AmaNani 12 - iBhayibhili Elingcwele 1978

UMiriyamu loAroni baphikisana loMose

¹ UMiriyamu loAroni baphikisana loMose ngoba wayethethe owesifazana umKushi.

² Bathi: Kambe, iNkosi ikhulumile kuMose kuphela na? Kayikhulumanga lakithi na? INkosi yakuzwa lokhu.

³ UMose lo wayemnene kakhulu kulabo bonke abantu ababesemhlabeni.

⁴ INkosi yahle yathi kuMose loAroni loMiriyamu: Wozani lina lobathathu ethenteni lokuhlangana. Bahamba bobathathu.

⁵ INkosi yehla ngensika yeyezi, yema ngasemnyango wethente, yabiza uAroni loMiriyamu; basondela bobabili.

⁶ Yathi: Zwanini amazwi ami; uba kukhona umprofethi phakathi kwenu, mina Nkosi ngizaziveza kuye ngombono, ngikhuluma laye ngephupho.

⁷ Kodwa inceku yami uMose kayisuye umprofethi onjalo; nguye yedwa othembekileyo kubo bonke abendlu yami.

⁸ Yena ngikhuluma laye ngokucacileyo ubuso ngobuso, kungesikho ngemizekeliso; futhi uzakubona isimo seNkosi uqobo. Ngakho kungani lingesabi ukukhuluma kubi ngenceku yami uMose na?

⁹ INkosi yabathukuthelela; yahamba.

¹⁰ Kwathi lapho iyezi lisuka phezu kwethente, uMiriyamu wayeselobulephero, emhlophe njengongqoqwane. UAroni wamkhangela, wabona ukuthi ulobulephero.

¹¹ Wathi kuMose: Nkosi, ungasitshayi ngenxa yesenzo sethu sobuthutha langokubi esikwenzileyo.

¹² Ungamyekeli abe njengofileyo, onyama yakhe idliwe nganxanye nxa ephuma esiswini sikanina.

¹³ UMose wasekhala eNkosini wathi: Nkulunkulu, ake umelaphe, ngiyakuncenga.

¹⁴ Kodwa iNkosi yathi kuMose: Uba uyise ubemkhafulele ngamathe ebusweni, ngabe kayangekanga insuku eziyisikhombisa na? Kavalelwe ngaphandle kwezihonqo okwensuku eziyisikhombisa; emva kwalokho abuye angeniswe futhi.

¹⁵ UMiriyamu wavalelwa ngaphandle kwezihonqo insuku eziyisikhombisa; abantu kabasukanga, waze wabuyiswa uMiriyamu.

¹⁶ Emva kwalokho abantu basuka eHazerothi, baya bamisa enkangala yaseParani.