AmaNani 10 - iBhayibhili Elingcwele 1978

Impondo zesiliva

¹ INkosi yathi kuMose:

² Yenza impondo ezimbili zesiliva, uzikhande, uzisebenzise ekubizeni ibandla lasekusukeni kwabantu.

³ Ekukhaleni kwempondo zombili, lonke ibandla lizahlangana lawe ngasemnyango wethente lokuhlangana.

⁴ Kodwa uba kukhaliswa uphondo olulodwa, izikhulu zodwa ezizinhloko zezizwe zakoIsrayeli zizakuhlangana lawe.

⁵ Lapho lihlaba umkhosi, izihonqo ezingasempumalanga zizakusuka.

⁶ Lalapho liphinda ukuhlaba umkhosi ngokwesibili, izihonqo ezingaseningizimu zizakusuka. Ukuze zisuke, kakuhlatshwe umkhosi.

⁷ Kodwake lapho lifuna ukubuthanisa ibandla lizakukhalisa impondo, kodwa lingahlabi umkhosi.

⁸ Amadodana kaAroni, abapristi, yiwo azakukhalisa izimpondo. Lokhu kuzakuba kini isimiso esingelakuphela ezizukulwaneni zenu.

⁹ Kuzakuthi lapho liphuma impi elizweni lakini ukuyakulwa lezitha ezilicindezelayo, lihlabe umkhosi ngezimpondo, ukuba iNkosi uNkulunkulu wenu ilikhumbule, likhululwe ezitheni zenu.

¹⁰ Langezinsuku zokuthokoza kwenu, lasemikhosini yenu emisiweyo, lasekuthwaseni kwenyanga, lizakhalisa izimpondo ekunikeleni iminikelo yenu yokutshiswa lemihlatshelweni yeminikelo yenu yokuthula, ukuze zilisize ukukhumbula uNkulunkulu wenu. Mina ngiyiNkosi uNkulunkulu wenu.

Ukusuka kwabakoIsrayeli eSinayi

¹¹ Ngomnyaka wesibili, ngosuku lwamatshumi amabili lwenyanga yesibili, iyezi lasuka phezu kweTabernakeli lobufakazi.

¹² Abantu bakoIsrayeli basuka enkangala yaseSinayi ngezigaba ngezigaba; iyezi lema enkangala yaseParani.

¹³ Baqalisake ukusuka belaywa yiNkosi ngoMose.

¹⁴ Kuqala kwasuka uphawu lwezihonqo zabakoJuda lezigaba zabo; uNashoni indodana kaAminadaba wayengumkhokheli webandla labo.

¹⁵ Umkhokheli webandla lesizwe sabakoIsakari wayenguNethaneli indodana kaZuwari.

¹⁶ Umkhokheli webandla lesizwe sabakoZebuluni wayenguEliyabi indodana kaHeloni.

¹⁷ Kwathi lapho iTabernakeli lidilizwa, amadodana kaGerishoni lamadodana kaMerari asuka, alithwala iTabernakeli.

¹⁸ Lwaselusuka uphawu lwezihonqo zabakoRubeni lezigaba zabo; umkhokheli webandla labo wayenguElizuri indodana kaShedewuri.

¹⁹ Umkhokheli webandla lesizwe sabakoSimeyoni wayenguShelumiyeli indodana kaZurishadayi.

²⁰ Umkhokheli webandla lesizwe sabakoGadi wayenguEliyasafi indodana kaDehuweli.

²¹ Kwasekusuka amaKohathi ethwala izinto ezingcwele; iTabernakeli lamiswa, wona engakafiki.

²² Lwaselusuka uphawu lwezihonqo zabakoEfrayimi lezigaba zabo; umkhokheli webandla labo wayenguElishama indodana kaAmihudi.

²³ Umkhokheli webandla lesizwe sabakoManase wayenguGamaliyeli indodana kaPedazuri.

²⁴ Umkhokheli webandla lesizwe sabakoBenjamini wayenguAbidani indodana kaGideyoni.

²⁵ Lwaselusuka uphawu lwezihonqo zabakoDani lezigaba zabo; babengabokucina ezihonqweni zonke; umkhokheli webandla labo wayenguAhiyezeri indodana kaAmishadayi.

²⁶ Umkhokheli webandla lesizwe sabakoAsheri wayenguPagiyeli indodana kaOkirani.

²⁷ Umkhokheli webandla lesizwe sabakoNafitali wayenguAhira indodana kaEnani.

²⁸ Ekusukeni kwabo abantu bakoIsrayeli bahamba, belandelana ngezigaba zabo.

²⁹ UMose wathi kuHobabi indodana kaRehuweli waseMidiyani, umlamu wakhe: Sesisuka siya endaweni iNkosi ekhulume ngayo ukuthi: Ngizakulipha yona. Woza, sihambe; sizakukwenzela okuhle, ngoba iNkosi ithembise ukwenza okuhle kuIsrayeli.

³⁰ Wathi kuye: Kangiyikuhamba lani, kodwa ngizahamba ngiye elizweni lakithi lasezihlotsheni zami.

³¹ UMose wathi: Ake ungasitshiyi, ngoba uyazi lapho singamisa khona enkangala, uzakuba ngamehlo ethu.

³² Uba uhamba lathi, okuhle iNkosi ezakusenzela khona, lathi sizakukwenzela khona.

³³ Basukake entabeni yeNkosi, bahamba uhambo lwensuku ezintathu; umtshokotsho wesivumelwano seNkosi wawungaphambi kwabo okohambo losuku olulodwa ukuze ubadingele indawo yokuphumula.

³⁴ Iyezi leNkosi laliphezu kwabo emini, ekusukeni kwabo ezihonqweni.

³⁵ Kwakuye kuthi ekusukeni komtshokotsho, uMose athi: Vuka, Nkosi, zichitheke izitha zakho, lalabo abakuzondayo babaleke phambi kwakho.

³⁶ Ekumisweni kwawo wayesithi: Buyela, Nkosi, ezigidini ezinengi zakoIsrayeli.