁷ Ngakhoke, Nkosi, kakubonakaliswe ubukhulu bamandla akho njengokutsho kwakho, ngoba wena wathi:

¹⁸ INkosi iyaphuza ukuthukuthela, igcwele uthando olungapheliyo, ithethelela ububi leziphambeko, kodwa kayiyikubayekela abalecala, kodwa yehlisela ububi baboyise phezu kwabantwana besizukulwana sesithathu lesesine.

¹⁹ Ake ubathethelele labobantu ububi babo njengobukhulu bothando lwakho olungapheliyo, lanjengalokho ubathethelele lababantu kusukela eGibithe kuze kube khathesi.

UNkulunkulu uthi uzakutshaya abakoIsrayeli

²⁰ INkosi yasisithi: Yebo, sengibathethelele njengelizwi lakho;

²¹ kodwa impela, njengalokhu ngiphila, lanjengalokhu wonke umhlaba uzakugcwala inkazimulo yeNkosi,

²² bonke abantu ababone inkazimulo yami lezibonakaliso zami engazenza eGibithe lasenkangala, abangilingileyo izikhathi ezilitshumi bengezwanga ilizwi lami,

²³ kabayikubona ilizwe engafunga ukulinika oyise; futhi labo abangidelelayo kabayikulibona.

²⁴ Kodwa inceku yami uKalebi ulomoya owahlukileyo, wangilandela ngokupheleleyo; ngakho ngizamngenisa elizweni aya kilo; lizakuba ngelenzalo yakhe.

²⁵ AmaAmaleki lamaKanani ahlala esigodini. Kusasa phendukani, liye enkangala ngendlela eya oLwandle oluBomvu.

²⁶ INkosi yathi kuMose loAroni:

²⁷ Koze kube nini lelibandla elibi lingisola na? Ngizwile ukusola kwabantu bakoIsrayeli abakwenza ngami.

²⁸ Tshono kibo uthi: Ngiyazifunga, kutsho iNkosi, ukuthi lokho elikukhulume ngisizwa ngizakukwenza kini.

²⁹ Izidumbu zenu zizagcwala inkangala le, lina lonke elabalwayo elileminyaka engamatshumi amabili lengaphezulu, elangisolayo.

³⁰ Kakuyikungena loyedwa nje elizweni engafunga ukulihlalisa kulo, ngaphandle kukaKalebi indodana kaJefune loJoshuwa indodana kaNuni.

³¹ Kodwa abantwana benu elatsho ngabo ukuthi bazakuba yimpango, ngizakubangenisa kulo, bazithokozise ngalo.

³² Linake, izidumbu zenu zizagcwala kulinkangala.

³³ Abantwana benu bazakuba zinzulane enkangala iminyaka engamatshumi amane, bahlawule ukungathembeki kwenu, kuze kufe lowokucina wenu.

³⁴ Lahlola ilizwe insuku ezingamatshumi amane; usuku luzalingana lomnyaka, ngakho lizathwala ububi benu iminyaka engamatshumi amane, lize lazi ukuthi kunjani nxa lingidelela.

³⁵ Mina Nkosi ngikhulumile. Impela ngizakwenza lokhu kulo lonke lelibandla elibi elimelene lami; kulinkangala bazakufa, baphele nya.

Ukubulawa kwabahloli ababi abalitshumi

³⁶ Lawomadoda athunywa nguMose ukuhlola ilizwe, kwathi ekubuyeni kwawo avusa lonke ibandla ukumsola ngokubika umbiko omubi mayelana lelizwe,

³⁷ abulawa ngumkhuhlane phambi kweNkosi.

³⁸ Kodwa uJoshuwa indodana kaNuni loKalebi indodana kaJefune, ababehamba lalawomadoda ukuyahlola ilizwe, basala.

AbakoIsrayeli banqotshwa eHorma

³⁹ UMose wababikela lamazwi bonke abakoIsrayeli; abantu balila kakhulu.

⁴⁰ Bavuka ekuseni kakhulu, bakhwela engqongeni zezintaba, bathi: Khangelani, sesizakuya endaweni iNkosi eyithembisileyo; sivumile ukuthi sonile.

⁴¹ Kodwa uMose wathi: Lephulelani umlayo weNkosi? Kaliyikuphumelela.

⁴² Lingayi phambili, funa lichithwe yizitha zenu, ngoba iNkosi kayiphakathi kwenu.

⁴³ Ngoba kukhona lapho amaAmaleki lamaKanani ngaphambi kwenu; lizakubulawa empini ngoba liyitshiyile iNkosi; kayiyikuba lani.

⁴⁴ Kodwa bakhwela engqongeni zezintaba ngokuziqhenya, lanxa umtshokotsho wesivumelwano seNkosi loMose engaphumanga ezihonqweni.

⁴⁵ AmaAmaleki lamaKanani ayehlala kulezozintaba ehla, abanqoba, axotshana labo kwaze kwaba seHorma.