AmaNani 11 - iBhayibhili Elingcwele 1978

INkosi ithembisa ukubapha inyama

¹ Abantu basebesola eNkosini ngenxa yobunzima babo. INkosi isikuzwile yathukuthela, lomlilo wayo wavutha phakathi kwabo, waqothula abanye abasemkhawulweni wezihonqo.

² Abantu basebekhala kuMose; wakhuleka eNkosini, umlilo wadeda.

³ Ngakhoke indawo leyo yathiwa yiTabera, ngoba umlilo weNkosi wavutha phakathi kwabo.

⁴ Ududu lwabantu olwaluphakathi kwabo lwaqala ukukhanuka izinto ezinhle, labantu bakoIsrayeli baphinde bakhala, bathi: Ngubani ozakusipha inyama ukuba sidle na?

⁵ Siyazikhumbula inhlanzi esasizidlela zona eGibithe, lamakhomane, lamakhabe, lamaliki, lesandindima, lebhobola.

⁶ Kodwa khathesi siyafa yindlala, kakulalutho esingalubona ngaphandle kwalimana.

⁷ Imana yayinjengenhlanyelo emhlophe, lokukhangeleka kwayo kwakunjengokwenhlaka.

⁸ Abantu baphuma bayibutha, bayichola ematsheni, loba bayigiga engigeni, bayipheka embizeni, benza amaqebelengwana ngayo; yezwakala emlonyeni njengezinkwa eziphekiweyo ngamafutha.

⁹ Lapho amazolo elala phezu kwezihonqo ebusuku, imana yehla lawo.

¹⁰ UMose wezwa abantu bekhala emizini yabo, bonke bemi ngaseminyango yamathente abo. INkosi yathukuthela kakhulu; kwaba kubi kuMose.

¹¹ UMose wathi eNkosini: Wenzeleni okubi encekwini yakho? Kungani ngingafumananga umusa emehlweni akho ukuze ungisindise ngomthwalo walababantu bonke na?

¹² Yimi unina walababantu na? Yimi engabazalayo ukuze ngibasingathe esifubeni sami njengomlizane esingatha abantwana bakhe, ngibase elizweni owafunga ukulinika oyise na?

¹³ Ngizazuza ngaphi inyama ukuba ngibaphe bonke lababantu? Ngoba bayakhala phambi kwami besithi: Siphe inyama ukuba sidle.

¹⁴ Kangilamandla okuthwala bonke lababantu ngedwa, ngoba kuyangisinda.

¹⁵ Uba ufuna ukwenza njalo kimi, ngibulale masinyane, uba ngifumene umusa emehlweni akho, ukuze ngingaboni ukuhlupheka kwami.

¹⁶ INkosi yathi kuMose: Buthanisa abangamatshumi ayisikhombisa babalisa bakoIsrayeli, owaziyo ukuthi bangabalisa babantu lezinduna zabo, ubalethe ethenteni lokuhlangana ukuba beme khona lawe.

¹⁷ Ngizakwehla, ngikhulume lawe khona; ngizakuthatha ingxenye yomoya okuwe ngiyifake kibo; bazakuthwala umthwalo wabantu kanye lawe, ukuze ungawuthwali wedwa.

¹⁸ Tshono ebantwini uthi: Zihlambululeleni ikusasa, ngoba lizakudla inyama; ngoba likhalile eNkosini lathi: Ngubani ozakusipha inyama ukuba sidle? Kwakukuhle kithi eGibithe. Ngakhoke iNkosi izakulipha inyama ukuba lidle.

¹⁹ Kaliyikuyidla usuku lube lunye, loba insuku ezimbili, loba insuku ezinhlanu, loba insuku ezilitshumi, ingabe insuku ezingamatshumi amabili,

²⁰ kodwa inyanga yonke, ize iphume ngamakhala enu, ilitshiphele, ngoba liyilahlile iNkosi ephakathi kwenu, lakhala phambi kwayo lathi: Saphumelani eGibithe na?

²¹ Kodwa uMose wathi: Abantu engiphakathi kwabo bazinkulungwane ezingamakhulu ayisithupha abahamba ngenyawo; wena uthe: Ngizabanika inyama ukuze badle inyanga yonke.

²² Kambe bazakuhlatshelwa izimvu lezinkomo ukuze basuthe na? Loba bazakubanjelwa yini inhlanzi zonke zolwandle ukuba basuthe na?

²³ INkosi yathi kuMose: Isandla seNkosi siyehluleka ukusiza na? Khathesi usuzakubona ukuthi ilizwi lami lizagcwaliseka kuwe yini.

²⁴ UMose wasephuma, wabatshela abantu amazwi eNkosi; wabutha abangamatshumi ayisikhombisa babalisa babantu, wabamisa ngasethenteni lokuhlangana.

²⁵ INkosi yehla ngeyezi, yakhuluma kuye, yathatha ingxenye yomoya okuye, yayifaka kubalisa abangamatshumi ayisikhombisa. Kwathi lapho umoya usehlela phezu kwabo, batshumayela. Kodwa kabaphindanga ukutshumayela.

²⁶ Amadoda amabili ayesalele ezihonqweni, uElidadi loMedadi; umoya wehlela laphezu kwabo. Amabizo awo ayephakathi kwalabo abalotshiweyo, kodwa kawayanga ethenteni; atshumayela esezihonqweni.

²⁷ Kwagijima ijaha elithile ukuyabika kuMose ukuthi: UElidadi loMedadi bayatshumayela ezihonqweni.

²⁸ UJoshuwa indodana kaNuni, inceku kaMose, omunye wabakhethiweyo, wathi: Nkosi yami, Mose, banqabele.

²⁹ Kodwa uMose wathi kuye: Ulomona ngenxa yami na? Kungathi bonke abantu beNkosi bangaba ngabaprofethi, ukuba iNkosi ifake umoya wayo kibo!

³⁰ UMose labalisa bakoIsrayeli babuyela ezihonqweni.

INkosi ibapha izagwaca

³¹ Kwavuka umoya ovela eNkosini, waletha izagwaca zivela olwandle, wazehlisela ezihonqweni; zazikhona inxa zonke okulingana lohambo losuku kusukela ezihonqweni; lenqumbi yazo phezu komhlabathi yaba zingalo ezimbili.

³² Abantu babephuma lonke lolosuku, lobusuku bonke, losuku lonke olulandelayo, bebamba izagwaca. Lowo owabamba ezilutshwana kulabanye wabamba amahomeri alitshumi azo; bazichaya ngasezihonqweni inxa zonke.

³³ Inyama isesemilonyeni yabo, iNkosi yabathukuthelela abantu, yabehlisela umkhuhlane omkhulu kakhulu.

³⁴ Ngakhoke leyondawo yathiwa yiKibirothi‐Hathava, ngoba bangcwaba khona abantu ababeyizihwaba zenyama.

³⁵ Abantu basuka eKibirothi‐Hathava baya eHazerothi; bahlala khona eHazerothi.