AmaNani 13 - iBhayibhili Elingcwele 1978

Abahloli abalitshumi lambili bathunyelwa ukuhlola eKanani

¹ INkosi yathi kuMose:

² Thuma abantu ukuba bahlole ilizwe laseKanani engibapha lona abakoIsrayeli; uthume umuntu waleso lalesosizwe saboyise, umuntu oyinduna.

³ UMose wabathumake besuka enkangala yaseParani, njengokutsho kweNkosi; bonke babeyizinhloko zabakoIsrayeli.

⁴ Nanka amabizo abo; owesizwe sakoRubeni, uShamuwa indodana kaZakuri.

⁵ Owesizwe sakoSimeyoni, uShafati indodana kaHori.

⁶ Owesizwe sakoJuda, uKalebi indodana kaJefune.

⁷ Owesizwe sakoIsakari, uIgali indodana kaJosefa.

⁸ Owesizwe sakoEfrayimi, uHosheya indodana kaNuni.

⁹ Owesizwe sakoBenjamini, uPaliti indodana kaRafu.

¹⁰ Owesizwe sakoZebuluni, uGadiyeli indodana kaSodi.

¹¹ Owesizwe sakoJosefa, ngitsho owesizwe sakoManase, uGadi indodana kaSusi.

¹² Owesizwe sakoDani, uAmiyeli indodana kaGemali.

¹³ Owesizwe sakoAsheri, uSethuri indodana kaMikayeli.

¹⁴ Owesizwe sakoNafitali, uNabi indodana kaVofisi.

¹⁵ Owesizwe sakoGadi, uGewuweli indodana kaMaki.

¹⁶ Nanka amabizo amadoda uMose awathumayo ukuhlola ilizwe. UMose wambiza uHosheya indodana kaNuni ngokuthi nguJoshuwa.

¹⁷ UMose wabathuma ukuhlola ilizwe laseKanani, wathi kubo: Hambani liye eNegebi, likhuphukele ezintabeni,

¹⁸ libone ukuthi ilizwe linjani, lokuthi abantu abakhileyo kulo balamandla kumbe babuthakathaka, balutshwana kumbe banengi yini,

¹⁹ lokuthi ilizwe labo linjani, loba lihle loba libi, lokuthi imizi abahlala kiyo injani, loba yizihonqo loba yizinqaba,

²⁰ lokuthi ilizwe livundile loba lilugwadule, lokuthi lilezinkuni loba hayi. Manini isibindi, libuye lezithelo zelizwe. Kwasekuyisikhathi sezithelo zokuqala zevini.

²¹ Basebehamba, balihlola ilizwe kusukela enkangala yaseZini kuze kube seRehobi, ngasekungeneni kweHamathi.

²² Bahambake basukela eNegebi baze bafika eHebroni; kwakuhlala khona oAhimani loSheshayi loTalimayi, inzalo kaAnaki — IHebroni lakhiwa iminyaka eyisikhombisa lingakakhiwa iZowani laseGibithe —

²³ Bafika esihotsheni saseEshikoli; baquma khona ugatsha olulehlukuzo lezithelo zevini, ababili baluthwalisana ngesigodo, kanye lezithelo zamapomegranati lemikhiwa.

²⁴ Indawo leyo kwathiwa yisihotsha saseEshikoli, ngenxa yehlukuzo elaqunywayo ngabantu bakoIsrayeli.

²⁵ Ekupheleni kwensuku ezingamatshumi amane babuya bevela ekuhloleni kwabo ilizwe.

²⁶ Beza kuMose loAroni lakulo lonke ibandla labakoIsrayeli enkangala yaseParani, eKadeshi. Bababikela lebandla lonke, babatshengisa izithelo zelizwe.

²⁷ Bambikela uMose bathi: Safika elizweni owasithuma kulo; ligcwele uchago lenyosi; nanzi izithelo zalo.

²⁸ Kodwake abantu abakhona elizweni balamandla, lemizi ibiyelwe ngemithangala, mikhulu kakhulu; futhi sabona khona inzalo kaAnaki.

²⁹ AmaAmaleki akhile elizweni laseNegebi; amaHethi lamaJebusi lamaAmori akhile ezintabeni; amaKanani akhile ngasolwandle laseceleni kweJordani.

³⁰ UKalebi wacela abantu phambi kukaMose ukuba balalele, wathi: Asihambeni khathesi, silithumbe ilizwe, ngoba impela silamandla okulinqoba.

³¹ Kodwa amadoda ayehambe laye athi: Kasilamandla okuhlasela labobantu, ngoba balamandla kulathi.

³² Basebebikela abakoIsrayeli umbiko omubi ngelizwe ababelihlolile bathi: Ilizwe esalihlolayo yilizwe elidla abantu balo; labantu bonke esababona kulo bangabantu abakhulu kakhulu.

³³ Sabona lapho iziqhwaga — amadodana kaAnaki ayinzalo yeziqhwaga — Emehlweni ethu sasingangentethe phambi kwazo, sasinjalo lasemehlweni azo.